وەزارەتی کاروباری دەرەوە، بە ڕاگەیاندراوێک ئاماژەی بەوە کرد، بەریتانیا و ئەمریکا و کەنەدا و ئوسترالیا  پێکەوە سزایان بەسەر بەرپرسانی ئێران سەپاندووە.

وەزارەتەکە دووپاتی کردۆتەوە، سزاکانیان بەسەر ئەو بەرپرسانەدا سەپاندووە کە بەرپرسیارن لە ئامادەکردن و جێبەجێکردنی یاسای باڵاپۆشی لە ئێران.

ئەم سزایانە بە تایبەتی وەزیری چاند محەمەد مەهدی ئیسماعیلی، جێگرەکەی محەمەد هاشمی، سەرۆکی شارەوانی تاران عەلی ڕەزا زاکانی و وتەبێژی پۆلیس سەعید مونتەزەر ئەلمەهدی دەکاتە ئامانج.

لە ڕاگەیاندراوە ڕۆژنامەوانییەکەدا شوێنێک بۆ بۆچوونەکانی جەیمس کلێڤەرلی وەزیری کاروباری دەرەوەی بەریتانیا تەرخانکرابوو: "ساڵێک دوای کوشتنی مەهسا ئەمینی (ژینا ئەمینی) لەلایەن پۆلیسی ئەخلاقی ئێرانەوە، سڵاو لەو ژنانە ئێرانییە دەکەم کە لە پێناو ئازادیدا تێکۆشان دەکەن".