پارتوو ژیۋای ئازاڎیی کوردسانی (پەژاک) بە بەشداری نوێنەرایەتی سەرجەم دام ودەزگاكا، كۆنگرەو حۊتەمینوو ۋێش بە دروشمەو" بە فەلسەفەو ژەنۍ، ژیۋای، ئازاڎیی كوردسانی ئازاڎ مکەرمۍ و نەتەوەی دیموكراتیكی بنیاڎ منیەیمۍ " بەسەركۊتەیی بەرد ڕاوە و جە كۆنگرەکەنە هامسەرۆکاو پەژاکی فاڕیۍ و ئەندامۍ مەجلیسی تازەو پەژاكیچ هۊرچنیۍ.

بەپاو بەرنامە و پەیڕەوی دلېینەی هەر یەرە ساڵۍ جارێ كۆنگرە بەسیۆ و كۆنگرە باڵاتەرین ئۆرگانوو قەرارداو پەژاکیا.

كۆنگرە بە هۊرچنیەو دەسەو ڕاوەبەردەی و دیاركەردەی بەرنامەی و بەقسەکەردەی هامسەرۆكوو پەژاكی؛ هەڤاڵ سیامەند موعینی دەسش پنەکەرد. هەڤاڵ سیامەند ساڵیاڎوو ئەرەمەرزنای پەژاكی و نەورۆزوو ٢٧٢٤ی ۋەرەتاوی و چوارو نیسانیش جەگەلوو كوردی جە ۋەرکەوتوو كوردسانی و بنەیانەو كەس و كاروو گەشمەرڎا و تێكۆشەرا ئازاڎیی جە سەرانسەروو ئێرانی و زینڎانیا سیاسی و گرڎوو ئا هەڤاڵا کە بەدرێژایی تەمەنوو پەژاكی رەنجشا کێشت و جەنگەوانا ئازاڎیی و ئەنداماو كۆنگرەو حۊتەمی پیرۆز كەرد.

هەڤاڵ سیامەند ئاماژەش بە قەیران و پشێوییەکا سەروو ئاستی میان دەوڵەتی و هەرێمی کەرد و واتش؛ دەور و ئەركی قورس ئینا سەروو شانا پارتەكەیماوە. فاڕیایەکۍ خێرا مەیا ئاراوە. پارتەكەما پەنەوازش بەخەباتێوە چڕوپڕی ئایدۆلۆژی و کۊشیایۍ یۆگێرتەو رێكوستەی و ڕاوەبەریێوە بەقوەت و كادرێوە فكری و سیاسی بەقوەتیا كە بتاوۆ جوابدەرەوەو قۆناخەكەی بۆ، چونكی پەژاك و كادرەکێش تاریخ منویساوە.

موعینی ئەرەیاۋنایچش؛ دەرفەتی گۆنجیا ئینا ۋەروو دەسانە و متاومۍ سەركۊتەی پەی گەلەكەیما مسۆگەر بکەرمۍ.

هەڤاڵ سیامەند سەبارەت بە ئاخێزوو ژەنی، ژیۋای، ئازاڎیی واتش؛ پېسە پەژاكی نەتاواما جە ماوەو ئا دووە ساڵەو ئاخێزوو ژەنۍ، ژیۋای، ئازاڎینە بەرێكوستەبیەیۍ عال و سەرمەشقایەتیێوە سەركەوتە بکەرمۍ و چا تەرەفەیچۆ رەخنەداین و ۋێما مکەرمۍ و كۆنگرەو حۊتەمین و پەژاكی بە خەسارناسیێوە عال سەروو كەند و كۆسپەكارە پرۆژە و پلانێوە بەقوەت پەی یەرە ساڵی ئایندەی پەی خاوەنداری جە ئامانجەكا ئاخێزوو ژەنۍ، ژیۋای، ئازاڎیی منیۆرە.

جە دما دمایچەنە هەڤاڵ سیامەند واتش؛ سۆز و وەعدوو ۋێما پەی كەس و كاروو گیانبەخشایا ئاخێزوو ژەنۍ، ژیۋای، ئازاڎیی واوەی مکەرمېوە، بۊنەو ئامانجەكا ئاخێزیۆ گوڕ و تینێوە زیاتەر مڎەیمۍ بە کۊشیای ۋێما.

