موراد قەرەیلان ئەندامی دەستەی بەڕێوەبەری پەکەکە بەشداری بەرنامەیەکی تایبەتی ستێرک تی ڤی کرد و لەبارەی ئەو دیمەنانەی کە دەوڵەتی داگیرکەری تورک تەرمی سەربازەکانی دەسووتێنێت و لەلایەن ئاژانسی هەواڵی فوراتەوە (ANF) بڵاوکرانەوە زانیاری گرنگی درکاند. قەرەیلان ئاماژەی بەوەکرد کە بڕیاری سووتاندنی تەرمەکان لەلایەن خولوسی ئاکار وەزیری بەرگری تورکەوە دراوە و گوتی، " بەکارهێنانی چەکی کیماییش بریاری ئەردۆغانە."

موراد قەرەیلان ئەندامی دەستەی بەڕێوەبەری پەکەکە لەبارەی هەڵوێستی مێژوویی عەبدوڵلا ئۆجالان رێبەری گەلی کورد، قۆناغی دامەزراندنی پەکەکە، دوایین دۆخی ئاڤاشین، زاپ، مەتینا، ٢٥ی تشرینی دووەم رۆژی جیهانی بەرەنگاربوونەوەی توندوتیژی سەر ژنان و هەڵبژاردنەکانی تورکیا قسەی کرد.

پارتی کرێکارانی کوردستان (پەکەکە) لە چ بارودۆخێکدا و لەسەر چ پرەنسیپێک دامەزرا؟

پیرۆزبایی ٤٤مین ساڵوەگەڕی پارتیمان پەکەکە، لە هەموو خەڵکی کوردستان، بەتایبەتی لە دامەزرێنەر و رەنجدەری گەورەی پارتەکەمان ڕێبەر ئاپۆ، لە دۆستانی گەلی کوردستان، لە هەموو خەباتکار و هاوسۆز و لایەنگرانی پارتیمان دەکەم . لە ٤٥مین ساڵی خەباتدا هیوای سەرکەوتنیان بۆ دەخوازم. لە کەسایەتی شەهیدی گەورەمان حەقی کارەر، یادی هەموو شەهیدە قاڕەمانەکانی شۆڕشمان دەکەمەوە. لەبەرانبەر یادەوەریاندا سەری رێز و نەوازش دادەنەوێنم و بەڵێنمان دووبارە دەکەمەوە. لەسەر بەڵێنمان، خەیاڵی شەهیدانمان و یادکردنەوەیان لە کوردستانی ئازاد دەبین.

مانگی تشرینی دووەم تەنیا مانگێک نییە کە ئێمە پارتەکەمان تێیدا دامەزراندووە. هەروەها مانگێکی گەورەی بەرخۆدانە؛ لەم مانگەدا چەندین شەهیدی گەورەمان داوە. هەموو شەهیدانی مانگی تشرینی دووەم لە کەسایەتی دەلال ئامەد و شیلان کۆبانێ و رەشید سەردار و یەڵماز دەرسیم بەبیر دەهێنمەوە و بە ڕێزەوە لەبەردەم یادەوەریاندا سەرم دادەنەوێنم. لەم دواییانەدا دیسان شەهیدمان هەیە؛ بە ڕێزەوە هەڤاڵ نوری یەکتا کە لە بەرخۆدانی مەتینا فەرماندەی بەرەی جۆلەمێرگ بوو بەبیردەهێنمەوە. لەم بەرخۆدانەدا ڕۆڵ و رەنجێکی زۆری هەبوو. لە بەرەکانی پێشەوەدا شەڕی کرد و بەم شێوەیە شەهید بووە.

