هاوسەرۆکایەتی دەستەی بەڕێوەبەری کەجەکە، رایگەیاند، "دەوڵەتی تورکی داگیرکەری قڕکەر بە بەرچاوی هەموانەوە تاوانی جەنگ دەکات" و داوای لە هەموو کەس کرد کە لە دژی هێرش و تاوانە جەنگیەکانی دەوڵەتی تورک هەڵوێستیان هەبێت و بکەونە جموجۆڵەوە.
هاوسەرۆکایەتی دەستەی بەڕێوەبەری کەجەکە سەبارەت بە هێرشەکانی دەوڵەتی تورکی داگیرکەر بۆ سەر رۆژئاوا راگەیەندراوێکی بڵاوکردەوە.
کەجەکە رایگەیاند، "دەوڵەتی تورک لە چوارچێوەی پلانە قڕکارییەکانیدا لە ١٣ی کانونی دووەمی ٢٠٢٤ەوە هێرش دەکاتە سەر رۆژئاوا و ٤ رۆژە ئەو هێرشانە بەردەوامن. وەک پێشتر ئەنجامدرا، هاوکات لەگەڵ هێرشەکانی بۆ سەر گەل، ناوەندە نیشتەجێبوونەکان، ژێرخان و سەرخان، ناوەندەکانی بەرهەمهێنان، ناوەندەکانی خۆراک و وزە، کۆگا، سایلۆ، نەخۆشخانە، خوێندنگە و ئەوەی دەستنیشان کرابێت، هەمووی بە فرۆکەی شەڕ و درۆن بۆردومان کراون. ئێمە ئەو هێرشە نامەردانە و دڕندانەیەی دەوڵەتی تورکی داگیرکەری قڕکەر بە توندی شەرمەزار دەکەین. دەوڵەتی تورک لە رێگەی ئەو هێرشانەوە جارێکی دیکە بە تەواوی جیهانی نیشاندا کە لە چ ئاستێکدا دوژمنی کوردە، دوژمنی گەلانە، لە مرۆڤایەتی و ئەخلاق داماڵدراوە".
لەراگەیەندراوەکەدا ئەوەش هاتووە، "ئێمە لە زۆر راگەیەندراو لێدواندا ئەوە دەخەینەڕوو کە دەوڵەتی تورک خاوەنی چ مێشکێکی دوژمنکارانەیە بەرامبەر بە کورد، لە چوارچێوەی سیاسەتی قڕکردنی کوردان دەیەوێت رۆژئاوا داگیر بکات، ئەو راستیەی خۆی بە هەموو جۆرێک سەلماندووە. لەناو دەوڵەتی تورک و حکومەتی تەیب ئەردۆغاندا، دوژمنایەتی بەرامبەر کوردان وەک نەخۆشیەکی لێهاتووە. ئەو مێشکە نەخۆشە کە وەک گرێیەک گەورە دەبێت، زیانەکانی رۆژ لە دوای رۆژ زیاتر دەبێت. بڕینەوە و فڕێدانی ئەو مێشکە نەخۆشە نەک لە بەرژەوەندی گەلی کورددا دەبێت، لە هەمان کاتدا بە قازانجی گەلانی تورکیا، رۆژهەڵاتی ناوەڕاست و تەواوی مرۆڤایەتیدایە".