دماتەر؛ مۊچیاری رابەر ئاپۆی كە جە مانیفستۆ و هۊرسەنگنایەکا رابەر ئاپۆینە ئاماڎە کریا بۍ، ۋنیاوە.

جە بەردەوامی بەرنامەكاو كۆنگرەینە؛ گوزارشتەو دەسەو هامسەرۆكایەتی پێشكەش كریا.

جە گوزارشتەو دەسەو هامسەرۆكایەتینە مردای سەروو كاروخەباتوو چوارساڵەو پەژاكی کریابۍ و پەنجۍ وزیێبۍ سەروو كەم وكوڕیەكا جە ماوەو ئا چوار ساڵەو خەبات و کۊشیاینە و جە ۋەرا ۋەروو گرڎوو کەم و کوڵییەکا خەباتوو ئا چوار ساڵەینە رەخنەدای وەڵۍ وزیابۍ.

جە بەردەوامی گفتووگۆ و هۊرسەنگناکا کۆنگرەینە یاڎوو گیانبەخشایا کۊشیای ئازاڎیوازی پەژاکی کریاوەو مەدح و رەنج و مانیای سەرەمڕەو گرڎوو كادیر وخەباتكارا و گەلوو كوردی جە ۋەرکەوتوو كوردسانینە كریا كە بێ مردای جە سەروستەو ئامانجەكاو كۆنگرەو ششەم و پەژاكینە بە دڵ و گیان کۊشیایشا بەردەن ڕاوە و سۆز وپەیمان و وەعدشا چنی رابەر ئاپۆی و گرڎوو گەشمەرڎا ئازاڎیوازوو گەلوو كوردسانی واوەی کریاوە كە تا یاوای بە ئازاڎیی و گلېرگێوە دیموكراتیكی جە کۊشیاینە بەردەوامۍ با و وەعد دریا كە تەماموو كۆسپەكا سەروو ڕاو خەباتی و کۊشیای، بەرۆحێوە ئاپۆییۆ ۋییەرنا.

پەنەوازەن پېسە ئەرکێوە ئەخلاقی، سیاسی، ئینسانی هەر کەسایەتیێوە ئازاڎیواز بۆ بە دەنگوو ڕابەر ئاپۆی

درێژەو هۊرسەنگنای و گفتگۆکا کۆنگرەینە سەرنج وزیا سەروو ئانەی کە؛ ڕابەر ئاپۆ بە کۊشیای ۋێش پەڕێوە تازەش پەی کۊشیای ئازاڎیوازی کەردۆ و سەروو ئا ئەساسیە، مۆدێڕنیتەی سەرمایەداری و سیستموو دەوڵەت نەتەوەی و کۆنەپەرەسی دلېینەی، بە هامکاری یۊترینی، گەلەکۆمەشا دژوو ڕابەر ئاپۆی ئەنجام دا و بڕفاناشا و جە ڕوو جەستەییەوە رابەر ئاپۆشا جە زینڎانوو ئیمراڵینە حەپس كەرد و بە خیاڵوو ئانەی کە هزر و فەلسەفەو ئازاڎییش زینڎانی بکەرا و جە دماینە دلېشەنە بەرا، بەڵام ڕابەر ئاپۆ جە زینڎانوو ئیمڕاڵینە تاواش پاڕادیگماو ئازاڎیی پەرە پنە بڎۆ و بە جەماوەریش بکەرۆ و بە ملوێنان کەسۍ بانۍ بە دەنگوو ئازاڎیی ویروو ئازاڎیی ڕابەر ئاپۆی. پۊکەی پێویسا پېسە ئەرکێوە ئەخلاقی، سیاسی، ئینسانی هەر کەسایەتیێوە ئازاڎیواز بۆ بە دەنگوو ڕابەر ئاپۆی و پەی ئازاڎیی جەستەیی ڕابەر ئاپۆی دلۍ هەڵمەتەو ئازاڎیی جەستەیی ڕابەر ئاپۆینە یاگۍ گێرۆ و مشۊم ئانەیچ بزانا كە ئازاڎیی ڕابەر ئاپۆی، بە ماناو ئازاڎیی گەلوو كوردی و ئارامی جە مەنتیقەکەنە مۍ و تا ڕابەر ئاپۆ بە جەستەیی ئازاڎ نەبۆ، مەنتیقەکە ئارامی و ئازاڎیی بە ۋێشۆ مەوینۆ.

