ئەندامانی یەکێتی ژنانی گەنج ڤیان کۆبانێ، نوژیان ئۆجالان و رۆژین ئەحمەد عیسا و ئەندامانی بزوتنەوەی گەنجانی شۆڕشگێڕی سوریا وەلید محەمەد مەنال، مەعروف خەلیل ئیبراهیم و مەسعود ئیبراهیم ٢ ساڵ بەر لە ئێستا لە هێرشی ئاسمانی دەوڵەتی تورکی داگیرکەر لە دژی ناوەندەکەیان لە کۆبانێ شەهیدبوون.

بەبۆنەی دووەم ساڵیادی شەهیدبوونیان بە سەدان کوڕ و کچی گەنج لە ناوچەی قنێ رژانە گۆڕەپانەکان و بێ پسانەوە دروشمی وەفاداری و تۆڵەسەندنەوەیان وتەوە.

رێپێوانەکە لە ناوەندی ناوچەی قنێ دەستیپێکرد و تا رێگەی گوندی قاسم بەردەوام بوو.

دوای رێپێوانەکە بۆ رێزگرتن لە یادی شەهیدان یەک خولەک بە بێدەنگی وەستان. ئەندامی یەکێتی ژنانی گەنجی ناوچەی قنێ نەزمیە محەمەد قسەی کرد و رایگەیاند، "بەڵێن دەدەین کە درێژەپێدەری رێگەی شەهیدان بین".

نەزمیە محەمەد رایگەیاند کە دەوڵەتی تورک لە هێزی ژنان و گەنجان دەترسێت، هەربۆیە هێرشیان دەکاتە سەر و وتی، "تا کەسایەتی وەک ڤیان و نوژیان هەبن ئێمە سەردەکەوین. تا دوا دڵۆپی خوێنمان لەسەر رێگەی شەهیدانمان خۆڕاگری دەکەین و تێدەکۆشین. جگەلەوە هیچ رێگەیەکی دیکەمان نییە".

چالاکی یادکردنەوەکە بە وتنەوەی چەندین دروشم کۆتایی هات.

هـ . ب