پێنجوێنە: چالاکۋانی سیاسی و مەدەنی، ئێقباڵ مورادی تەرۆر کریا.
نیمەشەۋێ ویەردێ، جە نزیکو دەرەو پێنجوێنۍ، تەرمو چالاکۋانی سیاسی و مەدەنی وەرکەوتو کوردستانی، ئێقباڵ مورادی، ئێزیاۋە کە ئاسەۋارو ۳ فیشەکاش پۆۋە بیەن.
شەۋێ ۋیەردێ، جە پێنجوێنە، چالاکۋانی سیاسی و مەدەنی و مافەکا مرۆڤی، ئێقباڵ مورادی ئەڕفانیان و دماتەر جە سەعات ٢٣:٣٠ دەیەقێ شەۋێ جە نزیکو دەرەو ئاڵیاواو پێنجوێنۍ تەرمەکەش ئێزیاۋە، کە ئاسەۋارو ۳ فیشەکاش پۆۋە بیەن.
ئیقبال مورادی، کە بەهۆو ستەم و زۆرداری ڕژێمو ئێرانی چنڎین ساڵێ جە پانیشتو کوردستانی نیشتەجا بیە بێ، تاتەو زیندانی سیاسی کوردی زانیار مورادی-ن، کە سزا جەداردایش پەی بڕیانەۋە.
مورادی سەرەڕاو ئانەیە کە چالاکی سیاسی و مەدەنی بیەن، یۆ جە ڕاۋەبەرا کۆمەڵەو مافو مرۆڤو کوردستانی بیەن و هەر جە نەوجەۋانی تێکەڵ و پەیۋەست بە کۆشای ئازادی بیەن. سەرو ئانێچە چنڎین ساڵێ جە تەمەنیش زیندانەکانە بە سەر بەردە بێ.
ئیقباڵ مورادی ۱۰ ساڵێ جەی ۋەڵتەر هەر جە پێنجوێنە هەوڵو تەرۆرکەردەیش دریا بێ و بەسەختی بریندار بیە بێ. بە پا پەیجورەکا، ئیتلاعاتو ئێرانی و دەسوپێوەندەکێش جە پانیشتەنە تەرۆرەکەشا ئەنجام دابێ. جەی سۆنگەۋە ئیسەیچ جە تەرۆرکەردەکێشنە نیگاکێ ڕوو بە ئیتلاعاتو ئێرانی و دەسوپێوەندەکاشەنێ.
