لە بەرلین یادی سەید رەزا و هەڤاڵەکانى بەرز راگیرا
لە شاری بەرلینى پایتەختی ئەڵمانیا یادی ٨١هەمین ساڵیادی لەسێدارەدانی سەید رەزا و هەڤاڵەکانى کرایەوە و یادیان بەرز راگیرا.
لە شاری بەرلینى پایتەختی ئەڵمانیا یادی ٨١هەمین ساڵیادی لەسێدارەدانی سەید رەزا و هەڤاڵەکانى کرایەوە و یادیان بەرز راگیرا.
چالاکیى یادکردنەوەکە لەلایەن دەستپێشخەریى ئازادیى دێرسیمەوە رێکخرابوو و لە بەردەم باڵیۆزخانەى تورکیا لە بەرلین بەڕێوەچوو.
ناوەندی کۆمەڵگەى دیموکراتیکى کورد (نەجەدەکە - NCDK)، ئەنجوومەنى ژنانی (DEST-DAN) لە بەرلین، پەیەدە لە بەرلین، پارتی چەپ لە بەرلین و (AvEG-KON) پشتیوانییان لە چالاکییەکە کرد.
یەکێتیى دێرسیمییەکان لە ئەوروپا (ئادەف - ADEF) و ئەنجوومەنى سەرلەنوێ بونیادنانەوەى دێرسیم پەیامی پشتیوانیان بۆ چالاکییەکە ناردبوو.
دەستپێشخەریى ئازادیى دێرسیم لە چالاکییەکەدا راگەیاندراوێکى خوێندەوە و رایگەیاند، گەلی دێرسیم بەبێ چەک و پاراستن کۆمەڵکوژ و جینۆساید کراوە.
لە راگەیاندراوەکەدا ئاماژە بەوەشکراوە "دڵمان ئازاری هەیە، بەڵام سەربەرزین. ئێمە نەفرەت لەو زوڵمە، لەو بێویژدانییە و لەو نامەردییە دەکەین و ئیدانەیان دەکەین".
لە کۆتایى راگەیاندراوەکەدا ئەوەش خرابووە روو "بۆ ئەوەى سەید رەزا و هاوڕێکانیانمان لەبیر نەچێتەوە، هەموو کات یادیان بە بەرزی رادەگرین. ئێمە لە کوردستان، لە تورکیا، لە ئەوروپا و زۆر ناوچەى تری جیهان بە رێزەوە یادیان دەکەینەوە".
باقی سەلجوق نوێنەری (AvEG-KON) رایگەیاند، دەوڵەتى تورک بە شێوەیەکى بەرنامە بۆ داڕێژراو و بە یاسای تایبەت کوشتار و کۆمەڵکوژیی لە دژی گەلی دێرسیم ئەنجامدا.
سەلجوق راشیگەیاند "ئەوە سیاسەتى چۆڵکردن و وێرانکردنى دێرسیم بوو، کە ئامادە نەبوو سەر بۆ زوڵم دانەوێنێت. ئەو سیاسەتە هێشتا لە کوردستان بەردەوامیى هەیە".
ر.م