دەوڵەتی تورک بە بەرچاوی هەمووانەوە تاوانی جەنگ ئەنجام دەدات
هاوسەرۆکایەتی دەستەی بەڕێوەبەری کەجەکە سەرنجی راکێشا بۆ سەر ئەم بابەتانە:
"دەوڵەتی تورکی قڕکەر بە بەر چاوی هەموو کەسەوە تاوانی جەنگ ئەنجام دەدات. هێرشەکانی سەر رۆژئاوا دەکەونە خانەی ئەو تاوانە جەنگیانەوە. بەو کۆمەڵکوژیانە، تاوانی جینۆساید ئەنجام دەدات. بۆردومانی کۆگاکانی خۆراک، وێستگەکانی کارەبا، ئاو و وزە، بێ کارەبا، بێ ئاو، بێ نان، بێ سوتەمەنی هێشتنەوەی شارەکان گەورەترین تاوانی جەنگە. دەوڵەتی تورک بە بەرچاوی جیهانەوە زۆرجار تاوانی ئەنجامداوە. بەڵام جیهان بەرامبەر بەوە بێدەنگە. ئەو هەڵوێستە مایەی قەبوڵکردن نییە. بێدەنگی بەرامبەر بەو هێرشانەی دەوڵەتی تورک هاوبەشیە لەو تاوانانەی شەڕ و تاوانەکانی جینۆسایدی دەوڵەتی تورک. ئەو هەڵوێستە تاوانە و هیچ جیاوازیەکی لەگەڵ کردەوەکانی دەوڵەتی تورکدا نییە. بەتایبەتی دەبێت نەتەوەیەکگرتووەکان بەرامبەر بەو هێرشە نامرۆڤانانە و تاوانە جەنگیانەی دەوڵەتی تورک بوەستێتەوە، ئەوە قەبوڵ نەکات و رێوشوێن بگرێتەبەر. رێکخراوە نێونەتەوەییەکانیش دەبێت هەمان هەڵوێست بگرنەبەر، بەرامبەر بە هێرشی داگیرکەری و زەوتکردنی دەوڵەتی تورک بوەستنەوە. هەروەها هێزەکانی هاوپەیمانی نێونەتەوەیی لە رۆژئاوا نابێت تەنیا بەرامبەر بە داعش بوەستنەوە، لە هەمان کاتدا لە دژی هەموو جۆرە هێرشێک هەڵوێستیان هەبێت. وەستانەوە بەرامبەر بە هێرشەکانی داعش، بەڵام بێدەنگی لە دژی هێرشەکانی دەوڵەتی تورک مایەی قەبوڵکردن نییە. لە باکور و رۆژهەڵاتی سوریا هێزێکی هاوپەیمانان بوونی هەیە کە زیاتر لە ٧٠ وڵات لە خۆدەگرێت. ئەگەر ئەوان لە بەرامبەر هێرشەکانی سەر رۆژئاوا، لە بەرامبەر هێرشەکانی دەوڵەتی تورک نەوەستنەوە، رێگری لەو هێرشانە نەکەن، کەواتە بۆچی لە رۆژئاوان! دەوڵەتی تورک بە سیاسەتەکانی تەنیا زیان بە گەلی کورد ناگەیەنێت، لەهەمان کاتدا زیان بە تەواوی ناوچەکە دەگەیەنێت. حکومەتی تەیب ئەردۆغان دەیەوێت لە رۆژهەڵاتی ناوەڕاست پەرە بەشەڕ بدات، قووڵتری بکاتەوە و بەهەموو شوێنێکدا بڵاویبکاتەوە. سیاسەتەکانی لەسەر ئەو بنەمایەن. دەیەوێت هەمووان پەلکێشی ناو شەڕ بکات، کوردان لە دژی یەک بەشەڕ بدات. بەهێرشەکانی بۆ سەر عێراق، سوریا، باشوور و رۆژئاوا دەیەوێت ئەمە بکات. ئێمە لێرەوە جارێکی دیکە داوا لە نەتەوەیەکگرتووەکان، رێکخراوە نێونەتەوەییەکان، دەوڵەت و هێزەکانی هاوپەمانان لە رۆژئاوا دەکەین کە بەرامبەر بەو هێرشانە و تاوانەکانی شەڕ چیتر بێدەنگ نەبن، لەبەرامبەر ئەوەدا هەڵوێست نیشان بدەن.
