کۆنسەی بەڕێوەبەری کەنەکە بەبۆنەی کۆچی دوایی دۆستی کوردان ئێرلینگ فۆلکڤۆرد پەیامی سەرەخۆشی بڵاوکردەوە و دەڵێت: "ئێمە هەردەم دۆست و هەڤاڵ و پەیامبەری ئاشتیمان، ئێرلینگ فۆلکڤۆرد لە تێکۆشانی خۆماندا بەزیندوویی دەهێڵینەوە".
کۆنسەی بەڕێوەبەری کۆنگرەی نەتەوەیی کوردستان (کەنەکە) بەبۆنەی کۆچی دوایی دۆستی کوردان ئێرلینگ فۆلکڤۆرد کە ئەمڕۆ گیانی سپارد، پەیامی سەرەخۆشی بڵاوکردەوە.
کەنەکە ڕایگەیاند بە کۆچی دوایی دۆستی کورد و تێکۆشانی ئازادی کوردستان ئێرلینگ فۆلڤۆرد خەمگین بوون، جەخت دەکاتەوە فۆلکڤۆرد چەندین ساڵ بۆ ماف و ئازادی گەلانی بندەست و بەتایبەت کورد خەباتی کردووە، دەڵێت: "لە تەواوی کاری سیاسیدا، ئەو دەمەی جێگری سەرۆکی پارتی کۆمۆنیستی کرێکاری نەرویژ و پاشان ئەندامی پارتی سوور و هەروەها وەک پەرلەمانتاری پێشووی شارەوانی ئۆسلۆ، پشتگیری لە تێکۆشانی ئازادی گەلەکەمان کردووە. بەم بۆنەیەوە دەیان جار چووەتە شوێنە جیاجیاکانی کوردستان، سێ کتێب و دەیان وتاری دەربارەی دۆزی کوردستان نوسی و بووبە پەیامبەرێکی بەسۆز بۆ گەیاندنی تێکۆشانی گەلی کورد بە تەواوی جیهان و بەتایبەت بە ڕای گشتی نەرویژ.
بەبۆنەی کۆچی دوایی دۆست و خەباتکاری گەلی کورد و فەڵەستین و هەموو گەلانی بندەست، ئێرلینگ فۆلڤۆرد، سەرەخۆشی لە بنەماڵە هێژاکەی و پارتەکەی و تەواوی دۆستانی دەکەین.
ئێمە هەڤاڵ و دۆست و پەیامبەری ئاشتی و دیموکراسی ئێرلینگ فۆلکڤۆرد لە تێکۆشانی خۆماندا زیندوو دەهێڵینەوە. جێگەی بەهەشت بێت".
