کۆنگرەی نەتەوەیی کورد هەفتەی داهاتوو لە ڕۆژئاوا بەڕێوەدەچێت
ڕاگەیەندراوە، کۆنگرەی نەتەوەیی کورد کە ماوەیەکە هێزە سیاسی، پارت و ڕێکخراوە کوردییەکانی باکوور و ڕۆژهەڵاتی سووریا ئامادەکاری بۆ دەکەن، هەفتەی داهاتوو بەڕێوەدەچێت.
پێشبینی دەکرا دوای گفتوگۆی نێوان لایەنەکان، هێزە سیاسی و ڕێکخراوە کوردییەکان، ڕەشنووسێکی هاوبەش لە نەورۆزدا ڕابگەیەندرێت.
بەڵام کۆمیتەی ئامادەکاری کۆنگرە ڕایگەیاند کە بەهۆی هەندێک بەربەستەوە ڕاگەیاندنەکە دواخراوە.
لایەنە سیاسیەکان، پارت و ڕێکخراوە کوردییەکانی باکوور و ڕۆژهەڵاتی سووریا لەسەر پرسە هاوبەشەکان گەیشتوونەتە ڕێککەوتن.
بەرپرسان ڕایانگەیاندووە، لەم بەڵگەنامەیەدا ڕێککەوتن بۆ پێکهێنانی کۆمیتەیەک بۆ دانوستان لەگەڵ حکومەتی دیمەشق بۆ گەیشتن بە مافەکانی گەلی کورد و بەشداریکردنی کورد لە دەستووری نوێی سوریادا کراوە.
شایانی باسە لایەنە کوردییەکان لە ١٦ی ئاداردا کۆبوونەوەیەکیان ئەنجامدا و ڕێککەوتن لەسەر بەستنی کۆنگرەی نەتەوەیی کورد. لایەنەکان بە تایبەتی باسیان لە ئاستەنگیەکانی بەردەم یەکێتی کرد و بەڵگەنامەکانی پەیوەست بە ئەنجامی کۆبوونەوەکانی پێشووی نێوان لایەنەکانیان خستە بەر باس و هەڵسەنگاندنەوە.
