زیندانیی سیاسی جاهید ئابوکان ماوەی زیندانیکردنەکەى تەواو بووە و ئازادی ناکەن!
زیندانی سیاسی جاهید ئەبوکان، کە لە زیندانی ئەمنیی ئاستبەرزی جۆری ئێف-ی وان دایە، سەرباری ئەوەى ماوەى زیندانیکردنەکەى تەواو بووە، بەڵام بەرپرسانی دەوڵەتی تورک ئازادی ناکەن.
زیندانی سیاسی جاهید ئابوکان لە زیندانی ئەمنیی ئاستبەرزی جۆری ئێف لە وان زیندانیکراوە.
ئابوکان لەلایەن دەوڵەتی تورکەوە بە تۆمەتی "ئەندامبوون لە ڕێکخستن" و "پڕوپاگەندەکردن بۆ ڕێکخستن" سزای ١٢ ساڵ زیندانیکردنی بەسەردا سەپێنرابوو. لە ١٤ی کانوونی دووەمی ٢٠٢٢دا ئەو سزایە کۆتایی پێهات، بەڵام سەرباری ئەوەش بە پاساوی راپۆرتی "چاودێریی گشتی و ئیداری زیندانەکە" ئازاد ناکرێت.
پارێزەر ئۆزکان: تاوان ئەنجام دەدرێت
سەروەت ئۆزکان پارێزەری جاهید ئابوکان ڕایگەیاند، ئەو سزایەی بەسەر موەکیلەکەیدا سەپێنرابوو کۆتایی پێهاتووە، بۆیە دەبوایە ئێستا ئازاد بکرایە، بەڵام بەڕێوەبەرایەتیی زیندانەکە تاوانی بەرامبەر ئەنجام دەدەن و هێشتا لە زینداندا رایانگرتووە.
"سکاڵامان تۆمار کردووە"
ئۆزکان وتی: "موەکیلەکەم بە بیانوی میزاجیانە ئازاد ناکرێت. ئێمە لە دژی بڕیاری بەڕێوەبەرایەتیی زیندانەکە وەستاوینەتەوە و سکاڵامان لە دژی ئەندامانی لیژنەکە تۆمار کردووە. ئێمە تاوەکو ئازادکردنی موەکیلەکەم بەردەوام دەبین لە بە دواداچوونەکانمان بۆ ئازادکردنی".
ژ.ت
