•  جەنگوو ناوخۆی (دلێنە)  زیاتەر جە ٣٦ هەزار پیشمەرگا و هاموەڵاتا کوشیێنێ و بێسەرووشۆنێ کریێنێ، هەق هەن گردوو شار و شارەکڵاو هەرێموو کوردسانینە پەیکەروو شەرمەزاری وەش بکریۆ و ساڵانە ٣١و ئابینە پێسەو بۆنێوە 'خیانەتی نیشتمانی'ی بکریۆوە!
  دماو ڕووەدای ٣١و ئابیوە، پێسەو ڕۆنامەنویسێوە سەربەوێ، ساڵانە ئی یادەیە هۆش موزووە، چونکوم ئێشێوەن هۆش نمەشۆوە، ئاخر ئانە کە کەرد٣١و ئابینە بە کوردیش کەرد، دوژمنی پەنە نەکەرد. ٣١و ئابی خەڵکی بێتاوان و خەڵکی کۆسەرش دلێنە خەڵەتیا و بەکوشت دریا، تا بەرژەوەندیی حیزبی و ملەملێ پۆستی و یاگێ و ئەرەگیرکەردەی داهاتوو سەروو زەمینی و چێروو زەمینوو مەنتێقەکەی. دەسەڵاتداراو هەرێموو کوردسانییادوو گردوو ئا بۆنە نیشتیمانی و زەرەەروەنەکەوتا مکەراوە، کە ملو گەلوو کوردیرە ئامێنێ. ٣١و ئابی و جەنگوو دلێ و جەنگوو دلێچ بەشێوەن چا کارەساتا سەردەموو بەعسینە و ویەردەو دیکتاتۆرەکانە ڕووەشا دێنە، پەنەوزا ٣١و ئابی بکریۆ بە ڕوێوی تایبەت ساڵەنە و بێ جیاوازی یاد بکریۆوە. جە ساڵیادوو ئا ڕوەینە سەرەو ڕێز و نەوازشی مکۆمنمێرە پەی گردوو گەشمەردا ئانێ کە پەی کوردی و کوردسانی کۆشیێنێ و بەشدارێ بیمێ جە خەموو کەسوکاریشانە.  با پێوە چی یادە نیشتمانی و نەتەوەیەتییەینە بەشدارێ بیمێ و چونکوم ٣١و ئابی یادێوە کارەساتبارا، با هامشێوەو هەڵەبجەی و ئەنفالی یاد بکریۆوە، با یەرە ڕۆو ئاخروو هەفتەی دماینوو مانگەو ئابی بکریۆ بە پشووی ڕسمی هەرێموو کوردسانینە و ڕۆی ماتەمینوو شکۆی گردینی.
  لایەنەکاو پانیشتی ساڵێوەنە دەیان بۆنێ نیشتمانیێ و کەسایەتییانێ مکەرانە بە مڵکوو وێشا و بە داهاتی گردینە یادش مکەرانێوە، حەر بۆنێوە زەرەر بیاونۆ بە پلێ و کەسایەتییشا ومەیلوو داواکاریی وێشاش سەر نەبۆ، ئاماژەش نمەدانێ پەنە. ٣١و ئابیچ بۆنێوی نیشتیمانییا و بە هەزارا شۆرشگێڵنێ و پێشمەرگێ گیانبەخشێش چەنەبێنێ و کەمئەندامێ و زەرەێوە فرەشا وەرکەوت. ئشیا گرد شارو شارەکڵێوەنە پەیکەروو شەرمەزاری وەش کریێ و ساڵانە پەردەی سیاوو شەرمەزارییش سەر وردریێوە، تاوانەکێ هامسەنگێ کریێنێ و بکەراو ٣١و ئابی حەر پلەوپۆستێوەن بینێ سزا دریێنێ.

