لە چوارچێوەی ناساندنی کتێبەکانی ڕێبەری گەلی کورد عەبدوڵا ئۆجالان کە لە زیندانی ئیمراڵی نوسراون، کەمپەینی ڕۆژانی خوێندنەوەی کتێبەکان لە سویسرا بەردەوامە.

کەمپەینەکە لەسەر بناغەی فەلسەفەی "ئەو ڕامانانەی کە زیندانەکان هەڵدەوەشێننەوە" و "ئەو ڕامانانەی سنووردار ناکرێن" لە سەدان ناوەندی جیهان دەستی پێ کرد، پاش شارەکانی ژنێڤ و بازل و زیوریخ و بێرنی سویسرا، لە شاری بێلینزۆنا بەردەوام بوو.

چەندین پارتی سیاسی و ڕێکخراوی شۆڕشگێڕ و ڕێکخراوی مەدەنی و کوردستانی بەشداری چالاکییەکە بوون.

پاش نیشاندانی فیلمی کۆبانێ، لە چالاکییەکەدا پێشکەشکردنێک ئەنجامدرا.

پزیشک و ئەندامی ڕاوێژکاری پەرلەمانی نێونەتەوەیی، هەروەها سەرۆکی کۆمەڵەی بوژاندنەوەی کۆبانێ، دکتۆر فرانکۆ جاڤالی، ڕایگەیاند بۆ ئەوەی ئازادی جەستەیی ڕێبەری گەلی کورد عەبدوڵا ئۆجالان بەدی بێت و ڕامانەکانی بگاتە تەواوی مرۆڤایەتی پێویستە خەباتی بەردەوام بکرێت.

جاڤالی گوتی: "مسۆگەرکردنی ئازادی هاوڕێ ئۆجالان بۆ ئێمە کاری سەرەکی و بنەڕەتییە".

دەستنیشانکرا، بۆ ئەوەی گەل بگاتە دیموکراسی پێویستە مۆدێلی ژیانی ئازادیخوازی ژن و ئیکۆلۆژی کە ئەمڕۆ لەڕێگەی فەلسەفەی ڕێبەری گەلی کورد عەبدوڵا ئۆجالانەوە لە ڕۆژئاوا پێکهاتووە، زیاتر بەرفراوان بکرێت.

چالاکییەکە بە خوێندنەوەی کتێبەکانی ڕێبەری گەلی کورد عەبدوڵا ئۆجالان بەردەوام بوو.