یانەو موزیکی جە پاۋە شارو ناوچەو لهۆنی سەر بە هەرێمو هەورامانی، مەراسیمێ شکۆدارش پەی ڕێزگێرتەی جە هونەرمەند و ئوسای ئەفسانەیی گۆرانیێ وسیاچەمانەی "ئوسمان هورامی" ڕێکۋست.

جە مەراسیمەکەنە، کە هەزاران کەسێ جە دلێ و بەر جە ساڵۆنی ئامادێ بێننێ، چەنڎین چالاکیێ ئەدەبی و هونەریێ ئەنجامێ دریێ و چنڎین کەسێ قسێ و باسێشان سەبارەت بە گۆرانی ۋاچی ناۋازەی ئوسمان هەورامی و تۋانایی و گەورەیی هونەرەکەیش و کەسایەتیش کەردشان و ستاییشی فرەشان کەرد. هاموەخت ڕۆڵ و کاریگەری هونەری و گۆرانی هەم جە ئاستی ناوچەیی و هەم جە ئاستی جیهانی بەفراۋانی هۆرسەنگنایش پەی کریا کە ئوسمان هەورامی سەرقافڵەش بیەن و هەورامان بە هەرێمێ دەوڵەمەند جەی بوارەنە بەنامێ کریا.

هەرپاسە جە مەراسیمەکەنە پاۋە بە پایتەخو هونەر و موزیکی جە وەرنشینو ئێرانی بەنامێ کریا و گۆرانی ۋاچێ و موزیسیەنێ پاۋەی و هەورامانی و کوردستانی بە چنڎین بەرهەمێ، هونەرنمایی وێشان نمانییش کەرد. 

دماتەر بەشێ جە دیکۆمەنتاریێ کە جەلاو پەروێز ڕۆستەمی، بەرئاۋەر و ئوسای نامی هەورامانی و ئێرانی پەی "ئوسمان هەورامی"ش ئامادەکەردەبێ نیشانە دریا.

دیسان ژمارێ شاعرێ و هۆزانۋانێ هۆرامانی و کوردستانی بە شعرەکانشان ساتییش و سپاسگوزاری وێشان پەی ئوسمان هەورامی بەرۋست و مەراسیمەکەشان زیاتەر ڕازناۋە.

دماتر دلێ چەپڵەڕێزان و جۆش و خڕۆشو بەشداربیەکانە ئوسا و گۆرانی ۋاچی ئەفسانەیی لۋا سەرو سنی خەڵات کریا.

مەراسیمەکە دمای زیاتەر جە ٥ ساعتان بە چەپڵەڕێزان و موزیک و گۆرانیێ کۆتاییش ئاما.

گبە ۋێنێ مەراسیمەکەی ۋیندێ...

 

                                                                    . .                                                                    

 

٭ۋێنەکێ جە "پاۋە پرێس"ی و "سلام پاۋە"ی وەرگێریێنێ.