هەزاران ژنی کانتۆنی فورات بەبۆنەی ٨ ی ئادارەوە، ئاهەنگیان گێڕا. 

لە ئاهەنگەکەدا نرخاندنی ڕێبەری گەلی کورد عەبدوڵا ئۆجالان دەربارەی ژنان و ڕۆڵیان لە مێژوودا بیسترا.

پاشان وتەبێژی کۆردیناسیۆنی کۆنگرەی ستار قسەی کرد، ڕایگەیاند ژنان بە پێشەنگایەتی تەڤگەری ڕزگاریی کوردستان هەنگاوی مێژووییان بۆ مسۆگەرکردنی ئازادی خۆیان هاویشتووە، گوتی: "بێگومان تێگەیشتن لە گرنگی ئەم ڕۆژە بە خوێندنەوەی ڕامانەکانی ڕێبەر عەبدوڵا ئۆجالان و تێکۆشانی وی بۆ ئازادی ژنان و جڤاک دەبێت".

بەڕێوەبەری مەجلیسی ژنانی بنەماڵەی شەهیدانی کانتۆنی فورات، عایشە ئەفەندی ڕایگەیاند سەرەڕای ئازارە مەزنەکان بڕوامان وایە ژنان ڕۆڵی مێژوویی خۆیان دەگەڕێننەوە، ئەمەش پێویست دەکات لە بواری سەربازی و سیاسی و دیپلۆماسی و جڤاکی فیداکاری مەزن ئەنجام بدرێت.

پاشان چالاکییەکە بە گۆرانی و شانۆ و هەڵپەڕکێ بەردەوام بوو.

حەلەب

لە گەڕەکی شێخ مەقسوودی حەلەب بە بەشداری سەدان کەس و نوێنەری پارتی گەل و پارتی نەتەوەیی جڤاکی سوریا و چەندین پارت چالاکییەک بەڕێوەچوو.

ئەندامی کۆردیناسیۆنی کۆنگرەی ستار فەهیمە حەمۆ گوتی: "تێکۆشانی ژنانی کورد و ژنانی ڕۆژهەڵاتی ناوین لەسایەی ڕێبەری نەتەوەیی و هاوڕێی ژنانی ئازاد عەبدوڵا ئۆجالان پێش دەکەوێت".

فەرماندەی یەپەژە ئەکین توڵهەڵدان ڕایگەیاند ڕێبەری گەلی کورد عەبدوڵا ئۆجالان بۆ ئازادی ژنان و بونیادنانی جڤاکی دیموکراتیک تێدەکۆشێت و داوای پتەوکردنی تێکۆشانی کرد بۆ ئازادی جەستەیی ڕێبەری گەلی کورد عەبدوڵا ئۆجالان.

ئاهەنگەکە بە گۆرانی و هەڵپەڕکێ بەردەوام بوو.