دماو ئانەی کۆمیسیۆنی باڵاو سەربەخۆو هۆرچنیەکا عێراقی ئەنجامو دەنگدایش پەی خولی ششەمو پەرلەمانو کورڎەسانی ئەرەیاۋنا، سەرۆکو یەنەکەی، بافڵ تاڵەبانی پەیامێوەش وەڵا کەرڎۆ.

بافڵ تاڵەبانی سوپاسو جەماوەری مکەرۆ و ماچۆ ۋێما بە قەرزارتا مزانمۍ، ماچۆ: "دڵنیایچتا مکەرمۍ هەنگامەکێما بەرەو راسکەردەیۆ ڕاڕەوی غەڵەتو حوکمڕانی چالاکتەر مکەرمۍ".

بافڵ تاڵەبانی ئاماژە پانەی مکەرۆ چی هۆرچنیەنە نزیکەو ٢٠٠ هەزار دەنگا زیاڎشا کەرڎەن، ماچۆ: "فەخر مکەرمۍ کە جە سەرەتاوە بەشێوە گرنگۍ ئا هەوڵا بێنمۍ پەی لوایڕاوەو پرۆسەو دەنگدایۍ بێگەرد و دوور جە دەسوەردای، بەپێچەوانەو ئا هەوڵە شکسواردەی کە مەرامەکەش پەی دما وستەی و پەکوستەی پرۆسەکەی بۍ".

جە درێژەنە بافڵ تاڵەبانی ماچۆ: "سەردەمو فەرزکەردەی ئیرادەی دمایش ئاما و قۆناغێوە تازە جە پرۆسەو حوکمڕانی و ڕاوەبەردەی دەسپنەبکەرۆ، دماجار ویستو تازەبیەیۆ و دادپەروەری سەرکۆت و ئەرکە گرنگەکە جە ئارۆوە دەسپنە مکەرۆ کە ئاڎیچ پێشکەشکەردەی خزمەتگوزاری، زامنکەردەی مەعاشی و قەوەتکەردەی ئەرەمەرزیا یاساییەکا هەرێمو کورڎەسانیا".