جە بەردەوامی کۆنگرەکەینە سەروو قۆناخی هەنووكەیی مردای كریاو و ئاماژە پانەی دریا کە گەلوو کوردی و تەڤگەروو ئازاڎیوازی کوردی جە قۆناخێوە هەستیاری تاریخینە ژیۋای سیاسی بەرۊنە سەر و ئاڵوگۆڕیەکان بەخێرایی ۋییەرانە. بە ۋەنایۊیۍ ریشەیی و ستراتژیک پېسە جمیەرۍ ئازاڎیی پەی ئانەی چنی ڕەوتوو فاڕیای مەنتیقەکەینە بە شێوازێوە زانستیانە و شۆڕشگێڵنانە جە ۋەرا ۋەروو گرڎوو کۆسپەکا سەردەمی و پڕۆژەکاو نەیارا ئازاڎیی بە کۆنەپەرەسی و ۋۍ ورەشا و بە کرێگرتا دلېینەیۆ گێرە هەتا پیلانەکا مۆدێڕنیتەی سەرمایەداری و هەژمۆنگەرایی سیستموو دەوڵەت - نەتەوەی و شێوازەكاو هۊرخەڵەتنای مۆدێڕنیتەی کاپیتالیستی و چڵکاو ورەشەکا نیشتمان ورەشی، سەرکۊتانە ئەرکوو ۋێش ۋیەرنۆ.

جەنگی جەهانی یەرەم جە تەرەفوو ئەکتەرا جیاوازی بە میانگەو کوردسانیرە ملۊڕاوە

مودێرنیتەی سەرمایەداری بە تەماسەکەردەو نیۆلیبرالیزمی و جە دنیاو گلوبالینە، حەریستەر و بێ ئەخلاق تەر هەر دەم پەی بەدەسئاردەی کاپیتاڵی زیاتەری و دەسکۊتەی سیاسی، ئابوری، ستراتژیک و ژیۆپۆلتیک جە مەنتیقەکەنە، گرڎوو ئاکتەر و هەژمۆنوازا بەشداری، بە گرڎوو قوەتیشاوە جە چەوسنایۆ و کاول کەردەی ئەخلاقی، سرووشت و گلېرگەی، ملەملانێوە بێویژدانانە بەرا ڕاوە. گلوبالیزم بە کەڵک هۊرگێرتەی جە دیجیتاڵ میدیای و گڕدوو کەرەسەکا سەردەمی گنانۍ دلۍ مەژگ و ژیۋای تاکی و گەرەکسانە کاراکتەروو مرۆڤایەتی بە دڵوو ۋێشا فۆڕم بڎاوە و جە چوارچێوەو سیاسەتی و مەسڵەحەتوو کاپیتاڵیزمینە کەڵکش چنە هۊرگێرا، بە مانایۍ تەر،کولتور و شێوازوو ژیۋایۍ نامۆ سەروو گلېرگەیرە بسەپنا.

دەسوەردای و یاردیدای گلېرگەی پەی بە نامۆبیەی بەها بەقیمەتەکا مرۆڤی، یۆن جە کەرەسە قیزەونەکا نیۆلیبڕالیزموو سەردەمی، واتە جەنگێوە ۋەرفراوان جە گرڎ مېڎان و بوارێنە ملۊڕاوە. جەنگی جەهانی یەرەم جە تەرەفوو ئەکتەرا جیاوازی بە میانگەو کوردسانیرە ملۊڕاوە، هەژمۆنگەرایی دەوڵەت - نەتەوەی، ئەکتەرا و هەژمۆنوازا گلۆبالیزمی جەهانی جە جەنگێوە بێ ئەمانەنە سەروو حیسابوو گەلا مەنتیقەکەی گرڎوو تواناو ۋێشا تاقی مکەراوە.