گەلی رۆژئاوا تائێستا بەرامبەر بە هێرشەکانی دەوڵەتی تورک بەرخودان و هەڵوێستی پێویستی نیشانداوە. سڵاو لە هەڵوێستی خۆڕاگرانەی گەلی رۆژئاوا دەکەین. دەوڵەتی تورکی داگیرکەری قڕکەر بەو هێرشانە دەیەوێت گەلانی رۆژئاوا و باکور- رۆژهەڵاتی سوریا شکست بدات، لە دەرفەت و توانا بێ بەشیان بکات، بەم جۆرە ناچاریان بکات کە زێد و نیشتمانی خۆیان جێبهێڵن. دەیەوێت بەم جۆرە پلانە قڕکارییەکانی خۆی جێبەجێ بکات. ئامانجی سەرەکی ئەو هێرشانە ئەمەیە. خەڵکی رۆژئاوا بە وشیاری و هۆشمەندی ئازادییەوە کە ئاگای لەو راستیە هەیە، دەبێت یەکگرتوویی و بەرخودانی خۆی بەهێزتر بکات، هەڵوێستی خۆی درێژە پێبدات و ئەو پلانەی دوژمن لەبار ببات. هەبوون، وەستاندنی هێرشەکان و ئازادی تەنیا بە تێکۆشان مسۆگەر دەکرێت. گەلی رۆژئاوا کە ئاگاداری ئەوەیە و جێبەجێی دەکات، دەبێت بەردەوام بێت لەسەر ئەو هەڵوێستەی.
دەوڵەتی سوریا دەبێت لە بەرامبەر هێرش و تاوانە جەنگیەکانی دەوڵەتی تورک هەڵوێستی هەبێت و قەبوڵی نەکات. یەکێتی، رزگاری و ئازادی سوریا بە وەستانەوە بەرامبەر بە هێرشەکانی دەوڵەتی تورک و چەتەکانی مسۆگەر دەبێت. لەبەر ئەوە دەبێت دەوڵەتی سوریا لە دژی هێرشە داگیرکەرییەکان، دەستبەسەرداگرتنی خاکەکەی و قڕکارییەکانی دەوڵەتی تورک لەگەڵ گەلانی رۆژئاوا و باکور-رۆژهەڵاتی سوریا بجوڵێتەوە و تێبکۆشێت. هاوکات رای گشتی و دەوڵەتانی عەرەبیش دەبێت ناڕەزایەتی لە دژی هێرشەکانی دەوڵەتی تورک نیشان بدەن، قەبوڵی نەکەن، لەبەرامبەری بوەستنەوە و هەڵوێست بگرنەبەر.
گەلی کورد دەبێت لە کوردستان و دەرەوەی وڵات بکەونە ناو جموجۆڵەوە
گەلی کوردیش لە چوارپارچەی کوردستان و دەرەوەی وڵات دەبێت لە پێناو رۆژئاوادا بکەونە ناو جموجۆڵەوە و خاوەنداری لە رۆژئاوا بکەن. دۆست و هێزە دیموکراتیکە شۆڕشگێڕەکانیش دەبێت لەگەڵ گەلی کورد لە پشتیوانیدا بەشداربن و خاوەنداری لە شۆڕشی رۆژئاوا بکەن. شۆڕشی رۆژئاوا میراتی هاوبەشی تەواوی مرۆڤایەتیە. بەتایبەتی شۆڕشگێڕان، سۆسیالیستەکان، گەل، ژنان و هەموو هێزە دیموکراسیخوازەکان دەبێت هەڵوێستی بەهێز نیشان بدەن، لە رێگەی ئەو هەڵوێستەوە گوشارێکی سیاسی ساز بکەن و وابکەن کە هەموو کەس هەڵوێست دەرببڕێت. لە بەرامبەر هێرشەکانی دەوڵەتی تورک کە لە ١٣ی کانونی دووەمی ٢٠٢٤ەوە دەستیان پێکردووە هێشتاش بەردەوامن، بێدەنگی چیتر مایەی قەبوڵکردن نییە. ئێمە هێرشەکانی دەوڵەتی تورک کە لە دژی مرۆڤایەتین جارێکی دیکە بە توندی شەرمەزار دەکەین، داوا لە هەمووان دەکەین کە لە بەرامبەر هێرش و تاوانە جەنگیەکانی دەوڵەتی تورک بەرپرسیارانە بجوڵێنەوە و هەڵوێستیان هەبێت".
هـ . ب
