ع. ع. شەونم، گەورە شاعیر و ئەدیب، دەنگوەش، ئاوازئەرەنیەر و وەشنویس و شێوەکاری نامی هەڵەبجەیی جە ٩٥ ساڵی تەمەنیشەنە کۆچی دماییش کەرد و تەرمەکەش جە گۆرستانو گۆڵان-و هەڵەبجەی ئەسپەردە کریا.
سەرسەبای ئارۆ شەممەی، عەلی عەبدوڵڵا ئەشناسیا بە "ع. ع. شەونم"، گەورە شاعیر و ئەدیب، دەنگوەش، ئاوازئەرەنیەر، وەشنویس، شێوەکار، نویسەر و پەیجۆرکاری هەڵەبجەیی، جە تەمەنو ٩٥ ساڵییەنە جە شارو سلێمانیێ کۆچی دماییش کەرد و تەرمەکەش بریاوە هەڵەبجە و جە گۆرستانو گۆڵانی ئەسپەردە کریا.
ئی ئەدیبە ئەشناسیا و نامییەو کوردستانی، ساڵەو ١٩٢٩ی کریستیانی جە شارو هەڵەبجەی جەئەڎێ بییەن و هامتەریب چەنی مامۆستایەتیی، جە بوارەکێ پەروەدەی و فێرکەردەی، شیعر و شاعیری و ئەدەبیاتی، شێوەکاری، ئاوازئەرەنیای، وەشنویسی و نویستەی و پەیجۆرکاری جە تاریخەنە کارش کەردەن و خزمەتی فرەش بە گەل و نیشتمانەکەیش کەردەن. هاموەخت شارەزاییش باشش جە زوانەکێ (کوردی، فارسی، عەرەبی)یەنە بییەن و دەنگوەشیچ یۆی تەر بییەن جە بەهرەکانش.
ع. ع. شەونم چەنڎین بەرهەمێ بایەخدارێش و گرنگێش نویستێنێ بە تایبەتی جە بوارو شعرێ و ئەدبیاتیەنە و چاپێ و وەڵاوێ کرێنێنێوە. چەنڎین پارچە شیعرێش هەنێ کە کریێنێ بەسرودێ نیشتمانیێ چوون: (جەژنە جەژنی کوردستانە جەژنی نەورۆزە...بە تیشکی ئاگر ئەنووسم جەژنە پیرۆزە)یە، کە هەر وێچش ئاوازش پەی نیێنەرە.
کۆچکەردە، یۆ بییەن جە ئەرەمەرزنەرەکانو (یەکێتیی نویسەرانو کوردی) لقو بەغداد-ی. یەکەم کەس بییەن جە هەڵەبجەنە گروپو موزیک و سرودێ و گۆرانیێش مەرزنانەرە. ساڵانێ جە سڵێمانییە وەرپرسیاری چالاکیێ وانگەکانیش جەئەستۆ بییەن و بنکەو ئەدەبی و ڕۆشنویری سلێمانیێ یەکەمین خەڵاتو وێش بە شەونم-ی بەخشان.
ساڵح شارەزووری، یاساشناس، شاعیر، مێژوونویس، وەشنویس و هونەرمەند کە جە مەرگەساتو ساڵەو ١٩٨٨و هەڵەبجەیەنە وێش و خانەوادەکەیش گەشمەردێ بیێ، براو ع.ع. شەونم-یەن.