دیسانەوە بە ڕێزەوە ئەندامی فەرماندەیی گواستنەوە و ئیدارەی باکور، پەیمان باگۆک ​​و هەڤاڵانی ئاگری گابار و چاورێ جیلۆ کە لەگەڵیدا شەهید بوون بەبیر دەهێنمەوە. هەڤاڵ پەیمان لە پراکتیدا ئەرکی وەرگرتبوو، بەڵام ئەندامی ئەنجومەنی پاژک و دەستەی فەرماندەیی یەژەئاستار بوو. ٢٨ ساڵ لە چیاکانی کوردستان خەباتی کرد. لە زاگرۆسەوە تا بەهدینان و دەرسیم لە هەموو کوردستان گەڕاوە. فەرماندە بەڕێزەکانمان پەیمان و ئاگری و چاڤرێ بە ڕێزەوە بەبیردەهێنمەوە و سەرم دادەنەوێنم. جارێکی تر ئەو بەڵێنە دووبارە دەکەمەوە کە بە هەموو شەهیدانمان دابوو.

وەک دەزانرێت لە ئێستادا لەناو شەڕداین و ڕۆژانە شەهیدمان دەبێت. هەموو شەهیدانی زاپ و ئاڤاشین و مەتینا لە کەسایەتی هەڤالان نوژیان و شۆرشدا بەبیردەهێنمەوە؛ بە ڕێزەوە سەری ڕێز و نەوازش بۆ یادیان دادەنەوێنم. جارێکی تر ئەو بەڵێنە دووبارە دەکەمەوە کە پێمان دابوون. بەرخۆدانیان چووە ناو مێژووەوە و ئەم بەرخۆدانەش تاجی سەرکەوتنی لەسەر دادەنرێت و یادەوەری شەهیدانمان دەژیەنێتەوە.

رێبەر ئاپۆ خاوەندی ئەو هۆشمەندییە بوو

مێژووی ٤٤ ساڵەی پەکەکە وەک داستانێکە. لەو ٤٤ ساڵەدا ژمارەیەکی زۆر پاڵەوان و قارەمانی سەردەم لە زیندانەکان، لەسەر چیا و شەقامەکان هەڵسانە سەرپێ. چەندین داستان نوسراونەتەوە. مێژووی ئێمە بە بەرخودانە گەورەکەیەوە مێژوویەکی دەوڵەمەندە. ئەو بەرخودانە گەلەکەمانی لە لەناوچوون رزگار کرد و خستیەبەرچاو. سیاسەتی نکۆڵی، تواندنەوە و پاکتاوکاری لە کوردستان، لە کوردستان بێدەنگییەکی هاوشێوە مردن دروست کردبوو. گەلەکەمان تاریکی بەرسەدا سەپێندرابوو. لە وەها قۆناغێکدا هەڵوێستی رێبەر ئاپۆ هاتە ئاراوە. بەر لە ٥٠ ساڵ ئەمە روویدا.

رێبەر ئاپۆ لەو کاتەدا گەنجێکی تەمەن ٢٥ ساڵ بوو. وەک پێشەنگانی پێشووی کورد ئەوان نە کوڕە شێخ، ئاغا و دەرەبەگ نەبوو. ئەو کوڕی ماڵە هەژارێکی کوردستان بوو. بە رەنج و ماندووبوونی خۆی چووبووە زانکۆ و دەیخوێند. بەڵام ئەو لە راستی تێگەیشتبوو و بەدوایدا دەگەڕا. بەم جۆرە راستی ناسی و لە راستی کوردستاندا قووڵ بووەوە. بەم جۆرە دەستیپێکرد. نە پارەی هەبوو، نە کەسیشی بەدەورەوە هەبوو. نە دەرفەت و ئیمکاناتی هەبوو، لەناو بێ دەرفەتیدا ئەو دەستی بەم رێپێوانەی کرد. چی هەبوو؟ تەنیا هۆشمەندییەکی هەبوو، هۆگری بۆ راستی هەبوو، ئەو بڕوای بە خۆی و گەلەکەی هەبوو. تەنیا ئەو شتانەی بەدەستەوەبوو. رێبەر ئاپۆ بەر لە ٥٠ ساڵ بەو شتانە دەستی بە ڕێپێوانەکەی کرد.

