شەنگال: شکۆمەندانە تەرمو شەهید مام زەکی شەنگالی ئەسپەردە کریا
جە شەنگال بە مەراسیمی شکۆدارانە تەرمو شەهید مام زەکی شەنگالی، ئەندامو کۆردیناسیۆنو جڤاکی ئێزیدی و ئەندامو کۆنسەو ڕاۋەبەری کەجەکەی، بەبەشداری هەزاران کەسان ئەسپەردە کریا.
ئەندامو کۆردیناسیۆنو جڤاکی ئێزیدی و ئەندامو کۆنسەو ڕاۋەبەری کۆماجڤاکێن کوردستانی-کەجەکە، کە ۱٥و ئابی جە ئاکامو بۆردومانو فڕۆکە جەنگیەکانو تورکیای شەهیدی بیەبێ، دمانیمەڕۆ ئارۆی تەرمەکەش جە خانەسۆرەۋە بە کارەۋانی هەزاران کەسی بریا سەردەشت جە چیاو شەنگالی. دماتر تەرمەکەش جە دەگاو کۆلکای بەڕاپیمایی بریا مەزارگەو شەهیدانو دڵگەشی و بەرخودانی و بە مەڕاسیمێ شکۆمەندانە ئەسپەردە کریا.
جە مەراسیمەکەنە هامسەرە، کوڕ و برا و بنەماڵەو زەکی شەنگالی و هەزاران کەسێچ جە مەخمور و پانیشتو کوردستانی ئامادێ بێنێ و دلێشەنە جەماوەر یەکپارچە دروشمێ چوون، شەهیدێ نەمرێنێ، درێژەدەرێ ڕێبازەکەو مام زەکی شەنگالی-یەنمێ و تۆڵەت مەکەرمێۋە، ۋاچیێۋە.
هەرپاسە جە مەرازگەکەنە، شەڕڤانێ یەبەشە و یەژەشەی ڕێوڕەسمی سەربازیشان پەی ڕێزگێرتەی جە شەهیدی نەمر زەکی شەنگالی ئەنجام دا.
دماتەر زەردەشت شەنگالی، فەرماندە جە یەکینەکانو یەبەشەی قسێش کەردە و ۋاتش: ئێمە سەرەوەشی جە وێمان و بنەماڵەو مام زەکی و سەرجەم گەلو کوردی مەکەرمێنە. مام زەکی کە ستون و کۆڵەکێ ئێزیدیەکانی بێ بە هێرشێ تەرسەزاڵانە شەهید کریا. مانگو ئابی پەی ئێمە مانگەو کومەڵکوشیەکانە. جە کەسایەتی مام زەکی شەنگالیەنە گەرەکشانە سەرجەم ئێزیدیەکان قڕ و کۆمەڵکوش بکەرانە. چونکە مام زەکی پەی یەکێتی و پارێزنای و ڕێکۋستەی ئێزیدیەکان نەمانیایانە ۲٤ سەعاتێ کۆششنە بێ و هوڵ پەی یەکێتی حزبەکان و گلێرگەی دێنە.
زەردەشت شەنگالی، بەڵێنش دا، تا بەدی ئاۋردەی ئامانج و ئاۋاتەکانو مام زەکی شەنگالی، جە خەباتی و کۆشای ئازادی کۆڵە نەڎانە و ۋاتش: بێجگە جە مردامانی هیچ ڕێ و ڕێبازێ تەر نییەن ئارانە.
دماتەر هامسەرومام زەکی شەنگالی بەنامێ بنەماڵەکەیشانەۋە قسێش پەی ئامادەبیەکانی کەردێ و سەرەتا سەروەشیش جە ڕێبەر ئۆجالانی، گەریلای، هاۋەڵەکانو شەهیدی و گەلۆ کوردی کەرد و ۋاتش: ئێمە هەرگیز دەستبەردارێ دۆزەکێمان نمەبێمێ و هەرگیز دوژمن بە شەهیدکەردەیمان نمەتاونە چەمتەرسێنمان بکەرۆنە.
هەرپاسە هەر یۆ جە، سوڵتان یڵدز بەنامێ کەمپو شەهید رۆستەم جودی و بنەماڵەو شەهیدانو کەمپەکەی و فەرید حەربۆ هامسەرۆکو گردیی ڕاۋەبەری شەنگالی جە مەراسیمەکەنە قسێشان کەردێ و سەرەڕا شەمەرازکەردەی تورکیای و نۆکەرەکانش، ئاماژەشان بە ڕۆڵ و جایگەو شەهید زەکی شەنگالی جە خەبات کوردستانی و ئێزیدخانیەنە دا و سپاس و ساتییشان ئاڕاستەو مێمانەکان کەرد کە جە دورەوە تەشریفشان بەردەبێ شەنگال، بەتایبەتی سپاسی فرەو خەلکو ڕۆژئاڤاو کوردستانی کریا کە تا نزیکو شەنگالی ئاماێ بێنێ، بەڵام بە هۆو ڕاگیری حکومەتو ئێراقی نەتاۋابێشان جە مەڕاسیمەکەنە بەشدارێ ببانە.
یاگێ باسیەن، یەکشەممە جە سەردەشتو چیا شەنگالی پەرسە و سەرەوەشی پەی مام زەکی شەنگالی منریۆرە و ۳ ڕۋێ درێژەش مەبۆنە.
