سری سورەیا ئۆندەر یەک لە ئەندامانی شاندەکەی دەم پارتی لە دوای چاوپێکەوتن لەگەڵ داودئۆغلۆدا وتی، "کاتێک سەردانی سەڵاحەدین دەمیرتاشمان کرد، ئەوکات ڕاگەیاندراوێکی بەرفراوان دەدەین."
لە چوارچێوەی سەردان و کۆبوونەوەکانیاندا ئەمڕۆ شاندەکەی دەم پارتی لەگەڵ سەرۆکی گشتی پارتی ئایندە، ئەحمەد داودئۆغلۆدا کۆبوونەوە.
ئۆندەر کە ئەندامێکی شاندەکەیە لە دوای کۆبوونەوەکەوە قسەیکرد و وتی: "هەندێک باسی ئەزموونەکانی پێشومان کرد. لە چوارچێوەی کۆبوونەوەکەدا زانیارییمان لەگەڵیاندا گۆڕییەوە. داوای پێشنیار، تێبینی، ڕەخنە و هۆشدارییمان لێ کردن. ئەوانیش بە وردی زانیاری و هۆشیارییان پێداین. لە دوای چاوپێکەوتنمان لەگەڵ سەڵاحەدین دەمیرتاشدا ڕاگەیاندراوێکی بەرفراوان دەدەین."
داودئۆغۆلۆیش سوپاسی سەردانیکردنی شاندەکەی کرد و وتی: "کۆبوونەوەیەکی گەرموگوڕ بوو. بیر و ڕا و روانگەکانی خۆمانمان هاوبەش کرد و جەختمان لەوەکردەوە سوود لە ئەزموونەکانی پێشوو وەربگرین. باسمان لەوەکرد لە سەرانسەری جیهان، هەرێمەکە، سووریا، عێراق، لوبنان و ئوردن گۆڕانکاری خێرا و لە ناکاو ڕوودەدەن و سەرنجمان خستەسەر گرنگی دۆخی ناوخۆ. باشترکردنی دۆخی ناوخۆیش تەنها بە دیموکراسی دێتەئاراوە. ئەمەش بە دیدگایەکەوە دەکرێت کە کورد، تورک و هەموو هاوڵاتییان بە ئومێدەوە سەیری داهاتوو بکەن. پێشنیارم بۆ شاندەکە و هەموو سیاسییەکان ئەوەیە لە بەرانبەر ئەم قۆناغەدا بۆ بونیادنانی ئاشتی لە تورکیادا بجوڵێنەوە."
