کوردستانیان لە شاری کارلستاد لە سوید چالاکییەکی پشتیوانیان بۆ مانگرتووان ئەنجامدا و سڤینیلیگ وتەبێژی پارتى چەپی سوید چووە شوێنى چالاکییەکە و وتەیەکی پێشکەشکرد و رایگەیاند، پشتیوانى لە چالاکوانانى مانگرتوو و جێبەجێکردنى داواکانیان دەکەین.
سڤینیلیگ راشیگەیاند، لە تورکیا پێشێلکردنى مافەکانى مرۆڤ و دیموکراسی زۆر زیادیکردووە.
وتیشی، چالاکیى مانگرتنى لەیلا گیوڤەن بۆ زۆر کەس بووەتە ئیلهام و نزیکەى ٣٥٠ زیندانیى سیاسی لە چالاکیى مانگرتن لە خواردندان.
ئەوەشی وت، پارتی چەپ بارودۆخی لەیلا گیوڤەن و چالاکوانانى مانگرتووى کردووەتە رۆژەڤی پەرلەمانی سوید و پەیامى پشتیوانیشی بۆ چالاکوانە مانگرتووەکان خستەڕوو.
لەیلا گیوڤەن بۆ نەهیشتنى گۆشەگیریى سەر عەبدوڵا ئۆجالان رێبەری گەلی کورد ماوەى ٨٧ رۆژە لە چالاکیى مانگرتندایە. بۆ پشتیوانیکردن لە لەیلا گیوڤەن و داواکەشی ناسر یاگز لە شاری هەولێر ماوەی ٧٤ رۆژە لە چالاکیى مانگرتنى بێسنووردایە. نزیکەى ٣٥٠ زیندانیى سیاسی لە باکووری کوردستان و تورکیا لە چالاکیى مانگرتندان. لە شاری ستراسبۆرگی فەرەنساش ١٤ چالاکوان پێکەوە ماوەی ٤٨ رۆژە لە چالاکیى مانگرتندان. لە وێڵزیش چالاکیى مانگرتن لە ٤٨هەمین رۆژدایە. مانگرتن لە ئەڵمانیا، کانادا، نەمسا و هۆڵەندا، شەنگال، سلێمانی و مەخموریش بەڕێوەدەچێت.
مانگرتووەکان رایانگەیاندووە، تاوەکو گۆشەگیریى سەر عەبدوڵا ئۆجالان کۆتایی پێنەهێنرێت و هەلومەرجی کاری ئازادانە بۆ ئۆجالان نەڕەخسێنرێت بەردەوام دەبن لە مانگرتنەکەیان.
ر.م