هەر لە سەردەمی گروپی سەرەتاییدا روبەڕووی زۆر دژواری بوونەوە. بۆ نمونە، هەڤاڵ حەقی قەرار یاریدەدەری رێبەرایەتی بوو، بەڵام بۆ دابینکردنی بژێوی ماڵەکان لە دیلۆک، تێچووی پەروەردەی هەڤاڵان و بۆ کڕینی کتێب، کۆڵکێشی و حەماڵی دەکرد. ئەو و چەند هەواڵ لە بازاڕدا کۆڵکێشییان دەکرد. لە ئەدەنەش هەمان دۆخ هەبوو. بە وتەیەکی دیکە، لەناو هەژاریدا و لە دۆخێکدا لەسەر بنەمای رەنجی خۆی دەستی بە گەشتەکەی کرد. هەرچەندە لەو کاتەدا هیچ بەڵگەیەکی نوسراو و بەڵگەنامەیەکیش بوونی نەبێت، دەوڵەت ئاگاداری چالاکی ئەو گروپە بوو. دوژمن بیستبووی کە گروپێک هەیە خاوەنداری لە دۆزی کوردستان دەکەن و لەسەر ئەو بنەمایە لە چالاکیدان. هەر بۆ ئەوە فەرمانگەی شەڕی تایبەت کەوتە خۆی، گروپێکی بەکرێگیراو جێگیرکران. دەیانویست رێبەر ئاپۆ بکەنە ئامانج، بەڵام کاتێک نەیانتوانی خۆیان بگەیەننە ئەو، هەڤاڵ حەقی قەرار کە یاریدەدەری رێبەر ئاپۆ بوو، لە ساڵی ١٩٧٧ لە دیلۆک لە پیلانگێڕییەکدا شەهیدکرا. لەوێوە زانرا کە دوژمن ئاگاداری چالاکییەکانی گروپەکەیە.

رێبەر ئاپۆ بۆ بەرزراگرتنی یادی هەڤاڵ حەقی قەرار، بەرنامەیەک کە تا ئەو کاتە چوارچێوەکەی روونکرابووەوە، ئیتر نوسیەوە. بەم جۆرە کارەکانی بیردۆزی تەواو بوون و بە دەستپێکردنی خەباتی سیاسی سەردەمێکی نوێ دەستیپێکرد. رێبەر ئاپۆ ئەو کاتە وتی، "ئێستا خوێنڕژاوە، چیتر گەڕانەوەی نییە".

لە ساڵیادی شەهیدبوونی هەڤاڵ حەقی قەراردا، ئەمجارەیان لە حیلوان بە هاوکاری ئاغاکانی کوردی نزیک لە دوژمن، فاشیست و پۆلیسەکان خەلیل چاڤگونیان شەهید کرد. گروپەکە ئیتر لەسەر دووڕیانێک بوو. یان لەسەر ناوی گەل بڕیارێکی بدایە و خۆڕاگری بکردایە، یاخود وەک گروپەکانی تر هەندێک نەرمی بنواندایە و ستست بوایە، یاخود پاشەکشێی بکردایە. ئەو بژاردانە هەبوون. بەڵام ئەو گروپە پێداگر بوون، بەدەوری رێبەر ئاپۆوە کۆبوونەوە و بەم جۆرە لە ٢٧ی تشرینی دووەمی ١٩٧٨ لەو هەلومەرجەدا لە گوندی فیسی ناوچەی لجێی ئامەد بڕیاریاندا. لەو بڕیارنامەدا وتیان کە ' دەبێت ئێمە بەرخودانی نەتەوەیی بکەین، ئەمەش پێویستی بە پارتیبوونە؛ بۆ ئەوەی بەرخودان پێشبکەوێت دەبێت پارتی دابمەزرێت؛ ئەوانەی بەخۆیان دەڵێن ئێمە مرۆڤین دەبێت چاوی خۆیان بەسەر ئەوەدا نەنوقێنن'. لەبەر ئەوەی ئەو کاتە دوژمن هێرشی دەکرد و بڕیاری ئەوە ئاسان نییە. بۆ رێکخستن کردن و بەرزکردنەوەی ئەم بەرخودانە پەکەکە دامەزرا.

