نوێنەری ڕێکخراوەکان لەبەردەم کۆنسەی ئەوروپا کۆبوونەوە، دژی هێرشی قڕکردنی سەر عەلەوییەکان ڕێکخراویان خوێندەوە و داویان لە ڕێکخراوە نێونەتەوەییەکان کرد هەڵوێست وەربگرن.

کۆنفیدراسیۆنی کۆمەڵەی عەلەوییەکانی ئەوروپا (AABK) و فیدراسیۆنی عەلەوییە عەرەبەکانی ئەوروپا (AAAF) و فیدراسیۆنی عەلەوییە دیموکراتیکەکان (فەدا) و چەندین ڕێکخراوی تر بەشداربوون.

ڕاگەیاندراوەکە بە زمانەکانی کوردی و تورکی و عەرەبی و فەرەنسی و ئەڵمانی خوێنرایەوە و تیشک خرایە سەر کۆمەڵکوژی سەر عەلەوییەکان.

لە ڕاگەیاندراوەکەدا تیشک دەخرێتە سەر هەڵوێستی هێزە ئەوروپی و ئیمپریالیستەکان لە ڕۆژهەڵاتی ناوین، لەپاش ڕووخانی دیکتاتۆرییەت لە سوریا، خەریکە دیسانەوە دیکتاتۆرییەتێکی نوێ لە سوریا دادەمەزرێنن، گوتراوە: "دەیانەوێت سەرچاوەکانی سەر زەوی و ژێر زەوی ئەو وڵاتانە بخەنە ژێر کۆنتڕۆڵی خۆیانەوە، کورد و عەلەوی و ئێزدی و سریانییەکان لە ڕۆژهەڵاتی ناوین بدەن بە گژی یەکدا. ئێمە پشتگیری گەلانی بندەست دەکەین".

لە ڕاگەیاندراوەکەدا جەختکرایەوە هەبوون و سەلامەتی عەلەوییەکانی سوریا لە مەترسیدایە، داخوازی ڕێکخراوە عەلەوییەکان وەها ڕیزکراوە:

"١- مافی ژیان و ئازادیی پەرستن:

پێویستە مافی ژیان و ئازادی پەرستنی هەموو گروپ و بیروباوەڕێکی ئایینی مسۆگەر بکرێت؛ هەموو پێکهاتە و باوەڕەکان بە گوێرەی دەستوورێکی دیموکراتیک و ئازادیخواز و سیکۆلار بپارێزرێن.

٢- شەرمەزاری و سزا:

پێویستە قسەی ڕق و کینەئامێز بەرامبەر بە مەزهەبەکان، بە ڕوونی لەلایەن ڕێکخراوە نێونەتەوەییەکانەوە شەرمەزار بکرێت و سزا بەسەر ئەو گروپانەدا بسەپێنرێت کە ئەم پڕوپاگەندانە بڵاودەکەنەوە.

٣- پاراستنی شوێنە پیرۆزەکان:

پێویستە شوێنە پیرۆزەکان بپارێزرێن و گەڕانەوەی سەلامەتی ئەو کەسانەی کە بە زۆر لە شوێنەکانیان دەرکراون مسۆگەر بکرێت و ئەوانەی بەرپرسیارن لە پێشێلکردنی مافەکانی مرۆڤ لە دادگا سەربەخۆکاندا دادگایی بکرێن.

٤- چاودێری و گەرەنتی نەتەوە یەکگرتووەکان:

پێویستە نەتەوە یەکگرتووەکان و کۆنسەی ئەوروپا گەرەنتی سەقامگیری سوریا بکەن و چاودێری حکومەت بکەن و هەلومەرجی پێویست بۆ هەڵبژاردنی دادپەروەرانە و دیموکراتیک بڕەخسێنن.

٥- پەیوەندی لەگەڵ هێزە ڕادیکاڵەکان بپچڕێنرێت:

پێویستە یەکێتی ئەوروپا تاوانە نامرۆڤانەکانی هەتەشە و گرووپە ڕادیکاڵەکانی تر شەرمەزار بکات و پەیوەندی لەگەڵ ئەو گرووپانە بپچڕێنێت.

٦- پتەوکردنی مافی کەمەنەتەوەییەکان:

پێویستە هەموو کەمەنەتەوەییەکان و بەتایبەت عەلەوی و کورد، ئازادانە گوزارشت لە ناسنامەیان بکەن، بە زمانی خۆیان پەروەردە ببینن و مافی خۆبەڕێوەبردنیان هەبێت.

بانگەواز لە هێزە ئاشتیخوازەکانی نەتەوەیەکگرتووەکان دەکەین لەو هەرێمانەی سوریا نیشتەجێ ببن کە کۆمەڵکوژی تێدا ئەنجام دەدرێت، ئەرکی خۆیان جێبەجێ بکەن بۆ وەستاندنی ئەم هێرشانە".