ئەمرۆ لە شاری سلێمانی تەرمی دەرهێنەری سینەما، مەنسور کەریمیان کە لە ٢٣ی کانونی یەکەم/ دیسەمبر لە هێرشە داگیرکەرییەکانی دەوڵەتی تورک بۆ سەر شاری قامیشلۆ شەهیدببوو، بە مەراسیمێکی جەماوەری بەرەو شاری سنەی رۆژهەڵاتی کوردستان بەڕێکرا.

لە مەراسیمەکەدا ژمارەیەکی زۆر لە هونەرمەندان، رۆشنبیران، ئەندامانی رێکخراوەکان و حزبەکانی باشووری کوردستان، هەروەها ئەندامانی بنەماڵەی شەهید ئامادەبوون. مەراسیمەکە کاتژمێر ١٠:٠٠ لە بینای سینەما سالم لە شاری سلێمانی بە خولەکێک بێدەنگی دەستیپێکرد.

لە مەراسیمەکەدا وتار و هەڵبەست پێشکەشکران، کە تیایاندا ئاماژە بە رۆحی هونەری شەهید مەنسور کەریمیان کرا، هەروەها بە نوێنەرایەتی بنەماڵەی کەریمیان، سەید یونس کەریمیان وتەیەکی پێشکەش کرد و دواتر هۆنراوەیەکی لەبارەی برا شەهیدەکەیەوە خوێندەوە و سەرەخۆشی لە هەموو هاوڕێ و هاوخەباتانی مەنسور کەریمیان لە رۆژئاوا، باشوور و رۆژهەڵاتی کوردستان کرد.

لە مەراسیمەکەدا بێ پسانەوە دروشمەکانی وەک "شەهید نامرن"، "مەنسور نامرێت" و "فاشیست ئەردۆغان" وترانەوە.

دوای پێشکەشکردنی وتەکان تەرمی هونەرمەندی سینەماکار شەهید مەنسور مەریمیان بە کاروانێکی ئۆتۆمبێک بەرەو شاری سنەی رۆژهەڵاتی کوردستان بەڕێکرا.

هـ . ب