پەکەکە هێندەی ئەوەی بزوتنەوەیەکی نەتەوەییە، بزوتنەوەیەکی مرۆڤایەتیشە

پەکەکە وەک بزوتنەوەیەکی کوردستانی دامەزرا، بەڵام ئەمڕۆ سنوورەکانی کوردستانی تێپەڕاندووە و بووەتە بزوتنەوەیەکی هەرێمی کە ملیۆنان لایەنگری هەیە. ئێوە دەتانەوێت لەوبارەوە چی بڵێن؟

پەکەکە تا ئەو کاتە وەک بزوتنەوەیەک لە کوردستان نەبوو. رێبەر ئاپۆ لە زانستی هاوچەرخدا قووڵ بوو و ئەوە لە کوردستان جێگیرکرد. شرۆڤەیەکی کوردستانی ئەنجمدا. بەم جۆرە زانست و فەلسەفەی بەرەوپێش برد و قوڵی کردەوە. لەبەر ئەوە هێڵێکی دروست کرد. بۆ ئەوەی کورد لە دەست نەچن و ون نەبن، بۆ ئەوەی کورد هەبن و بە ئازادی بژین، ئەو بەرنامەیەی گۆڕی بۆ پارتی. بەڵێ، پەکەکە پارتییەکی نەتەوەییە و بۆ هەبوون و ئازادی گەلی کورد دەستی بە گەشتەکەی کرد، بەڵام ئەوەندەی نەتەوەییە، ئەوەندەش بزوتنەوەیەکی مرۆڤایەتییە. ئەو لە بری نەتەوە پەرستیەکی تەنگ، هزری گشتی خۆی بە بنەما دەگرێت. چەندە وڵاتپارێز بێت، ئەوەندەش ئینتەرناسیۆناڵیستە. خۆی هەر لە سەرەتاوە هەڤاڵانی ئینتەرناسیۆناڵیستی تێدان. واتە کوردستان لە ژێر هۆشمەندییەکی پاکتاودایە، بەڵام هەبوونی کوردستان لە خۆیدا لە رۆژهەڵاتی ناوەڕاست شۆڕشێک ساز دەکات. ئەو بیرکردنەوەیە لە سەرەتاوە بنەمایەکە. بە کورتی بەم جۆرە پەکەکە بەڵێ پارتێکی کوردستانییە، بەڵام پارتی عەرەب، تورک، فارس، ئەرمەن، ئاشوری-سوریانی و هەموو گەلانە. لەبەر ئەوەی پەکەکە دەیەوێت لەگەڵ ئازادی گەلی کوردستان گەلانی هەرێمەکە بگەیەنێتە ئاستێکی نوێ؛ لەناو گەلاندا یەکسانی، ئازادی و برایەتی دەخوڵقێنێت. لە سەرەتاوە ئەو بنەمایە هەیە. لەبەر ئەوەش لە سەر بنەمای وڵاتپارێزی و ئینتەرناسیۆناڵیزم خۆی پێش خستووە.

پەکەکە لە هەمان کاتدا پارتییەکی ژنانیشە. بۆجی؟ لەبەر ئەوەی پەکەکە لەبارەی ژن و ژیانی کۆمەڵایەتیدا بابەتی نوێی هێنایە بەرباس. شرۆڤەیەکی نوێی هێنایە ئاراوە. پەکەکە لە سەر بنەمای 'تا ژن ئازاد نەبێت کۆمەڵگا ئازاد نابێت' دامەزراوە. لەبەر ئەوە لە کوردستاندا رۆشناییە؛ شتێکی نوێیە. بۆ ئەوەی لەبەرامبەر دەرەبەگایەتی و کۆمەڵگای دواکەوتوودا ببێتە روناکی، بۆ ئەوەی ببێتە دەرمان و چارەسەر، نوێبوونەوەیەک بخوڵقێنێت و لە کوردستان رۆشنگەرییەک بەرەوپێش ببات دامەزرا. لەخۆیدا لە ماوەی ٤٤ ساڵی رابردوودا ئەمەی کردووە.