سەبارەت بە ئاژەو ئیساتۍ رژێمی ئەرەگیری ئێرانی جەکۆنگرەنە سەرنج وزیا سەروو ئانەی کە ئێران پېسە ئەکتەرێوە سەرەکی دەورێوە کاریگەرش سەروو فاڕیایەکا هەن. ئێرانی ئۆختاپوسی، جە کەڵک هۊرگێرتەی بە ڕاو جەنگی پڕۆکسی تاوانش تا حەدێوە ئامانجەکاو ۋێش جە ملەملانە میان نەتەوەیی و ناوچەیینە پێکۆ و چالاکانە بەشداروو ئی جەنگە کاولکەرەیە بۆ و حۊڵیچ مڎۆ ژیۋای سیاسی و هەژموونوو ۋێش جە مەنتیقەکەنە بازۆوە. سیاسەتوو ئێرانی پەی بەری جە چوارچێوەو جەنگی پرۆکسی و مەشغوڵ کەردەی زلهێزا جەهانی بیەن و جە دلېنەو ئێرانیچەنە یەکدەس کەردەی دەسەڵاتی و سەرکوتکەردەی بێڕەحمانەو گەلی جە دلېنەو ئێرانینە بیەن. پا مەڵامەتە و بە جەمۍ مەڵامەتۍ تەرۍ، دیما سەرهۊردای ئێرانەنە بەردەوام بیەن دژوو دیکتاتۆریەتی و ڕاوەبەردەی مافیاو حاکمیەتی.

پێویسا ئا شۊڕشە ژەنی، ژیوای، ئازاڎی پێسەو ڕێنسانسێوی هزری و فکری بوینیۊ

هەمان وەختەنە  سەرو شۊڕشو ژەنی، ژیوای، ئازاڎی دا تیشكی وزیا سەرو نەیاواینەی ڕژێمو ئێرانی جە دلێنەو ئا شۊڕشەینە کە نەتاوانش بەئیجابی پێسە دەرفەتێو وربسەنگیۊ و باس کریا؛ شۊڕشو ژەنی، ژیوای، ئازاڎی ئیراڎەو گەلاو ئێرانیش پەی ئازاڎیی نیشانە دا و ئا شۊڕشە گەرچی دەسەڵاتداراو ئێرانی بە شێوازی فرە وەحشیانە وەرڎەمشنە مدرێوە، بەڵام پێویسا ئا شۊرشەو ژەنی، ژیوای، ئازاڎی-یە پێسەو ڕێنسانسێوی هزری و فکری بوینیۊ و ستراتژیک نرخنایش سەر بکریۊ. متاومۍ بواچمۍ دەستەڵاتداراو ئێران تا ئاخر نمەتاوا گەلاو ئێرانی بە کۊت و زنجیر بکێشا و سەرکوتش بکەرا، ئاخرۊ هۊکارو قەیرانی ئابوری، کۊمەڵایەتی، سیاسی، دیپڵۊماسی و بە دەیان هۊکارۍ تەرۍ ئیتر هێزو سەرکوتو خەڵکی جەدەس مدۊ و دما ژیوایش  پێسەو گردو  دیکتاتۊراو تارێخی مبۊ و گنۊ زبڵدانو تارێخیوە.

ئێران سیستمێوی ئایدئۊلۊژیکی، توتالیتەر و دیکتاتۊرا و بۊنەو کاراکتەرو ئایدئۊلۊژیکو وێشۊ وێش جە گردو فێڵ و تەڵەكەبازی سیاسی - دینی وێش و سەرو مەیدانی سیاسیینە پەی مەنەیۊ ئیس چنە وربگێریۊ متاوۊ  بە ڕواڵەت وێش بفاڕۊ، بەڵام نیازش نییا، کە دلێنەنە و گەوهەرنە پەی دیمۊکراتیزەکەرڎەی وەڵاتی گولانەتەرین فاڕیای دیموكراتی بکەرۊ.

