هیزی دۋە شەممە ۱٦و حوزەیرانی، جە شارو تەبقای ئازادکریای، بەبەشداری ۲۷۰ ئەنداما و دەیان مێمانا دلێ و بەرو وڵاتی، ۳مین کۆنگرەو ئەنجومەنو سوریاى دیموکراتی (مەسەدە)ی ئەنجام دریا. جە کۆنگرەکەنە ئاژە و ڤیەرەکێ کوردستان و سوریا و وەرکەوتی دلینی قسێ و باسێشا سەر کریێ و ڕاچارێ پەی ئاڵۆزی و کێشەکا وزیێ رووە.

هەرپاسە جە کۆنگرەنە سەرەڕا وەنەی پەیام و یرۆزبایی پارت و لایەنە سیاسی و مەدەنیە کوردی، عەرەبی و بیانیەکا، هۆرۋچانی ئەنجام دریا و ئەمینە عومەر و ڕیاز دەرار، بە هامسەرۆکی مەسەدەی هورۋجنیێ و هاوەخت  ٤۱ ئەندامێ کۆنسەو ڕاۋەبەریچ هەر بە هۆرۋچنای دەسنیشانێ کریێ کە ۲۰شان ژەن-یەنێ.

دماتەر مەسەدە ئەنجامنامەو ۳مین کۆنگرەکێشا جە کۆنگرێۋی ڕۆچنامەۋانیەنە ئاشکرا کەرد کە دلێشنە ئامان:

جە ئیسەنە پەیلۋای دیموکراتی، ڕێکۋستەکریا و بەرپرسیاری لازمەن، بشۆم هەڵوێستەی بەرژەوەندیۋانەی حزبی قبوڵ نەکریۆنە. مەسەدە وێش بە چەترەو هێزە سیاسی و مەدەنیەکا و هێزەکا سوریای دیموکراتی-قەسەدەی مزانۆنە. چارەسەری جە سوریانە تەنها بە دیالۆگ و ڕاوێژکەردەی هامبەشی یبەدی مەیۆنە.

جە کۆنگرەنە میکازیزمێ و بڕێ جە خاڵەکا پەیڕە و پڕۆگرامو ئەنجومەنەکەی فاڕیێ و جەخت سەرو دۆزە بنەڕەتیە نیشتمانیەکا و مافو چینە جیاجیاکا گلێرگەی کریاۋە. پڕۆژەی دیموکراتی، بە خاستەرین ڕاچارە پەی چارەسەری قەیرانەکا کوردستانی و سوریای و وەرکەوتی دلینی ۋینیا، کە جە ڕاشەۋە هیوا و ئاۋاتەکا کورد، عەرەب، کلدۆ ئاسوری، تورکمان و سەرجەم باۋەڕیەکا بدی ماۋەرۆنە.

جە کۆنگرەنە جەخت جە واڵە و برایەتی گەلا کریاوە و ئاماژە بەداگیرکاری و تاۋانەکا تورکیای جە عەفرین دریا و کۆنگرە بەتەمامی خاڵەکێ کۆنگرەو ڕزگارکەردەی عەفرینی و شەهبایش پەسەندێ کەردێ و جەخت کریاۋە جە هەوڵدای پەی ئەۋەگێڵای عەفرینەکا پەی زێدو وێشا.