پلاتفۆرمی یارسان بە بۆنەی ٤٠هەمین ساڵی فەرمانەکەی خومەینی لەدژی گەلی ڕۆژهەڵاتی کوردستان بەیاننامەیەکی بڵاوکردوە . پلاتفۆرمی یارسان یادی هەموو قوربانیانی ئەو گەلەکۆمەیەی هێزەکانی ڕژیمی ئێرانی کردوە.

دەقی بەیاننامەکەی پلاتفۆرمی یارسان بە زاراوەی کوردیی خواریین"

لە چلەمین ساڵ هەڵمەتهاوردن ڕەژیم سێدارە وە کوردستان، لە یاد و هۊرمان هورموز گورجیبەیانی و یارەیلی ڕێز گریمن .

چل ساڵ پێش لە لەێوا ڕووژەیلێگ ڕووژهەڵات کوردستان ئاراێ خەبات و شەڕ ئنقڵابی لەناوەین هێزەیل دژەخەڵقی ڕەژیم سەرمایەداری ئسلامی و گورووپەیل شووڕشگەر خەڵق بۊ. ڕووژ ٢٧ گەلاوێژ (مورداد) لە حالێگ ک هازەیل کورد لە ناوچەێ هەورامان ئوستان کرماشان سەرکەفتنەیلێگ وە دەس هاوردۊن و داشتن پێشرەوی کردیان، ئایەتوڵڵا خومەینی ڕێبەر ئەوساێ کوومار ئسلامی فتواێگ دەربڕی و وە ئەرتەش و هازەیل نزامی فەرمان دا ک لە ماوەێ 2٤ ساعەت هەڵامات بارنە سەر شار پاوە و داگیری بکەن. وەدواێ ئەی فەرمان خومەینیە، سادق خەلخالی هات ئەڕای کوردستان و یەێراس هاتە پاوەێ کرماشان و دەسکرد وە کوومەڵکوژی خەڵق کورد. لە ڕووژ ٢٨ گەڵاوێژ چەن فەرمانبەر ڕەژیم سەرمایەداری ئسلامی لە شار کرماشان چینە دەر ماڵ موعەلم خەباتکار هەڤال هورموز گورجیبەیانی و وەبوونەێ «چەن پرسیار بۊچگ» وەل خوەیانا بردنەی. ساعەت ١:٤٠ شەو ئەو ڕووژە لە حاڵێگ ک نزیک وە نێوەڕووژێگ لە دەسوەسەرکردنی ویەریایۊ، لە زندان دیزڵ ئاباد کرماشان وەگەرد ١٠ هەڤال ئنقلابی کۆمۆنیست ترەک (ئەسغەر بێهبوود، حوسێن شەیبانی، موحەممەد عزەتی، موحەممەدجەعفەر عەزیزی، هووشەنگ عەزیزی، موزەفەر فەتاحی، موحەممەد مەحموودی، یەدوڵڵا مەحموودی، ئازەرنووش مەهدەویان، عەبدوڵڵا نۊری) گولەوارانی کردن و خەوەر ئێعدامی ئێعلام کردن. لە ١٠ ڕووژێگ ک سادق خەلخالی لە کوردستان بۊ، لانکەم ٥٨ کەس ئێعدام کرد ک وێنەیلێگ ک لەی ئێعدامەیل لە هەواڵنارییەل جهان بڵاو بۊ، ئەبعادێگ لەی جنایەتەیل ئاشکرا کرد و لە دنیا دەنگ کرد. لە ڕووژ ١١ شەهریوەر ١٣٥٨یش لە ئاوایی قاڕنا کوشتار گەوراێگ کریا ک لە ناوی ٦٨ کەس خەڵق ئەو ئاوایی کوومەڵکوژ کریان. هەلەێوا ٥٦ کەس لە ئاوایی قەڵاتان کوژەریان ک جنایەتێگ بێوێنە لە دیرووک ئێران و ڕووژهەڵات بۊ.

