لە چوارچێوەی کەمپەینی "١٠٠ هۆکار بۆ دادگایکردنی دیکتاتۆر"، کە لەلایەن بزووتنەوەى ژنانی کورد (تەژا) بەڕێوەدەبرێت، لە شاری هامبورگی ئەڵمانیا ستاند دانرا و سەدان ئیمزا بۆ ئەو کەمپەینە کۆکرایەوە.

ئەو چالاکییە لەلایەن پێکهاتەکانی ئەنجومەنی ژنانی رۆژبین لە هامبورگ لە گەڕەکی ئاڵتۆنا رێکخرا و داواکرا، ئەردۆغان لە دادگای نێونەتەوەیی دادگایی بکرێت. هەروەها زیندانیکردنی لەیلای گیوڤەن هاوسەرۆکی کۆنگرەی کۆمەڵگەى دیموکراتیک (کەجەدە)یان ئیدانە کرد.

لە چالاکییەکەدا راگەیاندراو بەسەر هاووڵاتییاندا دابەشکرا. ئانجا فلاچ داکۆکیکاری مافەکانی مرۆڤ و نووسەر لە چالاکییەکەیدا وتەیەکی پێشکەشکرد و رایگەیاند، هەموو داواکانی بەرگریکردن لە لەیلا گیوڤەن و داواکانی ئازادکردنی گیوڤەن، داوای ئەوانیشە و وتی، "بەرخودانی لەیلا گیوڤەن نمونەیە بۆ هەموو ژنانی شۆڕشگێڕی جیهان".

هاوکات لە شاری کۆپنهاگی پایتەختی دانیمارک بۆ هەمان مەبەست لەلایەن ئەنجومەنی ژنانی سێڤێ-ەوە چالاکییەک رێکخرا.

چالاکییەکە لە چوارچێوەی کەمپەینی ئیمزاکۆکردنەوەدا بەڕێوەچوو و تیایدا داوا کرا، لەیلا گیوڤەن و هەموو زیندانیانی سیاسی ئازاد بکرێن.

ئەنجوومەنی ژنانی سێڤێ داوایان لە هەموو کۆمەڵگەى نێونەتوەیی کرد، کە هۆشیار و هەستیار بن و بۆ ئازادیی زیندانیانی سیاسی و دادگایکردنی دیکتاتۆر دەستبەکار بن.

ژ.ت