سەبارەت بە یۊگێرتەیی گەلو كوردی و نەبییەی یەكڕیزی و یۊگێرتەیی و دۊخی سیاسی کۊنگرە پەیامێوەش دا، کە یۊنەگێرتەیی کوردی سەبەبی تارێخییش هەن، بەڵام بڵاوەکەرڎەی وزەو کوردی بە شێوازێوی هەدەفمەند لاو دەسەڵاتداراو دەوڵەت - نەتەوەی و بە یارمەتیی مۊدێرنیتەی سەرمایەداری، هەدەفمەند و کارا کریان و ئا ناوەندەشا پەی پارێزنای سیستمو دەوڵەت – نەتەوەی دان دەسوو بنەیانێوە و  پێسەو هەرمانۍ و میسیۊنی تارێخی دیەنشا. وێورەشیی و نیشتمانورەشی تارێخو کوردستانینە پێسە مۊرانەی، وزە و تواناو و گێرتەن و بییەن ئامورێو دەسو سیستمی داگیرکەری کوردستانیوە. ئا خیانەتە لاو بنەیانەو بارزانییوە خەریکا نوڕمالیزە مکریۊ و بە نامۍ کوردی و کوردستانیوە بە شێوازێوی قەڵب، دەرواردو گلێرگەی کوردییش مداوە. ئا بنەیانە کاناڵو پارتی دیموکراتو کوردستانی و هامکاریی سیستمو دەوڵەت – نەتەوەی و داگیرکەراو سەرو کوردستانی، پێسەو ئامورێوی قەوەتی و کارای پەی تەسفیەو ڕۊحی شۊڕشگێڵنیی تاکی و ئەحزابی سیاسیی کوردستانی، ئیسفاڎەش چنە مکریۊ. پەوکای یۊگێرتەی گەلو کوردی بە خاستەرین ورچنیا و دەرفەتی ئاڵتوونی پێناسە کریا، کە متاوۊ سەرجەمو پیلان و تەرسەکاو سەرو گەلو کوردی پووچەڵ بکەرۊوە و زامنو ئازاڎیی گەلو کوردی و کوردستانی بۊ.

بنەیانەو بارزانی و حكومەتو هەرێمی بەشدارێنۍ جە  تەسفیەكەرڎەی پارتەكاو وەرکەوتی 

کۊنگرەنە تیشکە وزیا سەرو ئا تەرسا، کە ڕووبەڕوو گەلو کوردی بیێنێوە و ئاماژە دریا، کە داگیرکەراو کوردستانی بە دەسوەڵیوزیی هەردووە دەوڵەتی داگیركەرو ئێرانی و توركیای بە هامکاریی بنەیانەو بارزانی هەوڵۍ مدانۍ جمیەری ئازاڎیوازو کوردستانی تەسفیە بکەرا و کوردی بێپارێزنای بازاوە. پیلانەکۍ بەگردی سەرو جمیەرو ئازاڎیی کوردستانی و بەتایبەت پەی و لاوازکەرڎەی و تەسلیمورگێرتەی ئێراڎەی نەبەز و پۊلاینو پەژاكی، کە بە پاو ئانەیە پەژاک کۊشیای وێش قەوەتتەر مکەرۊ.

پەوکای ئاماژە پا ئەگەرا کریا، کە ئیساتۍ هامپەیمانی تورکین  و ئێران و پیلانەی هامبەشەشا دژو تەڤگەری ئازاڎیوازو کوردستانی ئینا ئارانە. ڕژێمو ئێرانی سەرقاڵو ئانەینە کە پارت و لایەنە سیاسییەکاو وەرکەوتو کوردستانی بە شێوازێوی سیاسی - دیپڵۊماتیک بێکاریگەر بکەرۊ و پەی ئا پڕۊژەیچە جە پێوەندیینە چەنی حکومەتو هەرێمی و بەتایبەت بنەیانەو بارزانی گەرەکشا بوزۊش بوارو بەیاگەیاونایۊ. 

سیاسەتەکاو دەوڵەتی فاشیستی و دەوڵەتی تورکیایچ ئاماژەشا پنە دریا، کە ئا ڕژێمە پا مگێرۊرە سەرو قڕکەرڎەی گەلو کوردی و ئامانجو تورکیایچ دژایەتیین دژو گردو دەستکەوتاو گەلو کوردی جە سەرجەمو بەشەکاو کوردستانینە. پەوکای ڕوانە دەوڵەتی فاشیستو تورکیای بە درۊنۍ هجووم مکەرۊ سەرو هێزەکاو پەژاکی و موازۊ خزمەتی ڕاستەوخۊو ئێرانی بکەرۊ و وەراوەرنە پەی لاوازکەرڎەی جمیەرو ئازاڎی بە شێوازێوی جیاواز هەمئاهەنگییشا هەن. هامکاری و دژایەتیی تورکیای و ئێرانی سەرو پەرسەو کوردی تاریخو گەلەکەیمانە شاریاوە نییا و تاقی کریانۊ و بەگردو هێزیشاوە دژو هەر جۊرە مافێوی دیموكراتیكینۍ پەی گەلو کوردی.

