دمابەدمای شەهیدبییەی دیار غەریب ئەندام جە کۆنسەو سەرۆکایەتیی گردیی کۆما جڤاکێن کوردستان (کەجەکە-KCK)ی و ۋەڵاکەردەی شەهیدبییەکەیش، جە شارو سلێمانیێ پەرسەش پەی گیریان و ئارۆ دووە شەممە یەکەم ڕۆو پەرسەکەیشەن.
جە سەرسەبای ئارۆیەۋە، جە شارێ و ناوچەکێ کوردستانی وارینی جەماوەر دەستە دەستە و بە ڕاپیمای و شێۋازی جیا جیا پەی بەشداری جە پەرسە و ماتەمینەکەی سەردای سلێمانیێ مەکەرانە و سەرەڕا سەردای مزگی ئەحمەد حاجی عەلی کە یاگێ پەرسەکەیشەن، هاموەخت یانە و بنەماڵەو شەهید دیاری جە گەڕەکەو بەختیاری بەسەر مەکەرانێۋە.

جە یەکشەممە تا ئیسە کە کەجەکە شەهیدبییەی دیار غەریب-یش ئاشکرا کەردەن، خەمگینی و ماتەمینی ۋەراۋەر بە شەهیدبییەکەیش سەرتاسەرو کوردستانیش گێرتەنەۋە و بەتایبەتی کاتێ ئاشکرا بییەن کە شەهیدکەردەکەی پیلان پەیکریا بییەن و سیخوڕێ و نۆکەرێ کوردێ هامکارێ ڕژێمە کوردکوش و ئەرەگێرەکەو تورکیای بیێنێ خەڵکی فرە توڕەو بێزارەن و نەفرەت و نەفرین جە کوشەرەکانش و نۆکەرە کوردەکان مەکەرانە. هاموەخت خەمگینی و ماتەمینیەکە جە تۆڕە کۆمەڵایەتیەکانە بەفراۋانی ڕەنگش دانەۋە و جەی چوارچێۋەنە سەدان هەزار کەسێ بە فاڕای ۋێنێ پرۆفایلەکانشان بە ۋێنێ شەهید دیار غەریبی، بەنۋیستێ و کۆمێنتێ و نیارەی ۋێنێ شەهیدی، سەبارەت بە شەهیدکەردەکەیش هامخەمی و بێزار ی و تۆڕەی نیشانە مدانە و بکوشەکانش ڕووسیاۋێ مەکەرانە. هامکات ۋازیارێنێ تا سەرجەم و کورد و پارتە ئازادیخۋازەکێش پێۋەرە دژ بە ئەرەگێرتەیی و تاۋانەکێ تورکیای و خیانەتی وێیی بمدرانێۋە و کوردستانی ۋنەشان پاک بکەرانێۋە.

دیار غەریب ئەژناسیا بە هەڵمەت ئەندام جە کۆنسەو سەرۆکایەتیی گردیی کۆما جڤاکێن کوردستان (کەجەکە-KCK)ی و دووێ گەریلێ هامڕێش، ڕۆو ٥و ئەی مانگۍ جە قەندیل بە بۆردومانو باڵەپڕە جەنگیەکێ تورکیای شەهیدێ بیێنێنێ و جەی بارەۋە کۆما جڤاکێن کوردستان ۋەڵاکریاش دابێ و جە میانشەنە سەرەڕاو ستاییشی فرەی پەی کار و کۆشاییشی ئازادی هامڕا دیار غەریب (هەڵمەت)-ی ئاشکراش کەردەبێ و دەستنیشانش کەردەبێ: "شەهیدکەردەی هامڕا هەڵمەت-ی پیلان پەیکریا بییەن و سیخۆڕێ دەستگاو میتی تورکی و کوردێ نۆکەرێ بەشدارێش بیێنۍ پۆکەی دڵنیایی مدێمێنە شەهیدبییەی هامڕا هەڵمەتی بێ وەڵام نمەبۆنە و تۆڵەش مەکەرمێنەوە".