پلاتفۆرمو هۆرام-ی: دەسەڵاتو پانیشتی بە پێچەوانەو داواکاریەکان هەنگامە منیۆنە

پلاتفۆرمو هۆرام-ی سەبارەت بە ناڕەزایەتی گەلی و ئاژەو پانیش (باشور)و کوردستانی جە وەڵاوکریێوەنە دەستنیشانش کەردەن: "دەسەڵاتو پانیشتی بە پێچەوانەو داواکاریەکانو خەڵکی هەنگامە منیۆنە.

کۆنسەو ڕاوەبەری پلاتفۆرمو هۆرام-ی سەبارەت بە ناڕەزایەتی گەلی و ئاژەو پانیش (باشور)و کوردستانی جە وەڵاوکریێوەنە هەڵوێستش نیشانەدان و وازیارەن دەسەڵات بە پێچەوانەو داواکاریەکانو خەڵکی هەنگامە نەبنیۆنە. پالاتفۆرمەکە ئاماژەش بە هۆکارێ سەرهۆردای قەیرانەکێ کوردستانی و ناوچەکەی و جیهانی دان و ئەرەیاونانش: "هەمیشە دەسەڵات بابەتی ئابووری پپێسەو تەڵەی جە وەرانوەرو خەڵکییەنە بە کار ماوەرۆنە".

تەمامی وەڵاوکریاکە:

هام وەخت چەنی سەرهورداکانو تەرو وەرکەوتو دڵێراسەی و جیەانی کە نیشانێ بە بنبەست یاواو سیستموو سەرمایەداری بە پێشەنگایەتی دەوڵەتیەن پەی چارەسەری گرفتەکان، جە پانیشتو کوردستانیش سەرهۆردای دیسان دەسش پەنە کەردەنەوە. دەسەڵاتو پانیشتو کوردستانی کە جە ساڵەو ١٩٩١ی تا ٢٠٢٠ بە مڵیاردها دۆڵارێش جە سامانی گردیی دەست کەوتەن، بەڵام بە هۆکارو گەندەڵی و فەسادی ئیداری هێشتا نەتاوانش داواکاریە بنەڕەتیەکل خەڵکی پێسەو (ئاوی، کارەبای، هەلو هەرمانێ و خزمەتگوزاری) بە یاگێ باوەرۆنە. خرابتەر جە گردی دەسەڵاتدارێ پانیشتی حزبشا جە سەرو گردو نرخەکێ کۆمەڵگای، کەرامەتو ئینسانو کوردی و حکوومەتیچ بەرز کەردەنەوە. پەوکەی ڕۆ بەڕۆ گرفتێ زیاتەر بەرمگنا و ژیوای خەخڵکی قۆرستەر مەبۆنە. ئینە چەنڎەمین جارەن کە جە پانیشتەنە سەرهۆردای ڕووە مەڎۆنە، بەڵام هەر جارە چێرو نامێوێ جیاوازیەنە کوشنانشارە، بە جۆرێوە کە جیاتی ئانەیە کە داواکاریەکێ و ڕەنجو خەڵکی ببانێ بە بنەرەتو یەکسانی و ئازادی و چارەسەری، بەداخەوە بابە بە پلێ پەی سەرکەوتەو چەنڎ کەسایەتیێ و حزبەکان.

ئانە کە خەڵکی مەبۆنە چەنەش غافڵ نەبۆنە ئانەن کە دەسەڵات گرد وەختێوەنە بابەتو ئابوری پێسەو تەڵەی جە وەرانوەرو خەڵکینە بە کار ماوەۆنە. پەی ئانەیە پەرسەکێ تەرێ ویرو کۆمەڵگای ببەرۆوە، دەسەڵاتو پانیشتی سەرەراو ئانەی کە دەسش گێرتەن سەروو ئابووری کۆمەڵگایەرە، هاموەخت نڕخەکێ کۆمەڵگایچش فەوتنێنێ. جە گردی خرابتەر پەی پارێزنای دەسەڵاتیش دەسش دان خزمەتکەردەی بە سیاستوو داگیرکەرانو کوردستانی و جە چوارچێوەو دژایەتی چەنی هێزە شۆرشگێڵەکێ کوردستانی بەشێوی فرە جە خاکو وەڵاتیش وستەن خزمەتو داگیرکەرا. 
بەپاو پەیجۆرە ئابووریەکان، دەسەڵاتدارێ پانیشتی زیاتەر جە ٢١٠ مڵیارد دۆڵارێشان بەبێ ئانەی کە سەرچەمەو سەرف کەردەیش دیار بۆنە پەی قازانجوو خانەوادەگی و حزبی بێسەروشۆن کەردەن. ئینە جە وەختێوەنە کە سەرۆک وەزیرانو هەرێموو پانیشتی باس جە قەرزاریێوی ٢٧ مڵیارد دۆلاری حکوومەتەکەیش مەکەرۆنە کە دوورا جە راستی و ئامانج جە ئانەیە تۆقنای و بێئیرادە کەردەی خەڵکیەن.
ئازموون دەسەڵاتداری پانیشتی نیشانەشدا کە ئی جۆرە جە حوکمڕانی نەک نەبیەن بە سەرچەمەو خزمەتی بە خەڵکی، بە پێچەوانەوە کۆمەڵگاو کوردیش بەش بەش و هەژار کەردەن و پەی پارچەکانو تەرو کوردستانی بییەن بە کەوا سوورو وەر لەشکەرو داگیرکەرا. یاگێ وێشەنە کە خەڵکی جە گردوو یاگەکانە هامتەریب چەنی واڕای سیستموو دەسەڵاتداری پانیشتی و بەرکەردەی هێزە داگیرکارەکا، گەرەکەن سەرەراو ئەرەمەرزنایرەو سیستمی دیموکراتیکی، کەرامەت پەی گەل و نیشتمانی بگێڵناوە. 

