لە ٢٨ هەمین ساڵیادی شەهیدبوونی زیلان، کە ساڵی ١٩٩٦ دژی دەوڵەتی تورک چالاکی فیدایی ئەنجامدا، ڕژاک ڕاگەیاندراوێکی نووسراوی بڵاوکردەوە و ڕایدەگەیەنێت چالاکییەکەی زیلان بووە هۆی بنیاتنانی ڕێگەی ئازادی ژنان.

لە ڕاگەیاندراوەکەی ڕژاک هاتووە: "لە ساڵیادی هەڤاڵ زیلان هەموو شەهیدانی ڕێگەی ئازادی بیردەهێنینەوە. لە مانگی حوزەیرانەدا پۆلێک ژنی شۆڕشگێڕی وەک شەهید زیلان، سەما یوجە، لەیلا ئاگری، بێریڤان، ڕاپەڕین ئامەد، گوڵان، لەیلا یڵدز و زۆر ژنانی تری تێکۆشەر خۆنەویستانە هەنگاویان نا و لەپێناو شکۆی خاک و گەلەکەمان گیانی خۆیان فیداکرد، یادی هەموویان بەرزڕادەگرین. زیلان دەنگێکی پڕ لە خۆشویستن بۆ ڕێبەرەکەی، گەلەکەی و مرۆڤ و ژیان بوو، دەنگێک بوو کە هاواری کرد بۆ ئازادیی و بێ دەنگی شکاند و وتی: “ئەوەی دەستی درێژکات بۆ خاکم ناگات بە ئامانج".

لە درێژەی ڕاگەیاندراوەکەدا دەڵێت: "بۆ گەڕاندنەوەی جەوهەری ژن، زیلان بانگی دا بەگوێی تاریکەشەوی ئەوانەی نکۆڵی لە ژن بوون دەکەن، نیشانیداین ژن بوون ڕێگرنییە لە بڕیار و هەنگاو بۆ تێکۆشانی ئازادیی. ژیانی ئازاد بە تەمەن درێژی نییە و وتی "من فیداکردنی گیانم، ژیانی نەمری دەئافرێنم کە شایستەی گەلەکەم بێت".

ڕژاک لە کۆتایی ڕاگەیاندراوەکەی دەڵێت: "لە ساڵیادی شەهید زیلاندا بانگەواز لە هەموو ژنان دەکەین، بۆ گەڕانەوەی شکۆی ژن و تێکۆشانی نەتەوەیی و خاکمان یەکڕیزبین، چونکە بە ئازادیی ژن جڤاک و تەواوی مرۆڤایەتی و ژینگە ئازاد دەبێت، بەپێچەوانەوە و بەبێ ئازادیی ژن، ژیان و شکۆی مرۆڤ وەکو سەهۆڵی بەرخۆرەتاو و پووشێکی سووتاو لەناو دەچێت".