٣١و ئابینە پارتی دیموکراتوو کوردسانی سەرکەوتەی جەنگوو براکوشییش بە پەشتیوانیی رژێموو بەعسی وڕیای ئەرەیاونا، پەوکای چا ڕوەنە جگە جە زەرەری گیانی گردوو هەمانگەکاشا تاڵانێ کەردێ و بە واریاتەکەیشا هامکاریی ماددی سەروازاو بەعسیشا کەرد، مشۆم خەڵک فشاری بەکۆمەڵ بوزانە سەروو گلێرگەی مەدەنی و ڕێکوزیا ناحکومییەکا، تا ٣١ و ئابی پیسەو حەر ڕوێوە تەری کە ملوو گەلەکەیمارە ئامان بەڕسمی بکریۆنە و یاد بکریۆوە.
بۆنەو سیاسەتی غەڵەتوو ملەملێ و لایەنەکاو پانیشتوو کوردسانیوە، بەردەوام ئینایمێ جەنگوو دلێنە، جیهانوو گەندەڵی کە بیەن بایسوو بنیاتنیای قەیرانی کۆمەڵایەتی، ڕۆ نییەن بە دەیان  خەڵکێ ئی وەڵاتەیە ڕووەو مەرگی نەبەرا و ئاوارێ وەڵاتای تەری نەبا، ئی میحنەتە ئارۆ گلێرگەکەمانە ڕووە مدۆنە و حەر ڕوێوە بە نۆعێوە ڕسمێ چندین کوشیایا و کۆچبەرە خنیکیایا دەینەش ئینا گەردەنوو دەسەڵاتیوە، ویرۆکەردەی و بێموبالاتیی دەسەڵاتداریی پانیشتوو کوردسانییا، تا سەرەکاو جەنگوو براکوشی دەسەڵاتەنە با، گرد ڕوێ مەرگ بەرەو یانەیما مگێرۆ، بەکۆمەڵ گەنجاما دلێنە بەرا و دەیەقەکاو جەنگوو دلێ سەعاتەکاو مەرگوو گەنجاما مژمارۆ.

 پەنەوازا یادوو٣١ و ئابی بکریۆ بە بۆنێوی جە کارەساتەکانە تا دووە لاینەێ دەسەڵاتدارێ بلانێوە وێشارە و ئی یادکەردەیوێ بانە بە وەربەسێوە،پەی ئەوەخواینەبییەیوە،ئا جەنگە وناڵینەیە کە ٣٦ هەزارێ ئینسانێ بێتاوانێش دلێنە بێسەروشۆنێ بیێ.
دماو ڕووەدایەکاو جەنگوو براکوشی و ڕێککەوتەی پارتی و یەکێتی واشنگتۆنەنە، هەرێمێوی تەمام نادیموکرات و ناتەندرووس هەن و مافوو تاکیشا قۆرخ کەردەن. بۆنەو جیاوازیی خزمەتگوزاریی مەنتێقەکاو چێروو دەسەلاتوو پارتی و یەکێتی و ملەملێ سیاسییشاوە جیاوازیی هەن،هەست پانەیە مکریۆ هەڵای ئینایمێ جەنگو دلێنە! تا ئیساتێچ فرەو ئەسیرەکاو جەنگەکەی یا ئینێ زیندانەنە یا بێسەروشۆنێنێ. ئاخروو مانگەو ئابوو گرد ساڵێوەنە، واوەی زەخمێ خێزانەکا مکولیاوە و یادوو ئی کارەساتەی مکریۆوە. جەنگی چەکداریی براکوشی ساڵەکاو ١٩٩٤ تا ١٩٩٧ بەینوو پارتی و یەکێتیی ڕووەش دا. دەرەنجامەکێش بیێ بایسوو گورزێوە دوژمنگەرایی قەوەتی، دلێ گلێرگەو پانیشتوو کوردسانینە، پەروەردیوە دژوار و ملەملێ سیاسیێ نەوەکێماش لاڕاە بەردێنێ، چی جونگەنە زیاتەر جە ٣٦ هەزار هاموەڵاتا کوشیێ و بێسەروشۆنێ کریێ.
جەنگوو ناوخۆی (دلێ) بە 'ڕێککەوتەینامەو ئاشتیی واشنتۆنی' ١٧و ئەیلوولوو ١٩٩٨ ینە بە ئامادەبییەی وەزیروو بەروو ئاوەختەو ئەمریکای ماردین ئۆلبرایتێ، بەینوو جەلال تاڵەبانی و مەسعوود بارزانینە ئیمزا کریا و دماییش پەنە ئاما،وەلێ برینەکێ هەڵای پەترۆکشا نەبەستەن. دەیا ئەدێ هەڵای چەمەڕێ کوڕا و مێردەکاشانێ شادێ باوە پنەشا.

بۆنەو ئا جەنگەیوە هەیکەلی سیاسی و ئیداریی کوردی لەکەدار موینیۆ و جیاوازیی کوردبییەی و پارێزگاریی وەنەو گەلی و سەروەرییەکا بە چەقبەستەیی مەنێنیوە.، ئینەیچ پاسەش کەردەن ڕۆو ٣١وئابی بە خیانەتی نیشتمانی بشناسیۆ و بکریۆ بە ڕوێوی تایبەت و یاد بکریۆوە.