پەکەکە بزوتنەوەیەکی هزر و هەبوونە

شەڕی چەکداری پەکەکە لە کوردستان و هەرێمەکە چ گەشەسەندن و پێشکەوتنێکی سازکردووە؟

وەک پێشتریش باسم لێکرد، بەر لە دامەزراندنی پەکەکە لە کوردستان هێرش دەکرایە سەر گەل. خۆی لەناو ئەو هێرشانەدا پەکەکە دامەزرا. پێویستی بە پاراستنی رەوا هەبوو. لەبەر ئەوەش لە شێوازە بنچینەییەکانی هۆشمەندی پەکەکە و رێبەر ئاپۆدا پاراتسنی رەوا بوونی هەیە. هێزێک، نەتەوەیەک و هەموو زیندەوەران دەتوانن خۆیان بپارێزن.هیچ گیانلەبەر و کۆمەڵگایەک کە نەتوانێت خۆی بپارێزێت ناشتوانێت بژیت. واتە دەبێت هێرش نەکاتە سەر کەس و بتوانێت خۆی بپارێزێت. بەم جۆرە 'شەڕی گەلی درێژمەودا' کەوتە رۆژەڤ. پەکەکە ئەو ستراتیژەی لە مێژوودا بۆ خۆی بە بنەما گرت. بەڵام ' شەڕی شۆڕشگێڕیی گەل' لە بنەڕەتیدا خۆپاراستنە. واتە تۆ هێرش ناکەیتە سەر کەس، ئەو کاتەی هێرش دەکرێتە سەرت تۆ خۆت دەپارێزیت، لەبەرامبەر ئەو کەسانەی هێرش دەکەنە سەر بەهاکانت، تۆ بەها نەتەوەییەکانت دەپارێزیت.

پەکەکە لەم چوارچێوەدا پشت بە هۆشمەندی تێکۆشان و پاراستن دەبەستێت. ئەگەر تەنیا بوترێت کە پەکەکە ویستی شەڕی چەکداری بگەیەنێتە ئەنجام، ئەمە راست نییە. پەکەکە بزوتنەوەیەکی بیردۆزی، سیاسی و کولتورییە؛ بزوتنەوەیەکی هەبوونە، خاوەنی ئەندێشەیە. بەڵام لەهەناوی ئەو ئەندێشەدا ئەو تێڕوانینە بوونی هەیە کە دەبێت هەر زیندەوەرێک خۆی بپارێزێت. بۆ نمونە گەلەکەمان دەبێت داوا لە کەس نەکات بێن و بیانپارێزن. شەڕی گەل ئەوەیە کە گەل خۆی بپارێزێت و درێژە بە مانەوەی خۆی بدات. کەس ناتوانێت هەبوونی تۆ دەستەبەر بکات. تۆ خۆت دەی خوڵقێنیت و تۆ خۆت دەیپارێزیت! تۆ بۆ ئەوە خۆت بە رێکخستن بکە. گەر ئەوە پێویستی بە هێزی چەکداری هەبوو، دەبێت تۆ هێزی چەکدار ساز بکەیت، دەبێت گەل ئامادەبێت بۆ هەبوونی خۆی قوربانی و باج بدات. ئەو کۆمەڵگایانەی ئەمەیان کردووە، درێژە بە هەبوونی خۆیان دەدەن.

