هاوسەرۆکی کۆمەڵەی مافی مرۆڤ (ئیهەدە) حسێن کوچوکباڵابان رایگەیاند، "تۆ لەگەڵ کێدا شەڕ بکەیت، دەبێت تۆ لەگەڵ ئەو دا دیدار ئەنجام بدەیت" و بەم جۆرە لەبارەی گۆشەگیرییەوە درێژەی بە قسەکانیدا، "بێگومان ئێمە دەزانین کە ئەو بابەتە تەنیا رێگرییکردنی لە دیداری نێوان مرۆڤێک لەگەڵ پارێزەران و بنەماڵەکەی نییە.

حسێن کوچوکباڵابان لەبارەی گۆشەگیری و مانگرتن لە خواردنی زیندانیان قسەی بۆ ئاژانسەکەمان کرد.

دەوڵەت ئاگاداری کاریگەری ئەوە

کوچوکباڵابان ئەوەی خستەڕوو، کە لە ساڵی ٢٠١٩ەوە رێگە بە عەبدوڵا ئۆجالان و هاوڕێکانی لە زیندانی ئیمراڵی نادرێت چاویان بە بنەماڵە و پارێزەرانیان بکەوێت و ئەمەش لە رووی مافەکانی مرۆڤەوە کێشەیەکی بەرچاوە. زیندانی ئیمراڵی زیندانێکی تایبەتە و ئیدارەیەکی تایبەتی هەیە و ئەو کەسەشی لەوێ زیندانی کراوە لە چارەسەری دیموکراتیکی پرسی کورددا خاوەن کاریگەرییەکی زۆرە. عەبدوڵا ئۆجالان کاراکتەرێکی گرنگە. لە پرسی کورد هەم لە پرسی چارەسەر دیموکراتیکدا هەمیش لەسەر رێکخستنی چەکداری و گەلی کورد کاریگەری هەیە و دەوڵەتیش بەو کاریگەرییە دەزانێت".

چاوەڕێین کە رێگە بە ئەنجامدانی دیدار بدرێت

کوچوکباڵابان بەبیری هێنایەوە کە لە ٢٧ی تشرینی دووەم/نۆڤەمبرەوە لە زیندانەکاندا مانگرتن لە خواردن دەستیپێکردووە و ئەوەی خستەڕوو، کە بۆ ئەوەی ئەو مانگرتنە دەرەنجامی قورس و خراپی نەبێت دەبێت، رێگە بە ئەنجامدانی دیدار بدرێت و وتی، "ساڵی ٢٠١٢ رووداوی هاوشێوە روویاندا، ئەو کاتە دیدارێک سازدرا و ساڵی ٢٠١٣ دەست بە پرۆسەی ئاشتی کرا کە تا ساڵی ٢٠١٥ بەردەوام بوو. لە سآڵی ٢٠١٦شەوە کە باری نائاسایی راگەیەندرا و سەرباری ئەوەی ٢٠١٨ کۆتاییپێهات، بەڵام مامەڵە و کردەوەکانی تائێستاش بەردەوامن و لە پرسی ئازادی رامان، ئازادی راگەیاندن، قەدەغەکردنی چالاکی، راگەیاندنی هەرێمەکان وەک هەرێمی ئەمنی ئەوە روودەدات و لە بابەتی دادگا و دەسەڵاتی دادوەری و قوتارکردن لە سزا ئەو دۆخە بەردەوامە و وەک ئیهەدە پێمان وایە، کە گۆشەگیری لە ئیمراڵیش بابەتێکی پەیوەست بەو دۆخەیە".

روونیشی کردەوە، راستەوخۆ دوای ٢٧ی تشرینی دووەم و دەستپێکردنی مانگرتن لە خواردنی زیندانیان سەردانی وەزارەتی دادیان کردووە و داوایان کردووە کە بۆ ئاگاداربوون لە دۆخی ئیمراڵی و ئەوەی کە لەوێ چیی روودەدات، بەتایبەتی کە ماوەی ٣٣ مانگە رێگە نادرێت چوار سزادراوی ئەو زیندانە چاویان بە پارێزەران و بنەماڵەکانیان بکەوێت.

کوچوکباڵابان ئاماژەی بەوەشکرد، کە تائێستا وەزارەتی داد وەڵامی نەداونەتەوە و هیواشی خواست کە بەر لەوەی بە هۆی مانگرتنەوە زیندانیانی مانگرتوو رووبەڕووی لێکەوتەی نەرێنی ببنەوە، وەزارەتی داد رێگە بدات بە سەردانی بنەماڵە و پاڕێزەران بۆ ئیمراڵی.

زیاتر لە ٤٠ هەزار مرۆڤ کوژراون

کوچوکباڵابان داوای کرد دەوڵەت لە پرسی کورددا پەنا بۆ رێگە چارە دیموکراتیکەکان ببات و رایگەیاند، لە دوای کۆتاییهاتنی پرۆسەی چارەسەری واتە لە دوای ٢٠١٥ەوە بە گوێرەی ئامارەکانی وەزارەتی بەرگریی تورکیا زیاتر لە ٤٠ هەزار کەس کوژراون. ئەمەش لە کاتێکدا کە لە نێوان ساڵانی ٢٠١٣- ٢٠١٥ کەس نەکوژرابوو.

بەرامبەر کێ شەڕ بکەیت، دەبێت هەر لەگەڵ ئەویشدا دانوستان بکەین

کوچوکباڵابان سەرنجی راکێشا بۆ سەر تێچووی ئابووری شەڕ و هەر وەها زیانەکانی ئەو شەڕە بۆ سەر ئاشتی کۆمەڵایەتی و ژیانی دیموکراتیک لە وڵاتەکە و وتی: "ئێمە دەڵێین کە لە گەڵ عەبدوڵا ئۆجالان دیدار کرا، لەسەر پرسی کورد گفتوگۆی لەگەڵ ئەنجمادرا و وتی، کە بۆ چارەسەری دیموکراتیک ئامادەیە. تورکیا لەمە زیانی بەرناکەوێت، بەپێچەوانەوە سودمەند دەبێت. ئاشتی کۆمەڵایەتی قازانج دەکات و پێویست بە هێشتنەوەی سەربازەکانی لە عێراق و سوریا نییە. دەکرێت کێشەکە بە دیالۆگ و دانوستان چارەسەر بکرێت. تۆ لەگەڵ کێدا شەڕ بکەیت، دەبێت لەگەڵ ئەویشدا دانوستان بکەین. بێگومان دەزانین کە بابەتی گۆشەگیری تەنیا بابەتی رێگریی لە ئەنجامدانی دیداری کەسێک لەگەڵ بنەماڵە و پاڕێزەرانی نییە".

هـ . ب