پێسە چنی مرۆڤ وەڵینگە خوڵقنۆ، مرۆڤ وێچش بەرئەنجاموو وەڵینگەین، واتا ویستوو بڕۍ مرۆڤا جە هەلومەرجێوە تایبەتەنە بۆ بە مەڵامەتوو ئانەی جەمۍ کەسایەتیۍ تازۍ بە ڕامانێوە تازەو ویرکەردەیۆ و مژاری تازەو ژینگۆڕی، پایێ پۍ مێڎانەکەی هۊرگێرا.

ئەچی بەستێنەنە وەڵینگەو ۋەرکەوتوو دلێڕاسەی پۍ دووۍ بەشا وەڵۍ و دماو عەبدوڵا ئۆجالانی بەش بۆ، ئا هەلومەرجەی ئۆجالان چنەشەنە گەشەش کەرد و جماوە، هەلومەرجێوە تایبەت بۍ، کە داواو مدرامانی جە کوردا کەرۍ، ئۆجالان و ئاپۆچییەکۍ ڕابەرایەتیی مدرامانیشا گێرت ئەستۆ. بەڵام دماو ئەرەمەرزناو پەکەکەی و گێرتەی ئەندامەکاش جە تەرەفوو دەوڵەتوو ئەرەگیری تورکیوە، ڕابەر و بڕۍ جە کادرەکا ناچار مەنۍ وڵاتی جیا بازا جە وڵاتە جیاجیاکانە ئەرەنیشتۍ با، ئینجا جمیەرە شۆڕشگێڵنیی و ناشۆڕشگێڵنییەکێشا ئشناسۍ و بڕۍ پەیوەندیێشا وەشۍ کەردۍ.

ئی جموجوڵۍ هەم دیدوو ڕابەراتیشا دەربار بە قەزیەو گەلا تەروو ۋەرکەوتوو دلێڕاسەی و جە یۆشیەی و جیاوازییەکا چنی قەزیەو کوردی فراوان کەرد، هەمیچ پەکەکەش کەرد بە جمیەرێوە ئاشناو دلۍ گەلا تەری، تا ئا سنوورەی بەشێوە فرەو عەرەبا وڵاتا تەری و فارسەکێچ ئامێتەو ئی جمیەرەیە بیۍ و چی ڕێنە گەشمەرڎۍ بیۍ. ئی بەئەندامبیەیە ۋەرفراوانە سیمایۍ میان نەتەوەییش بە پەکەکەی بەخشا کە پارچەی گومبیەو جمیەرە شۆڕشگێڵنییەکا ۋەرکەوتوو دلێڕاسەی بۍ.

گەر تەماشەکەرمۍ موینمۍ فرەی جمیەرە شۆڕشگێڵنییەکا ۋەرکەوتوو دلێڕاسەی بە شێوێوە وشک  جە نەتەوەپەرەسیی هۊرژەنیێنۍ، بڕۍ وەختۍ ناسیۆنالیزم بیەن بە مەڵامەتوو ترازانایشا جە شاڕاو ئاخێزی. جە بەعسی عێراقی و سووریایۆ گێرەش تا موجاهیدینی خەلقوو ئێرانی و حدکا و پارتی و یۊبیەی نیشتیمانی جە کوردسانەنە نەتاوانشا پاسە ئەنتەرناسیۆنالیزمی پەسەن بکەرا، دماجار ئانێچشا گەرەکشابیەن ئی ڕێبازە کردەییە بکەراوە، پێسە جەمەو و چریکی فەدایی خەلقی یا جمیەرە جیاوازەکا فەڵەستینی جە یۊی ترازیێنۍ و مارژیناڵۍ بیێنۍ.

جوابدایۆ ئا پرسیارۍ داخۆ پەکەکە ئی ڕێبازە تازەشە وەشکەرد یان هەلومەرجوو مەنتیقەکەی، پێسە جوابدایۆ ئا پرسیارۍ ئایا کەرگی جە هێڵەینە یان هێڵە جە کەرگینە؟ ئانەی ئاشکران ئانەنە کە کە مەنتیقەکەنە هەست کریۍ ویستوو وەشبیەی پارتێوە ئینتەرناسیۆناڵی هەن، گەر ڕاسواچۍ بیمۍ پەکەکە پۍ ئی ئامانجیە وەشنەبیەن، بەڵام ڕووەدایەکۍ بە جۊرۍ لووۍ وەڵۍ کە پەکەکە بە شێوێوە ئەرێنیی چنی گەلا تەری جمۊوە، چونکی ڕابەرایەتیی کۊڵەکەکۍ حزبیش بە ڕەنگێوە ڕاس ڕۆ کەردۍ بێنۍ، جا ئی هەمەچەشنییە ئەتنیکییە بە شێوێوە بنیاڎنەر جە چالاکییەکاو حزبینە بەشدار بۍ.

هەر چی ڕووانگۆ ماچوو ڕۊبیەو ڕابەر ئاپۆی خاڵەو هۊرچەرخناینە پۍ گەلاو ۋەرکەوتوو دلێڕاسەی، مەبەسم چی پێناسەیە کەسپەرەسیی نییا، بەڵکم کەسانێوە پێسە ئۆجالانی و لینینی و مارکسی و تیۆرساز تەری تەنانەڎ خوڵقنەرا زانایا پێسە تێسلای و گالیلۆی و .... سەرەڕاو ۋێشا بیێنۍ مەڵامەتوو گلێرکەردەیۆ ئیرادێوە مرۆیی پۍ جوابدایۆ ویستێوە بەدینامای یان پرسیارێوە بێ جوابی، مسۆگەر ئی ویستە ئنڎە فراوان بۍ کە گەر ئاڎیچ ئی ئەرکەشا نەگێرتۍ وۍ، ئانە تاریخ وزێش ئەستۆو کەسێوەتەری، بەڵام ئینە ئا حەقەتینەنە کە مەفاڕیۆ کە بەرکۊتەی ئی ئینسانا ژیۋای مرۆییشا پۍ هەمیشەی فاڕان.