پەکەکە لەم چوارچێوەدا هەڵسوکەوتی لەگەڵ شەڕی چەکداریدا کرد. شەڕی چەکداری لە ناو پەکەکەدا شەڕێکی پاراستنە، نەک شەڕی هێرشکردن. خۆی و بەهاکانی دەپارێزێت، ئەمڕ وڵاتەکەمان داگیرکراوە؛ خاکەکەمان داگیرکراوە؛ دەست بەسەر ئاوەکەماندا گیراوە، زمانمان، کولتورمان قەدەغەیە، هێرشێک بۆ سەر گەلەکەمان لە ئارادایە. لەبەرامبەر ئەو هەموو هێرشەدا پێویست بە پاراستنێکی بیردۆزی، سیاسی، کولتوری، کۆمەڵایەتی و سەربازی هەیە. ئەوەی کراوە ئەمەیە. واتە تەنیا شەڕێک ئەنجام نەدراوە، لە بنەڕەتدا زۆر شت کراون. تێکۆشانی چەکداری تەنیا بەشێکیەتی. بەر لە هەموو شتێک پاراستنی کۆمەڵگای نوێی کورد کە ئێوە دایبمەزرێنن، گرنگە. بۆ ئەوەش ئەگەر هێرشی ئایدۆلۆژیکی، سیاسی، کولتوری و هەڵبەت سەربازی هەبێت، پاراستن بە رێگەی سەربازیش پێویستە. ئەو فەلسەفەیەی کە پەکەکە لەسەری بەڕێوەدەچێت ئەمەیە. دەبێت هەموو کۆمەڵگایەک بتوانێت خۆی بپارێزێت؛ مافی ئەوەی هەیە خۆی بپارێزێت و ئەمە مافێکی رەوایە. ئەوەی ئەمڕۆ لە کوردستان دەیکەین. بە هەموو شێوەیەک رێبەر ئاپۆ کاتێک کە هێرش نەدەکرایە سەرمان، بۆ نمونە کاتێک دەرفەتی چارەسەری سیاسی هەبوو، ئاگربەستی راگەیاند. تائێستا ٩ ئاگربەست راگەیەندراون. ئەوە ریشەی ئەم رامانەیە. گەر هێرشێک لەسەر تۆ نەبێت، پێویست ناکات تۆ هێرش بکەیتە سەر کەس. تۆ دەتوانیت تەنیا شێوازە سەربازییەکان لە پاراستندا بەکاربهێنیت. هزری سەرەکی پەکەکە ئەمەیە.

بەڵام ئەمە بەو تاوایە نایات کە ئەو پاراستنە بە شێوەی پاسیڤ دەکرێت. گەر پاراستن بە شێوەیەکی چالاک بکرێت، تۆ دەتوانیت سەربکەویت.. ئەوان پاراستنی چالاک وەک هێرش هەڵدەسەنگێنن، بەڵام لە راستیدا بەو جۆرە نییە. ستراتیژی پاراستنی بەها نەتەوەییە دیموکراتیکەکانە. ئەوەی ئەمرۆ دەکرێت ئەمەیە. سەرنج بدەنە سەر کۆلۆنیالیزمی تورک یاخود رژێمی ئاکەپە-مەهەپە، بۆ ئەوەی هەموو دەستکەوتەکانی گەلی کورد لەناوببات و نەک هەر لە باکوری کوردستان، لە تەواوی کوردستان سەربکەوێت، کۆنسێپتێکی نوێ پەیڕەو دەکات و لەسەر بنەمایەش بەڕێوەی دەبات. ٨ ساڵە درێژە بە هێرشەکانی بۆ سەر ئێمە دەدات. لەبەرامبەر ئەو هێرشانەدا ئێمە لە چوارچێوەی خۆپاراستندا "شەڕی گەلی شۆڕشگێڕی" بەڕێوە دەبەین. 'شەڕی گەلی شۆڕشگێڕی' بە هەموو جۆرێک خۆپاراستنی گەلە، داوای مافەکانی خۆی دەکات؛ هەموو شتێک بۆ هێزێکی چەکداری پسپۆڕ بەجێناهێڵرێت. هەموو کەسێک لە بواری پاراستندا شان دەداتە بەر بەشێک لە بارەکە، ئەرکی خۆی جێبەجێ دەکات. ئەو شتانە هەن کە گەریلا دەیکەن، ئەو شتانە هەن کە بزوتنەوەکانی ژنان بیکەن و ئەو شتانە هەن کە گەنجان دەتوانن بیکەن. شتیس هەیە کە بزوتنەوەی گەل دەتوانێت بیکات. ئەگەر هەر کەس خاوەنداری لە ئەرکەکانی خۆی بکات، لەم چوارچێوەدا شەڕی گەل دەستەبەر دەبێت. شەڕی گەل ئەمەیە. هەندێک کەس بە هەڵە لەمە تێدەگەن، دەبێت هەموو کەس ئەرکی خۆی جێبەجێ بکات.