ڕووژ ٢٨ مورداد نە تەنیا هەمیشە جنایەتەیل ڕەژیم سەرمایەداری ئسلامی خەێدە هۊر ئیمە، بەڵکە ناو و یاد مەعەلم شەهید هورموز گورجیبەیانی تیەرێدە هۊرمان و لە دیرووک خەبات خەڵق شار کرماشان وەرد ناو ئەو موعەلم ئنقلابی هاوڕێیە. هورموز گورجیبەیانی چالاک سیاسی کومونیست و موعەلم خەڵق شار کرماشان بۊ. چالاکی سیاسی لە دەورەێ خوەندەوانی لە زانستگاێ تەبریز دەستپێکرد و تا وەرجە ئنقڵاو خەڵقەیل ئێران لانکەم دو کەڕەت کەفتە زندان. یەکەم کەڕەت چۊ نەمایەندەێ خوەندەوانەیل زانستگاێ تەبریز کەفتە زندان و وە ئێعتراز خوەندەوانەیل ترەک هاتە دەیشت، و دۊیەم کەڕەتیش لە کات جەژنەیل پاشکەفتنخوازانەێ دوهەزاروپانسەدساڵە لە ساڵ ١٣٥١ کەفتە زندان، چۆن سەرکردەیل وڵاتەیل بێگانە وەبوونەێ سەرداێن وە ئاسوارەیل دیرووکی تاقوەسان و بێستۊن بڕیار بۊ لە شار کرماشان بویەرن و ڕەژیم شا ترسیاد ک ڕێبەرەیل مەردم ئێعترازەیلێگ دژ وە ستەم ڕەژیم شاێ ئێران بڕازنن؛ و هەر وەی پەڵپە هەڤال هورموز گورجیبەیانی و چەندین کەس ترەک بێ هۊچ تاوانێگ خستنە زندان. هورموز لە ڕووژەیل پاییز ١٣٥٧ چۊ یەکێگ لە ڕێبەرەیل ئنقڵاب مەردم وە ڕێکخستن خوەپیشاندانەیل خیاوانی و هەلەێوا ڕێکخستن موعلمەیل و خوەندەوانەیل مەدرەسەیل کرماشان سەرقاڵ بۊ و بەرنامەیل ئێعترازی مەردمی لە کرماشان ڕازانیا. گورجیبەیانی لە دامەزرانەرەیل (کانون سەروەخوەێ موعەلمەیل ئازادیخواز) بۊ ک چەندین کەس لە دامەزرانەیل و ئەندامەیلی ئێعدام بۊن. ئەی موعەلمەیل مانگرتنێگ لە کرماشان خستنە ڕێ ک یەکەمین مانگرتن موعەلمەیل لە گشت ئێران دژ وە ڕەژیم شا لە ئنقلاو خەلقەیل ئێران بۊ و نەخش گەورەێگ لە ئنقڵاو داشت و خوەندەوانەیل هاوردە ناو خیاوان. وە دۊاێ ئنقڵاو وە ڕێکخریاێ چریکەیل فەدایی نزیک بۊ و لە تئۆریسیەنەیلیان لە ناوچەێ کوردستان وە ئەژمار هاتیاد ک دانیشتەیل قسە و باسی فرە کەسەیل لە شارەیل ترەک کیشانیادە کرماشان. ڕەژیم ئسلامی هۊچ وەخت نەتۊیەنست مدووێگ ئەڕاێ ئێعدام هورموز گورجیبەیانی، ئازەرنووش مەهدەویان و یارەیلیان بۊشێد و کار ناشیاێگ وە پێ نسبەت بیەێد و ئەی داوا ک لە ماڵ هورموز چەک و تەقەمەنی پەێدا بۊیە هۊچوەخت سابت نەکریا. هەرلەێوا ئازەرنووش مەهدەویانیش ک مامۆستای دەبیرستانەیل و زانستگاێ ڕازی کرماشان بۊ، بێ تاوان و بێ دادڕەسی کوژەریا و تاوانێگ بجگە لە خەبات دژ وە ڕەژیم شا و ئازادیخوازی نێیاشت. لە ئاکامیش وەختێگ هۊچ تاوانێگ ئەڕای هورموز وە دەستیان نەکەفت و ئاشکرا بۊ ک هەر وە بێگونا کوژەریاس، حاکم شەرع ڕەژیم لە کرماشان وەت: قسەیل گورجیبەیانی لە گولەیش خەتەرناکتر بۊ! فاسڵەێ دەستوەسەرکردن تا ئێعدام هورموز، ئازەرنووش و یارەیلیان کەمتر لە ١٢ ساعەت بۊ و هۊچ دادگاێگیش وەڕێیەونەچی و لەڕاستییا ئێعدام ١١ خەباتکار کومونیست لە کرماشان بایەد چۊ قەتڵ وە ئەژمار باێت و نە تەنانەت ئێعدامێگ قانوونی. 

ناو و یاد هورموز گورجیبەیانی و یارەیلی تا هەمیشە لە هۊر مەردم کورد و وەتایوەت خەڵق کرماشان مینێد و تا هەمیشە ڕووژ ٢٨ گەڵاویژ ساڵوەگەڕ هەڵاماتهاوردن ڕەژیم سەرمایەداری ئسلامی وە کوردستان، وەگەرد ناو ئەی شەهیدەیل خەڵق هاوڕێیە و هەر جوان خەباتکارێگ ک وەرد ستەم و جەور و نایەکسانی ڕەژیم سەرمایەداری ئسلامی ئاشنا بووت، خوەی وە خوەندەوان کڵاس هەڤال هورموز گورجیبەیانی زانێد. ئاخرین دەرس ئەی موعەلم نەمر ئەڕاێ ئیمە فداکاری و تێکووشاێن بۊ و ناوی لە لاێ موعلمەیل خەباتکارەیلیگ جوور سەید قوربان حوسێنی، بێهمەن عزەتی، ئەسغەر ئاراستە، یەحیا ڕەحیمی، هووشەنگ عزەتی، داریووش نیکگووێ کرماشانی، ئەبوڵحەسەن خانعەلی، چراغ موحەممەدی، فەرزاد کەمانگەر و سەمەد بێهرەنگی بەرز مینێدەو."

ک-ش