لە سەرحەد سەدان ژن خۆیان بۆ شارەوانییەکان کاندید کردووە
بە بەراوەرد لەگەڵ ساڵانی ڕابردوو، ژمارەی ئەو ژنانەی لە هەرێمی سەرحەد لەسەر ناوی دەم پارتی داوای کاندید بوونیان پێشکەش کردووە زیادی کردووە.
چالاکییەکان و ئامادەکارییەکانی هەڵبژاردنی دەم پارتی لە وان، موش، بەدلیس، ئیدر و ئاگری بەردەوامە. لە شاری وان کە گەورەترین شاری سەرحەدە ٦٨١ کەس داوای خۆکاندیدکردنیان پێشکەش کردووە.
دەلیل ئاکسۆی، وتەبێژی کۆمیسیۆنی وەرگرتنی کاندیدەکان ڕایگەیاند، ٤٧٦ کەس بۆ ئەندامێتی لە ئەنجومەنی شارەوانی داواکارییان پێشکەش کردووە، ٧٦ کەسیان ژنن. ئاکسۆی ڕایگەیاند، کە بە گشتی ١٩٦ کەس کە ٤٧ کەسیان ژنن بۆ هاوسەرۆکی شارەوانییەکان داواکارییان پێشکەش کردووە.
ئاکسۆی ڕاشیگەیاند، کە بە گشتی بۆ گەورە شارەوانی وان ١١ ژن داواکاریان پێشکەش کردووە.
لە شاری موش ٢٥ ژن، شاری ئیدر ٢٨، شاری بدلیس ١١ و لەئاگری ٣٢ ژن داواکارییان کاندید بوونیان پێشکەش کردووە.
