چالاکیی و ناڕەزاییەکۍ جە ١٦و ئەیلولو ساڵەو پاری و دماو ئانەی جە لایەنو پۊلیسو ئەخلاقیوە "ژینا ئەمینی"ە گەشمەرڎۍ کریا، دەسشا پنەکەرڎ و بە خێرایی تەمامو وڵاتەکەیش گېرتۊ.

چا سەرهورڎاو گەلینە کەبە نامۍ ئاخێزو "ژەنۍ، ژیای، ئازاڎیی"وە ئەشناسیا، جە مانگەکا ئەۋەڵینە فرەتەرین ژمارەو گیانبەخشای ۋێنیشاندەرا تۊمار کریان.

بە پاو ئامارەکا رێکوزیا مافەکا مرۊڤو ئێرانی جە ماۋەو ٢٠٠ ڕوۋانە لانیکەم ٥٣٧ کەسۍ جە لایەنو هێزەکا دۊڵەتیۋە گەشمەرڎۍ بیێنۍ.

جە مانگەو ئەیلولیەنە ٢٢٣ کەسۍ گەشمەرڎۍ بیێنۍ، جە تشرینی یوۋەمەنە ١٠٠ کەسۍ، جە تشرینی دوۋەمەنە ١٧٣ کەسۍ گەشمەرڎۍ بیێنۍ. حەرپاسە جە مانگەو کانونی یوۋەمیەنە ٢٥ کەسۍ جە ۋێنیشاندەرەکا گیانشا بەخشان.

چۋار ۋێنیشاندەرۍ دریێنۍ قەنارە و حەر جە ماۋەو ۋێنیشانداکانە ٣٠٩ زینڎانیۍ تەرێچ ئا سزێشا سەرەرە جا بەجۍ کریان، کە ١٨٠ کەسێشا تۊمەتو بازرگانی مادڎەو هۊشبەریشا دریابۍ پاڵ.

رێکوزیاو مافو مرۊڤی ئێراننە ئەرەیاۋناش، جە "کۊمارو ئیسلامی ئێرانینە سزاو جە داردای پېسە مەڵامەتۍ تۊقنای و تەرسناو خەڵکی بەکارمېنە و داواش کەرڎ گلېرگەی میان نەتەوەیی هەڵوێس ۋەران ۋەر بە جا بەجۍ کەرڎەو ئا سزێنە بگېرۊنە ۋەر.

جە ما بەینو ١٧-٣٠ی ئەیلولی ٥ کەسۍ، جە تشرینی یوۋەمەنە ٣٠ کەسۍ، جە تشرینی دوۋەمەنە ٥٧ کەسۍ و جە کانونی یوۋەمەنە ٧٢ کەسۍ دریێنۍ قەنارە.

هـ . ش