پەژاک پەی چارەسەرو پەرسەو کوردی وەرکەوتو کوردستانینە ساعیبو پڕۊژە و بەرنامەی تایبەتین

کۊنگرەنە سەرو دەور و وەرپەرسیی پەژاکی ورسەنگنای کریا، کە پێویسا پەژاک بە شێوازێوی قەوەتتەر خاوەندارێتی وەنەو شۊڕشو ژەنی، ژیوای، ئازاڎی بکەرۊ، کە سەرچەمەو شۊڕشەکەین سەرو بنەماو هزرو رابەر ئاپۊی بەرپا بییەن. تا نرخە و بەهاکاو شۊڕشی پارێزیۍ با، پەژاک وەشکەرڎەی بەرەی دیمۊکراتیکو گەلا و یۊبییەی و یەکڕیزیی گەلو کوردی مکەرۊ ئامانجو کۊشیای و پاسە  ئاستو کۊشیای وێش قەوەتتەر مکەرۊ. هاموەخت پەی ئازاڎیی کوردستان و دیمۊکراتیزەکەرڎەی ئێرانی پەرە بە کۊشیای ڕەواو وێش مدۊ.

پەوکای پەژاک پڕۊژە و بەرنامەی تایبەتی پەی چارەسەرو پەرسەو کوردی و دیمۊکراتیزەکەرڎەی ئێرانی بۊ و بە پڕۊژەی وێڕاوەبەری و کۊنفیدڕالیزمی دیمۊکراتیکی، گەرەکشا سەرجەمو پەرسە کەڵەکەکریایەکا دلۍ ئێرانی چارەسەر بکەرۊ و سەرو ئەساسو وێڕاوەبەری دیمۊکراتیکی، ئا گەلۍ وێشا ڕێک بوزانێ. تا پاراڎایمو ئازاڎیی سنوورەکا دەرباز بکەرۊ. گرنگا کۊشیای بکریۊ کە فکر و فەلسەفەی ئاپۊیی بوارو ئایدئۊلۊژیکیوە بیاوۊ گردو بەشەکای تەرو ئێرانی و نەتەوەکای تەرو ئێرانی بە ئایدئۊلۊژیی ئاپۊیی ئاشنۍ با و وێشا  چی چوارچوەنە ڕێکۍ بوزا.

پەوکای کۊنگرەنە تیشکە وزیا سەرو ئانەیە کە؛ ئی کۊنگرەیە، کۊنگرەو فاڕیای و هاموەخت بۊ بە هەنگامێوی قەوەتە پەی وێیاونای پەی دلۍ جەماوەرو ەرکەوتو ئێرانی.

هاموەخت کۊنگرەنە تیشکە وزیا سەرو  دەور و  وەرپەرسیی گەنجا و ئاماژە  پانەیە دریا، کە گەنجۍ دینەمۊو بەگەڕوستەی گلێرگەین و جمنەرو ڕۊحی شۊڕشگێڵنی و ڕاڎیکالیزمین. گەنجۍ پێویسا بە شێوازێوی بەهێز و جەماوەرییانە وێشا ڕێکۍ بوزانۍ و ئیسفاڎە چا ماتەوزە وەرفراوانەو گەنجا وەرکەوتی وربگێرا. تا گەنجاو وەرکەوتی كاناڵیزەو خەباتو جمیەرو ئازاڎییوەرکەوتی با و سەرو پاراڎایمو ڕابەر ئاپۊی خەباتەکەیشا بۊ بە ناوەند و مۊتۊڕو ڕۊحی شۊڕشگێڵنی و کۊشیای بە دژو دیکتاتۊری و داگیرکاری. قەوەتبییەی گەنجا وەرکەوتو کوردستانینە ماناو قەوەتبییەی گردو خەباتو جمیەری ئازاڎیوازیین.

بەشێوی تەرو کۊنگرەینە تیشکە وزیا سەروهەرمانە و خەباتی میدیایی، کە مبۊ جە بوارو ئەرەیاوناینە، سەرو وەشکەرڎەی ئەرەیاوناێوە قەوەت بكریۊ و ئەرەیاونای بەرڎەوام پێویسییش بە وێتازەکەرڎەیۊن و چەنی ڕەوتو وەڵیکەوتەی تەکنۊلۊژیی ئیسفاڎە جە ئامێر و تەکنیکی تازەو سەرڎەمی بگێرا.