ئەوەی لەئارادایە لوتکەی شەڕێ گەلی شۆڕشگێڕییە

ئەوەی کە تائێستا ئێمە کاری لەسەردەکەین ئەوەیە. لەم رووەوە هەندێک جار خەباتەکە وەک پێویستە و هەندێک جاریش کەموکوڕی دێنە ئاراوە. بەڵام ئێمە ناتوانین بڵێین کە ئێمە بە تەواوەتی 'شەڕی گەلی شۆڕشگێڕیمان' پێکهێناوە. زۆر کەموکورتی هەبوون و ئێمە گەیشتووینەتە ئەمرۆ. ئەوەی ئەمڕۆ لەسەرتاسەری باکوری کوردستان روودەدات و هەروەها لە زاپ، ئاڤاشین و مەتینا روودەدەن، لە 'شەڕی گەلی شۆڕشگێڕیدا' سەردەمێکی نوێ و لوتکەیە. دوژمن هێرش دەکات و دەیەوێت هێزە بەرگریکارەکانی کوردستان دەستبەربکات، لەناویان ببات، بەڵام ئەو هێزە خۆڕاگری دەکات ئەو هێزە لەبەرامبەر دوژمندا تێدەکۆشێت و شەڕ دەکات. ئەمەش دەریدەخات کە ئەو شەڕە پێیناوەتە قۆناغێکی نوێوە. ئەو شەڕەی ئەمڕۆ لە کوردستان لەئارادایە، لە چوارچێوەی شەڕێ گەلی شۆڕشگێڕیدا بەم جۆرە دەتوانرێت گوزارشتی لێبکرێت.

(دوژمن) لەبەرامبەر ئەمەدا تەنگی پێهەڵچنراوە و هەر بۆیەشە پەنا بۆ شێوازی نائەخلاقی دبات. دەوڵەتی تورک بە هیچ جۆرێک بە گوێرەی یاسا جیهانییەکان و یاساکانی شەڕ لە دژی ئێمە شەڕ ناکات و بە پێی ئەوانە ناجوڵێتەوە. بە گوێرەی یاساکانی خۆیشی ناجوڵێتەوە. بۆ نمونە ئەو سیاسەتەی ئێستا لە ئیمڕاڵی لە دژی رێبەر ئاپۆ گرتوویەتیەبەر بۆ مەگەر شتێکی یاساییە؟ نا. لەمەدا نە یاسا و نە ئەخلاق بوونیان نییە.یاسا گەردوونییەکان و ئەوانەی خۆیشی پێشێل کردووە. رێبەرمانی بە دیل گرتووە و بەردەوام لەبەردەم ئەشکەنجەی دەرونی رایدەگرێت. لە کوێی ئەمەدا ئەخلاق و یاسا بوونی هەیە؟ بۆ نمونە ٢٠ مانگە کەس نازانێت لەوێ چی روویداوە. ئاخۆ لە هیچ شوێنێکی تری دنیا شتێکی لەو جۆرە بوونی هەیە؟ نییە. ئەمەش دەریدەخات کە دەوڵەتی تورک لە دژی ئێمە، لە دژی هەڤاڵانمان لە زیندان و بەڕێوەبەری ئێمەدا یاسای پێشێلکردووە. مافەکانی مرۆڤی پێشێلکردووە. هەمان ئەو شتانەش لە دژی گەریلا دەکات. کاتێک ناتوانێت لە گەریلا بدات، گازی کیمیایی و چەکی قەدغە بەکاردەهێنێت. واتە ئەم دەوڵەتە مافەکانی مرۆڤ و یاسا گەردوونییەکان پێشێل دەکات و بەم جۆرە دەیەوێت کوردان لەناو ببات. بەڵام بەرخودانی گەلەکەمان و گەریلای ئازادیی کوردستان تادێت گەورەتر دەبێت. بە کورتی دوژمن ناتوانێت لەوە ئەنجام بەدەستبهێنێت و ئەو قۆناغە بەردەوامە.