بە دەستپێشخەریی ئەنجوومەنی گەلی کورد لە لیڤەرپوول، بە ئاهەنگێک ٤٦ـەمین ساڵیادی دامەزراندنی پەکەکە پیرۆز کرا، هاوکات بە بەیاننامەیەک هێرشی پۆلیس بۆسەر کۆمەڵەی کوردی لە لەندەن و دەستگیرکردنی چەند ئەندامێکیان شەرمەزار کرا.

لە سەرانسەری جیهاندا بە بۆنەی ٤٦ـەمین ساڵیادی دامەزراندنی پارتی کرێکارانی کوردستان-پەکەکە، ئاهەنگی پیرۆزبایی بەڕێوەدەچێت، لەو چوارچێوەیەشدا بە دەستپێشخەریی ئەنجوومەنی گەلی کورد لە شاری لیڤەرپوولی بەریتانیا، بە ئاهەنگێک ساڵیادەكە پیرۆز کرا.

دەستپێکی یادەکە خولەکێک بێدەنگی بۆ شەهیدانی کورد و کوردستان دەستی پێکرد، دواتر پەیامەکانی ئەنجوومەنی لیڤەرپووڵ و ئەنجوومەنی سکۆتلەندی کۆمەڵەی گەلی کورد خوێنرایەوە.

دواتر لە لایەن گرووپی شەهید بێریتان چەند پارچە میوزیک و گۆرانییەک پێشکەش کرا، هەروەها گرووپی ڕەنگی وڵات بە گۆرانی و هەڵپەرکێ ئاهەنگەکەیان بەجۆشتر کرد .

لە کۆتاییدا لە بەیاننامەیەکدا بۆ ڕای گشتیی بە زمانی کوردی و ئینگلیزی هەڵکوتانە سەر کۆمەڵەی کوردی لە لەندەن و دەستگیرکردنی چەند ئەندامێکیان لەلایەن پۆلیسی لەندەنەوە شەرمەزار کرا.

بە وتنەوەی درووشمەکانی "پەکەکە گەلە گەلیش لێرەیە، بژی سەرۆک ئاپۆ، شەهید نامرێت" کۆتایی بە ئاهەنگەکە هات.