عەلی عوسمان جە سداڵەکاو ١٩٩٠-١٩٩٤ چنڎین جارۍ ڕابەروو گەلوو کوردی عەبدوڵا ئۆجالانش دیەن و گرڎ وەختۍ و جە گرڎ دەرفەتێوەنە دڵسۆزی و وەفاڎاری ۋېش پۍ کۊشیای ئازاڎیی گەلوو کوردی واوەی کەرۊوە.

یۆ چا یوۋەم یانا کە کادراو جمەریی ئازاڎیی کوردی جە ۋەرنیشتەنە سەردایشا کەرڎ و چنەشەنە مەنېوە یانەو عەلی عوسمانی بۍ جە مەنتیقەو پانیشتوو قامیشلۆی. عەلی عوسمان جە ڕاو هامسایەکاش و حەرپاسە سەردای خۊنکارا جمیەروو ئازاڎیی پۍ یانەکەیش جمیەروو ئازاڎیی کوردیش ئشناسا. بەڵام حەر بە ئاسانی بەرەو یانەکەیش پۍ نە وستۍ سەروو پەشتۍ و دماو حۊت جارا سەردای کادرا جمیەروو ئازاڎیی کوردی، بە تەمامی بەرەو یانەکەیش پەی جمیەروو ئازاڎیی کوردی واڵا کەرڎ. عەلی عوسمان کە ئیسە عمرش ٧٣ ساڵېن، باسوو ئا وەختیە کەرۆ و ماچۆ، "جمیەرۍ فرۍ ئامۍ و بانگەشەو ئانەی کەرېنۍ کە بەشێوېوە ریشەیی پەی کوردی کۊشییا، بەڵام بە پاو مەسڵەحەتوو ۋېشا جمېنێوە. پېسە بنەیانېوە کوردی کە هیواو ۋېم جە دەسدابۍ سەرەتا ۋېم جە ئاپۆییەکا نزیک نەکەرڎۆ. دماو حۊت جارا سەردای پۍ یانەکەیم، من بیا بە ئاپۆیی. بڕۍ دێر قایل بیا، بەڵام وەختۍ زانام کەسانۍ راس و دروسېنۍ، من ۋېم چایشا نزیک کەرڎۆ و یانەکەم بی بە یانەو خۊنکارا جمیەروو ئازاڎیی کوردسانی".

بە گەڵابەکەیش خەڵکی پۍ لوبنانی فاڕېوە

عەلی عوسمان کە ساڵەو ١٩٨٨ ی قەسەموو وەفاڎاریش بە کۊشیای ئازاڎیی کوردسانی وارد، چوار جارۍ لووا سەردای ڕابەروو گەلوو کوردی عەبدوڵا ئۆجالانیش کەرڎ. عەلی عوسمان چا ساڵانە بە گەڵابەکەو ۋېش خەڵکی پۍ مېڎانوو لوبنانی و دیمەشقی فاڕېوە و فرەو وڵاتپارێزا کە پۍ یوۋەمجاری لووۍ لوبنان و دیمەشق و عەبدوڵا ئۆجالانشا جە نزیکۆ ئشناسا، جە ڕاو گەڵابەکەو عەلی عوسمانیوە ئا گەشتەشا کەرڎ.

'قسۍ و کردارش پېسە یۊی بېنۍ'

عوسمان باس جە ئەوەڵ وینای ڕابەر ئاپۊی کەرۆ و ماچۆ، "جە بەینوو ساڵەکا ١٩٨٨ تا ١٩٩٠ی من تەنیا نامۍ ڕابەرایەتیم ژنیێبۍ. تەماشەکەرڎەی و ویرکەرڎەیۊکېش بە ئێمە یاوېنۍ. من بە وریاییۆ گۊش پۍ ئا فکرا گېرێنۍ و حەرپاسە جە ژیۋای کادرەکا ورد بېناوە. بەڵا جە نزیکۆ دیەی ڕابەرایەتی چېوېوە جیاواز بۍ. ۋېش جە ۋېشەنە هۊگرش بیەبېنا، بەڵام دماو وینایش پەیوەندیما بەقوەتتەر بی. قسۍ و کردەوەکېش پېسە یۊیبێنۍ. قوەتوو ئاڎیی پۍ چارەسەری کێشەکا فرەبۍ".

'زانېنا کە ئی ڕۍ بۍ قوربانیدای مەبۆ'

عەلی عوسمان جە درێژەو قسەکاشەنە واتش، ساڵەو ١٩٩١ کە بە گەڵابەکەیش گەلی پۍ لوبنانی و دیمەشقی فاڕێوە و حەر پا گەڵابەیە پېویسیەکا گەلی مەیسەر کەرۍ، خاس زانۍ کە ئەگەر رژێموو بەعسی پنەش بزانۆ تووشوو تەرسی گەورەی بۆوە، بەڵام بۍ سڵەمایۆ چا تەرسۍ بە ئاگاڎار بیەی چانەی کە زانۍ ئا ڕۍ بۍ قوربانیدای مەبۆ، بەردەوام بیەن چا هەرمانېشە و حەر ئانەیچ دەرفەتێوە بیەن کە گرڎ جارۍ کە گەلش فاڕانۆ، ۋېچش چەمش بە ڕابەر ئاپۊی کۊتەن.

حۊڵەکېش پۍ رێکوستەی کۆمۆنی

دماو ئەرەیاۋناو ئاخېزوو ۋەرنیشتی جە ساڵەو ٢٠١٢ ی عوسمان جە کۊشیای بەردەوام بۍ و جە ساڵەو ٢٠١٥ی تا ٢٠٢٠ جە مەنتیقەو پانیشتوو قامیشلۆی هامسەرۆکوو کۆمۆنوو گەشمەرڎە رەمزی بیەن و چنی ٤٠ هەڤاڵا ۋېش چا وەختەنە هەرمانەو رێکوستەی ٧٤٠ یاناشا جە ئەستۆنە بیەن و پی جۆرەیچ جە رێکوستەی کۆمۆنەکانە جە سەرنیشتوو ۋەرکەوتوو سوریاینە دەوری عالش گېڵنان.

مشۊم گوڕ بە کۊشیای بڎریۆ

عەلی عوسمان جە دمادمایی قسەکاشەنە ئاماژەش بە گۆشەگیری رەهاو سەروو ڕابەروو گەلوو کوردی عەبدوڵا ئۆجالانی کەرڎ و واتش، "حەر وڵاتپارێزێوە چېشش جە دەس مۍ مشۊم کەرۊش. مشۊم پەی ئازاڎیی جەستەیی ڕابەریما گوڕ بە کۊشیای بڎەیمۍ. ڕابەر ئاپۆ تەنیا پەی کوردی کۊشش نەکەرڎەن. پاڕادیگماو ڕابەرایەتی جە سەرنیشتوو ۋەرکەوتوو سوریاینە جابەجێ کریۆ. گەل بە ئاشتیانە و بە دیموکراتیکی مژیوا. ئەگەر ڕابەر ئاپۆ زینڎانەنە نەبیۍ، ئا پاڕادیگمایە فرەو یاگەکا تەروو جەهانینە جابەجێ کریۍ. راسی ڕابەرایەتی ئینەنە. حەرپۊکەی پۍ ئازاڎیی جەستەیی ڕابەرایەتی مشۊم ئێمە گوڕ بە کۊشیای ۋېما بڎەیمۍ".