بۆ ڕێپێوانی گەورەی کۆڵن کە لە ١٦ی تشرینی دووەمدا لە شاری کۆڵنی ئەڵمانیا لە چوارچێوەیی هەڵمەتی "ئازادی بۆ عەبدوڵا ئۆجالان، چارەسەری سیاسی بۆ پرسی کورد"دا بەڕێوەدەچێت، ئامادەکارییەکان بەردەوامە و بانگەوازی لەگەل دەکرێت بۆ بەشداربوونی بەهێز. لەو بارەیەوە هاوسەرۆکی کۆنگرەی کۆمەڵگەی دیموکراتیکی کورد لە ئەوروپا (کەجەدەکە-ئە) ئەنگین سەڤەر بۆ ئاژانسمان قسەیکرد و ئاماژەی بەوەدا بۆ بەشداری و گڕوتینی ڕێپێوانەکە هەموو جۆرە ئامادەکارییەکیان کردووە.

لە قسەکانیدا سەڤەر سەرنجی خستەسەر سڵاوەکەی ڕێبەر ئاپۆ کە ئاڕاستەی گەل و ڕای گشتی کرد و ئەمەی وت: "بێگومان سڵاوەکە جۆشوخرۆشێکی زۆری پێداین. ڕێبەرێتی ئاماژەی بەوەکرد کە 'گۆشەگیری بەردەوامە' ئەمەش وامان لێدەکات بۆ شکاندی گۆشەگیری هەموو هەوڵێکی خۆمان بدەین و بەرفراوانتری بکەین. بۆیە داوا دەکەین بە چالاکی ١٦ی تشرینی دووەم تێکۆشانێکی گەورە بەڕێوەبەرین." سەڤەر ڕاشیگەیاند دەبێت هیچ کەسێک پاساوی ئامادە نەبوونی نەبێت و بێگومان بۆ شکاندی گۆشەگیری دەبێت بە ملیۆنان لە گۆڕەپانی کۆڵندا بین.

'خاوەنداری لە ڕێبەرتی بکەین'

لە بەردەوامیدا سەڤەر دەستنیشانیکرد لەهەر بارودۆخێکدا بین پێویستە بۆ ئازادی جەستەی ڕێبەر ئاپۆ تێبکۆشین و ئاوا بەردەوامی دا بە قسەکانی: "لەسەر ئەم بنەمایە دەبێت خاوەنداری لە ڕێبەرێتی بکەین و بڕژێینە گۆڕەپانەکانی ڕێپێوانی ١٦ی تشرینی دووەمەوە و هەموو کەسێک بەو تێگەشتنەوە بجوڵێتەوە."

لە کۆتاییدا سەڤەر بانگەوازی لە هەموانکرد، بە روحی سەفەربەرییەوە لە ١٦ی تشرینی دووەمدا لە کۆڵن ببن. بەم باوەڕدارییەوە کۆتایی بە گۆشەگیری بهێنن.