کۆردیناسیۆنی جڤاکی ئێزدی لە ئەوروپا (کەجەئێ-ئە) بەناوی ڕێکخراوە ئێزدییەکانی ئەوروپاوە ڕاگەیاندراوێکی بڵاوکردەوە پەیوەست بە کۆنفرانسی ١٨ ی کانوونی دووەمی پەرلەمانی هەرێمی ڕاینی باکوور-وێستفالیا کە بە ناونیشانی "سەرلەنوێ کارکردن و ڕێککەوتن" و بەبەشداری پەدەکە ئەنجام دەدرێت.

ڕاگەیاندراوە هاوبەشەکە بە ناونیشانی "تا ڕێککەوتنێکی دروست و دڵخواز نەبێ، ڕێککەوتن نابێت" بڵاوکرایەوە.

لە ڕاگەیاندراوەکە ئاماژەکراوە بە بەرپرسیارێتی پەدەکە و بەتایبەت بنەماڵەی بارزانی و حکومەتی ناوەندی عێراق لە فەرمانی سەر ئێزدییەکان، هەروەها هەردوولایان بۆ ئێزدییەکان هیچیان نەکردووە، بەپێچەوانەی کاری ئەرێنی، کاری نەرێنیان ئەنجامداوە.

دەربارەی ئەم پرسە ڕێککەوتنی ٩ ی تشرینی دووەمی ٢٠٢٠ وەک نموونە هێنراوەتەوە لەنێوان بەغدا و هەولێر و ئەنقەرە کە بەبێ ئیرادەی ئێزدییەکان دەربارەی شەنگال ئامادەکرا.

ئاماژە بەوە کراوە، پەدەکە لە کۆنفرانسەکە بەشدارە، بۆیە پەدەکە مۆری خۆی لە کۆنفرانسەکە دەدات و ناچێتە خزمەتی بەرژەوەندی جڤاکی ئێزدییەوە.

بەمەش هەڵوێست نیشاندرا و گوتراوە: "ئێمە بەشداری کۆنفرانسەکە نابین و پشتگیری لە پرۆژەکە ناکەین".  

ڕێکخراوەکان ٦ داخوازی خۆیان وەها نیشانداوە:

- دانپیانانی ئیدارەی خۆبەڕێوەبەری شەنگال.

- دانپیانانی فەرمی بە قڕکردنەکە.

-دادگایی کردنی بەرپرسیارانی قڕکردنەکە. بەتایبەت بەرپرسانی پەدەکە بەهۆی پاشەکشەکردن بە پێشمەرگە سەروەختی هێرشی داعش.

- هەڵدانەوەی هەموو گۆڕە بەکۆمەڵەکان.

- هەڵوەشاندنەوەی ڕێککەوتنی ٩ ی تشرینی دووەمی ٢٠٢٠.

- ئاوەدانکردنەوە و گەڕانەوەی ئاوارەکانی شەنگال.

ئەو گرووپانەی واژۆی ڕاگەیاندراوەکەیان کردووە

- ناوەندی یەکێتی کۆمەڵەی ئێزیدیان.

- چەتری مەجلیسی ژنانی ئێزدی.

- پارتی ئازادی و دیموکراسی ئێزدیان.

- مەجلیسی شەنگال لە دەرەوەی وڵات.

- هاوپەیمانی ئێزدییەکانی سوریا.

- یەکێتی گەنجانی ئێزدی.

- ناوەندی چاندی ئێزیدخان.

- چەتری مەجلیسی گوندە ئێزدییەکان.