مانگرتووەکان بە شایی و ئاھەنگ نەورۆزیان پیرۆز کرد و داوای دەستوەردانی بەپەلەی ھێزە نێودەوڵەتییەکانیان کرد بۆ وەستانی ئەو کۆمەڵکوژییەی بەرامبەر ھاووڵاتیانی عەفرین ئەنجام دەدرێت.

پەرلەمانتارانى هەدەپە، هاوسەرۆک شارەوانییەکان، نوسەران و ڕۆژنامەنووسان لەبەردەم بینای سەرەکیی نەتەوە یەکگرتوەکان لە ژنێڤی سویسرا، لە پێناو ڕێگریکردن لە کۆمەڵکوژکردنی ھاوڵاتیانی سڤیلی عەفرین داواکارن بە پەلە نەتەوە یەکگرتوەکان سنوورێک بۆ ھێرشە و بۆردومانەکانی سوپای تورکیا دابنێت و ئاسمانی عەفرین بەڕوی فڕۆکە جەنگیەکانی تورکیادا دابخات.

مانگرتنەکە لە رۆژى دووشەممەوە بەردەوامە و تیایدا دروشمەکانى "بژى بەرخۆدانى عەفرین"، "هەموو شوێنێک عەفرینە و لە هەموو شوێنێک بەرخۆدان"، "نەتەوە یەکگرتووەکان نەبە بە هاوبەشى تاوان" و "داگیرکەرییەکەى ڕاوەستێنن"یان بەرزکردبووە.

لقى گەنجانى حزبى سۆسیالیستى سویسرا (JUSO) سەردانى مانگرتووانى کرد و ڕایانگەیاند، پشتگیرییان بۆ گەلى کورد زیاتر و بەهێزتر دەکەن.

هەروەها ستیڤان دیمستورا نوێنەری نەتەوە یەکگرتوەکان بۆ کاروباری سوریا، سەردانی مانگرتوەکانی کردووە و داواکاریەکانی لێوەر گرتون.

داواکاری پەرلەمانتارە مانگرتوەکان بریتییە لە :-

-           دانانی ناوچەی دژە فڕین لە ئاسمانی سوریا

-           ناردنی شاندێک لە نەتەوەیەکگرتوەکانەوە بۆ چاودێریکردنى دۆخی عەفرین

-           مانگی سوری نێودەوڵەتی ھاوکاری بگەیەنێتە لێقەوماوانی عەفرین و بە ئەرکی مرۆیی خۆی ھەستێت

-           زەمانەت و گرەنتیى گەڕانەوەی ئاوارەکان بکرێت بۆ نێو شاری عەفرین

-           ڕێگری لە گۆڕینی دیموگرافیای عەفرین بکرێت و ڕێگا نەدرێت کەسانى تر جگە لە هاووڵاتیانى عەفرین، لە عەفرین نیشتەجێ بکرێن

-           دروستکردنی لیژنەیەکی پسپۆڕی نێودەوڵەتی بۆ کۆکردنەوەی بەڵگەکانی کۆمەڵکوژکردنی خەڵکی عەفرین و پێشکەشکردنی بەڵگەکان بە دادگای نێودەوڵەتی.

ک.ئ

ر.م