دوایی ئەوەی سلێمان ئەحمەد هەواڵسازی بەشی عەرەبی ئاژانسی (ڕۆژنیوز) لە ١ی تشرینی یەکەمی ٢٠٢٣دا دەچێتە سەردانیکردنی کەسوکارەکەی لە ڕۆژئاوای کوردستان لە شاری حەلەب، کە خەڵکی ناوچەی جندرێسن لە عەفرینی داگیرکراو و پاش داگیرکردنی شارەکەیان ئاوارەبوون، سلێمان ئەحمەد لە کاتی گەڕانەوەی بۆ باشووری کوردستان لەلایەن هێزەکانی پەدەکەوە لە دەروازەی فیشخابوور ڕفێندراوە و ماوەی ١٢٥ ڕۆژە بێسەروشوێنە.

لە پاش ڕفاندن و بێسەروشوێنکردنیەوە دوایی چەند ڕۆژێک ئاسایشی دهۆک بە بڵاوکردنەوە و هەڵواسینی تۆمەتێکی نا ڕەوا و پڕ لە چەواشەکاری ڕایدەگەیەنن "ڕفاندی سلێمان ئەحمەد پەیوەندی بە کاری ڕۆژنامەنووسیەوە نیە و بۆ کاری نهێنی و نایاسیی پەکەکە هاتوچۆی کردوە" ئامانج لەمەش ڕوونە خواستیانە ڕۆژنامەنوس سلێمان ئەحمەدیش، هاوشێوەیی زیندانیانی بادینان، لەسەر بنەمایی تۆمەتی ناڕەوا سزا بدەن. لەم بارەیەوە ئاژانسی ڕۆژ نیوز سەرلەبەری ئەو تۆمەتانەی ڕەتکردۆتەوە و ڕایانگەیاندوە 'ئەم مامەڵەیەی پەدەکە بەرامبەر ڕۆژنامەنووسان ئیدانە دەکەین و داواکارین دەستبەجێ چارەنووسی سلێمان محەممەد ئەحمەد، ڕۆژنامەنووس و هەواڵسازی بەشی عەرەبی ئاژانسەکەمان ئاشکرا بکرێت و ئازاد بکرێت، لە ئێستادا سەلامەتی گیانی ئەو ڕۆژنامەنووسە لە ئەستۆی پەدەکەدایە'

لەو بارەیەوە یەکێک لە ئەندامانی تیمی پارێزەرانی سلێمان ئەحمەد پارێزەر نەریمان ئەحمەد لە ڕۆژی ٢٥ی کانوونی دووەم ڕایگەیاند: "ئەگەر لەكاتێكی زوودا چارەنووسی سلێمان ئاشكرا نەكرێت، ئەوا حكومەتی هەرێم و وەزیر ناوخۆی هەرێم پەلكێشی دادگای فیدراڵی دەكەین، بۆیە داوا دەكەین، ڕێگەمان بدەن بیبینین و تۆمەتی ساختەی بۆ درووست نەكەن."

نەریمان ئەحمەدی پارێزەر باسی لەوەشکردەوە؛ جگە لە سلێمان ئەحمەد، زۆرکەسی دیکە بە ناڕەوا لە زیندانی ئاسایشدا بەند کراون و هیچ تۆمەتێکیان نییە، ئەمە پێشێلکارییەکی ڕوونە و ئەرکی هەموو لایەنەکان و ڕێکخراوەکانی مافی مرۆڤە لەدژی ئەو بابەتە بوەستنەوە.