ئێمە پێسەو پڵاتفۆرمو هۆرام-ی باوەڕمان ئانەن کە حکوومەتو هەرێمی نزیکەو سی ساڵان بە سیستماتیک دژ و بە پێچەوانەو داواکاریەکانو خەلکی مدرانەوەو بە درێژەدای بە سیاسەتە نادیمۆکراتیەکانش سوورا سەرو ئانەیە.  ئیمەی هۆرامی جە پانیشت سەرەراو گیرۆدەبییەی بە قەیرانەکان و گرفتە کۆمەڵایەتی، ئابووریەکانمان و تایبەتمەندی وێمان، چێروو سیاسەتو خانەوادەیی و حزبییەنە زوانەکەیچمان ڕوو بە فۆتیای ملۆنە و جە ئی بوارەنە پەوازی بە کار و کۆشایی خێرای هەن.

جە ئی بارودۆخەنە پلافۆرمو هۆرام-ی بانگەوازیش ئانەن کە خەڵکو پانیشتو کوردستانی بەگردی و هەرێمو هەورامانی بەتایبەتی، فاڕای یەکجاری سیستمی ئامانجشان بۆنە. مشیۆم پاگێرارە سەر ئەرەمەرزیای سیستمێ کە ئیرادەو خەڵکی، شکۆداری ژەنا و سەروەری وەڵاتی بە ئەساس بگێرۆن. بێگومان ئ سیستمە تەنیا بە پەیرەوکەردەی خەتەو یەرەمێ کە خەتەو ئیرادەو کۆمەڵگایەن، بونیاد منڕیۆن. گرفتێ گەلەکەیمان جە پانیشتەنە تەنیا مووچە و پوڵ نییا، بەڵکو ڕوانە بەشێوازێ جۆراوجۆرێ بێرێزی بە شکۆ و نڕخەکێ ئینسانو کوردی مەرکریۆنە. کوشتەو ژەنا چێرو نامێ نامووسیەنە، تاڵانی سامانی گردی، فرەبییەی پانتایی داگیرکاری دەوڵەتو تورکیای، نەبییەی ئازادی، وەلاکەردەیۆ کەلتور و فەرهەنگ داگیرکەری، پارچە پارچە کەردەو کۆمەڵگای چێرۆ نامێ دین، زوان، چینایەتی و ڕەگەزیەنە، بە جۆرێ کە ئامیان و یۆگێرتەی نەتەوەیی بەپیمانە ئینسانییەکاوا تێکێ دریێنێ.
بەڵام جە چنین بارودۆخێوەنە، یاگێ وێشەنە کە گرد تاکێ دەنگی نارازیەتی وێش بەرز بکەرۆنەوە  ڕووبەبەڕوو داگیرکاری ببانەوە. مشیۆم بزانیۆن کە تا چەنڎ ئی دەسەڵاتە زیاتەر بمانۆوە، ئابوری، نڕخە دیموکراتیەکێ کۆمەڵگای، شناسنو کوردی ئازادی، بابەتو یۆگێرتەی نەتەوەیی و پەرسو ژەنا زیاتەر تووشێ گرفتی ببنانێ. پنەوازەن ئەرکی تاریخی وێمان بەگا باوەرمێ تا نەوەکێمان پێسەو ئێمە ژیوایەو پەر جە گیروگرفتیشان نەبۆنە. چەنی بۆنە جە دماو سی ساڵان، هێشتای گرفتێ خەڵکی نان و ئاوی و کارەبای بانە؟ چی مشیۆم نەوەشێ پەی دەرمانی  و چارەسەری رووە بکەرانە ئیێران و تورکیا؟ پەی چێشی هێزێ نەتەوەیی رێکێنەوزیان، چی گرد لایەنێو هێزی چەکداری وێش هەن؟ فرە پەرسێ تەر هەنێ کە راستی حکومرانی پەر جە فەساد و گەندەڵی جە پانیشت بەرمەوزانێ. چارەسەری گردو ئی قەیرانێ و گرفتا بێگومان سوور بییەیا جە ئەرەمەرزنایرە سیستمێ دیموکراتیک کە گەل پەی وێش بڕیارووچارەنووسو وێش بدۆن و ئایندەش دیار بکەرۆن.

پلاتفۆرمو هۆرام-ی بە گرد شێوازێو پشتیوانی جە داواکاریە ئینسانی، نەتەوەیی ، فەرهەنگیی ، کۆمەڵایەتیی و ئابوریەکانو خەلەکەیمان مکەرمێنە و تا یاوای بە مافە ڕەواکاشان جە کۆشیای پەی یەکسانی و ئازادی سورێنمێ.