له سنووری پیرانشار كۆڵبه‌رێك كوژرا
پاسدارانی ئێران له‌سه‌ر سنووری پیرانشاری ڕۆژهه‌ڵاتی كوردستان ده‌ستڕێژیی گوله‌یان له كۆڵبه‌ران كرد. له ئه‌نجامدا كۆڵبه‌رێك كوژرا.
به‌ره‌به‌یانیی ئه‌مڕۆ پاسدارانی ئێران له‌نێوان پیرانشار و كوێستانه‌كانی گۆرته‌سێی قه‌ندیل ده‌ستڕێژیی گوله‌یان له كۆڵبه‌ران كرد و له ئه‌نجامدا كۆڵبه‌رێك كوژرا.
ئه‌و كۆڵبه‌ره‌ی كه ژیانی له‌ده‌ستداوه ناوی حاسل بادبرین (١٨ ساڵان)ه و خه‌ڵكی گوندی ته‌ركشه. هه‌ر له ئه‌نجامی ئه‌و هێرشه‌دا ٥ مانگای كۆڵبه‌ران له‌ناوچوون.
پاسدارانی ئێران به‌رده‌وام له‌سه‌ر سنوور هاوڵاتییان ده‌كوژن، به‌ڵام تا ئێستا هیچ یه‌كێكیان سزا نه‌دراوه. ساڵانه به‌هۆی ئه‌و هێرشانه‌وه ده‌یان كۆڵبه‌ر له‌سه‌ر سنووره‌كانی ڕۆژهه‌ڵاتی كوردستان ده‌كوژرێن و بریندار ده‌بن.
به گوێره‌ی ئاماری ماڵپه‌ڕی كۆڵبه‌ر نیووز له ماوه‌ی ٤ مانگی ڕابردوودا، نزیكه‌ی ٣٠ كۆڵبه‌ر له لایه‌ن پاسدارانی ئێرانه‌وه كوژراون و لایه‌نی كه‌م ٥٥ كۆڵبه‌ریش بریندار بوون.
s.m