هەرپاسە سەبارەت بە هەرمانە و خەباتو چاند و هونەرییچ ئاماژە پانەیە دریان، کە بەشو کولتورو چاندی و موسێقای وردتەر بۊوە و شناساێوە بنگەهی و جەوهەرییش بۊ، تارێخو مۊسیقای و کولتوور و چاندو وەرکەوتو کوردستانی و بە شێوازێوی زانستیانە پەی ئی بوارەیە پلانە و بەرنامەو وێش برەو پەنە مدۊ.

بەشێوی تەرو ورسەنگنای کۊنگرەینە تیشك وزیا سەرو هێزو پارێزنای ڕەوا و ئاماژە پانەیە دریا؛ ستونێوی بەهێزو حەرەکەتو ئازاڎی، هێزو پارێزنای ڕەواین. ئا بەشە جە خەباتو ئێمەنە ئەرکێوی تارێخی سەرو شانەین و بڕۍ قۊناخۍ هەستیارێنە و دیرۊکیینە متاوۊ هەرمانەو سەرو شانەو وێش بە شێوازێوە بەرۊ ڕاوە، کە بۊ بە هێز و پەشتیوانیی پەی  بەشەكای تەرو ڕێكوستەی. هاموەخت پێویسا پارێزنای ڕەوا، ڕێکوستەی وێش بە شێوازی جیاواز دلۍ گەلینە وەش بکەرۊ و وەختی پێویسنە ئی بەشە، چالاکانە هەرمانەکاو وێش پۊڕنۊ.

کۊنگرەنە سەرو هەرمانە و خەباتو پەژاکی ئەوروپایچنە هەڵوەستە کریا و ئاماژە پانەیە دریا، کە خەباتو ئەورووپای پارچێوە جە ڕێکوستەی پەژاکی و ئانەیچ زەمینێوی تازە و پەشتیوانیێوی کاراو ئا حەرەکەتەیە، پەوکای پێویسا گرنگیی بە خەباتو هەندرانی بدریۊ و بۊ بە پەشتیوانی و تەمامكەرو خەباتو دلۍ وەڵاتی. پەژاک هەندراننە پێویسا بە جیددی سەرو خەباتی پەروەرڎەی بکەرۊ و سەرو ڕێکوستەی جەوانا هەرمانە بکەرۊ و پەروەرڎەی تایبەت بە جەوانا ئەولەویەتینە بۊ. هاموەخت هەوڵۍ رێکوستەی سەرجەمو ئا گەنج و ژەنا بدۊ کە ڕووەشا کەردێنە هەندەران.

هامسەرۊك و ئەنداماو مەجلیسو پەژاكی فاڕیۍ

دماو واتەواچێویی تێروتەسەلی و سەرو قەرارو ئەرەسپارڎەیەکا و ئەرێكەرڎەی پەیڕەو و پڕۊگرامو كۊنگرەی وەڵینی و كۊنگرەی حەوتەمی و ورچنیەی هامسەرۊكایەتیی تازەو هامڕایا "ئەمیر کەریمی و پەیمان ڤیان"ی و ئەنداماو مەجلیسی تازەو كۊنگرەینە ورچنیۍ و قسۍ دمایی کۊنگرەی لاو هامسەرۊکی تازەو  پەژاکی هامڕا"پەیمان ڤیان" پێشکەش کریا و کۊنگرەکە بە کۊنگرێوی سەرکەوتەش بە نامـێوە کەرد، کە جە قۊناخێوی هەستیاری تارێخیینە کریا و کۊنگرەش جە ڕابەر ئاپۊی، بنەیانەو گەشمەردا و هامڕۍ و گەلو کوردی وەرکەوتو کوردستانینە و سەرجەمو گەلاو ئێرانینە و هامڕایا مەبارەک کەرد و وەعدو ئانەیش دا کە بە گردو هێز و توانایشاوە پەی بەیاگەیاونای سەرجەم قەرار و بەرنامەکاو کۊنگرەی حەوتەمو پەژاکی کۊشیا.

کۊنگرە بە دروشمو "بژیوۊ ڕابەر ئاپۊ"ی، "بۍ ڕابەری ژیوای نمەبۊ"، "گەشمەردۍ نمەمرا" و "ژەنی، ژیوای، ئازاڎی" دماییش ئاما.