لە شاری تۆرۆنتۆی کەنەدا، کۆمۆنی ژنانی ئازاد سارا و ئەنجومەنی دیموکراتیکی گەلی کورد لە تۆرنتۆ لەبەردەم نیویۆرک سەنتەر کۆبوونەوە و مەراسیمی یادکردنەوەیان ئەنجامدا و لەبارەی ژنی کورد ژینا ئەمینی، کە لە ١٣ی ئەیلولدا دەستگیرکرابوو و هەر لەو ڕۆژدا بەهۆی ئەشکەنجەوە چووە کۆما و لە ١٦ی ئەیلول دا گیانی لە دەستدا ڕاگەیاندراوێکیان خوێندەوە.

دروشمەکانی "ئێمە هەموومان ژینا ئەمینین!"، " کوشتنی ژنان بوەستێنە!"، "توندوتیژییەکانی دەوڵەتی ئیسلامی ئێران لە دژی ژنانی کورد بوەستێنە!"، " ژن، ژیان، ئازادی" بەبێ پچڕان و بە بەردەوامی دەوترانەوە.

داوای لێکۆڵینەوە کرا

لە بەیاننامەیەکدا، کە بەناوی کوردانی دانیشتووی کەنەداوە بڵاوکراوەتەوە، داوا لە رێکخراوی لێبوردنی نێونەتەوەیی کراوە، کە لێکۆڵینەوەکانی لەسەر کوشتنی ژینا ئەمینی دەست پێبکات.

'مرۆڤە ئازاکانی رۆژهەڵات و ئێران ڕژانە سەر شەقامەکان'

لە ڕاگەیاندراوەکەدا هاتووە، "پێویستە ڕێکخراوی لێبوردنی نێونەتەوەیی لێکۆڵینەوەیەکی ورد سەبارەت بە تۆمەتی ئەشکەنجەدان و ئازاردان و لە ئەنجامدا کوشتنی ژینا ئەمینیی تەمەن ٢٢ ساڵ ئەنجام بدات، کە لە دوای دەستگیرکردنی بە شێوەی گوماناوی گیانی لە دەستدا. مرۆڤە ئازا و قارەمانەکانی ڕۆژهەڵات و ئێران بۆ دەربڕینی ناڕەزایی بەرامبەر بە کوشتنی ژینا لەلایەن کۆماری ئیسلامی ئێرانەوە، ڕژانە مەیدانەکان و سەر شەقامەکان. ئێستا کاتی ئەوەیە پشتیوانی لە گەلی ڕۆژهەڵات و ئێران بکەین و سیاسەتی دوژمنایەتیی کورد لە کۆماری ئیسلامی ئێران شەرمەزار بکەین و ناڕەزایی دەرببڕین".

سڵاو لە بەرخۆدانی گەلانی ئێران کرا

کوردان لە چالاکییەکەیاندا، سڵاویان لە پێداگری و سووربوونی گەلانی ئێران لەسەر هێڵی بەرخۆدان و تێکۆشان کرد و وتیان: "سەدان چالاکوان لە خۆپیشاندانەکانی شارە کوردییەکانی ڕۆژئاوای ئێران (ڕۆژهەڵاتی کوردستان) دەستگیرکراون، کە لە دژی دەستگیرکردن و کوشتین ژینا ئەمینی لەلایەن کۆماری ئیسلامیی ئێرانەوە ڕژابونە سەر شەقامەکان. کۆماری ئسلامیی ئێران ڕژێمێکی مەترسیدارە، کە ژنان و باوەڕەکان ڕووبەڕووی جیاکار و گوشار دەبنەوە.

پارتە سیاسییە سەربەخۆکان، سەندیکاکان و یەکێتیەکان، ڕێکخراوەکانی کۆمەڵگەی مەدەنی کاریان لێ قەدەغە کراوە، میدیاکان سانسۆر  دەکرێن و لە بەرنامە تەلەفزیۆنیەکاندا گوشار لەسەر خەڵک و ڕای گشتی دروست دەکەن. کاتی ئەوە هاتووە، کۆمەڵگای نێونەتەوەیی پێکەوە کاربکەن و تاوەکو دەسەڵاتدارانی ئێران ناچار بکەن، دادپەروەری بۆ بنەماڵەی ژینا ئەمینی پێکبهێنن و ڕێگری لە پێشێلکارییەکانی تری مافەکانی ژنان لە ئێران بکرێت".

چالاکییەکە نزیکەی دوو کاتژمێر بەردەوام بوو و بە وتنەوەی دروشمی "ژن، ژیان، ئازادی" کۆتایی پێهات.

ژ.ت