کۆلەکتیڤی لاس کۆمپاسی جە دژو گۆشەگیرکەردەو ڕابەر ئاپۆی مرداوە و جە نامێوەنە پەی جمېیەرو ئازادیی ژەنا و گەلو وەرنیشتی ئەرەیاوناش، کە پەی ئازادیی ڕابەر ئاپۆی بەشداری جە ئەرەکۆشای هامبەشینە مکەرا.
کۆلکتیڤو ژەنا لاس کۆمپاسی کە ناوەندەکەش ئینا مەکسیکەنە، نامێوەش ئاراسەو جمېیەرو ژەنا کوردەسانی و گەلو وەرنیشتو کوردەسانی کەردەن. جەنامەکەنە سەرەڕاو ئانەیە دڵوەشی وێشا بە ورگێرتەو زانیاری سەرو تەندروسی ڕابەر ئاپۆی بەربڕییەن، جە هەمان کاتەنە نیگەرانی و بێزاری وێشا جە دژو بەردەوامی گۆشەگیری وستەن ڕووە، هەرپۆکەی داواشا کەردەن، ئەرەکۆشای پەی ئازادی ڕابەر ئاپۆی بەردەوام بۆنە.
جە نامەکەنە ئامان: "بە ڕۆشنی ئانەیە وینمی کە پەی دلێنەبەردەو ئەرەکۆشای ئازادیی گەلو کوردی و دلێنەبەردەو ئەزمونو وێڕاوەبەری کە هیواو گەلان جە وەرنیشتەنە، بۆمب وارانو دۆڵەتو تورکی فاشیستی بەردەواما. ئێمەیچ جە مەکسیکەنە رووبەڕوو هەمان قڕکەردەی بیمێوە. جە وەرانوەرو ئێشەکا وەرنیشتی، ئێمە جە چیاپاس و مەنتیقەکا تەرینە فرە قەڵسێنمۍ. مزانمێ کە سەرچەمەو گردو ئا نەهامەتیا سیستمو سەرمایەداریی و تاتەسالارییا، کە پێسەو دڕندێوە هەزار ساڵێن هەوڵ مڎۆ مڏرامانو ئێمە بێکاریگەر بکەرۆنە، بەڵام جە ساتێ چانەنە ئێمە ڕووەکەرمۍ ئەرەکۆشای و جە ئەرەکۆشای و مڏرامانەنە جە شمۆ هێز هۆرگیرمۍ. ئەرەکۆشاو شمە کە دلۍ جەنگی و ناوەشینە پەی وەشەویسی، شکۆمەندی و ژیوای ئازادی پاگیری مکەردۍ، پەی ئەرەکۆشاو ئێمە سەرچەمەو ئیسفاڎە هۆرگێرتەین.
ئانا ئێمە ئینایمی چێ. جە هەڕێمەکا وێمانە، جە مەنتیقەو گلێرگەو دلێینەی و رەسەنەکانە، جە شار و ناوچەکامانە ئێمە ئینایمۍ پێوەرە".
نامەکەو کۆلێکتیڤی بە ئاماژەدای بە واچەو ژەنە سەرمەشقەی مەکسیکیۍ بێتی کارینۆی کە تیرۆرەکریێبۍ، دمایش ئامان "پێسەو واڵەکێما، هەمڕێما بێتی کارینۆی واتش، ' ئێمە ئاواتەکاما مارمۍ دی و هیوا بەدی مارمێنە'. ئێمە وەشەویسی، مدرامانو و وزەو ئەرەپڕاو وێما جە ڕاو ئی نامەیۆ کیانمێنە. ئازادی پەی ئۆجالانی. ژەنی، ژیوای، ئازادی".
