٦٨ ڕێکوزیۍ داواو هۊرشێونایۆ سزاو جە قەنارەدای پەخشان عەزیزیۍ مکەرا
٦٨ ڕێکوزیۍ مافو مرۆڤی و چالاکا ژەنا پەی هۊرشێونایۆ سزاو جە قەنارەدای پەخشان عەزیزیۍ ئەرەیاۋنێوەشا وەڵا کەردۆ ماچا: "جە قەنارەدای پەخشانۍ لەکێوە سیاوا سەرو مرۆڤایەتییوە".
ڕۊو چوارشەمەی ۋېیەردەی جە لایەنو دادگاو باڵاو ئێرانیوە قەرارو جابەجێکەردەی سزاو جە قەنارەدای پەخشان عەزیزیۍ پەسەڼ کریا و ئانەیچ جە دلێینەو ئێرانی و جەهانی و ۋەرکۊتوو مېیامینینە کاروەدایش چنە کۊتۆ. ئارۆ ٦٨ ڕێکوزیۍ مافو مرۆڤی و چالاکا ژەنا جە ئەرەیاۋنێوەنە داواو هۊرشێونایۆ سزاو جە قەنارەدای پەخشان عەزیزیۍ مکەرا.
دلۍ ڕێکوزیاکانە، ڕێکوزیاو مافو مرۆڤو کوردپا، ڕێکوزیاو ژەنا ۋەرکۊتی، کانوونو وەرگریکارا مافو مرۆڤی، کامپینو ئازادیی گیریایا سیاسیی ئێرانی، بۆنیادو عەبدولڕەحمان بروومەندی، کامپەینو چالاکا بەلووچی و چڼین ڕێکوزیۍ تەری هەنۍ.
جە ئەرەیاۋناکەنە داوا جە گلێرگەی مېیاننەتەوەیی و ڕێکوزیا یاساییەکا کریان هەنگامەی جدیە بنیا پەی مردنای سزاو جە قەنارەدای پەخشان عەزیزیۍ.
ڕێکوزیاکۍ جەخت مکەراوە، پەخشان عەزیزیە ژیۋایش پەی ۋەرگیری جە ژەنا و یەکسانی گلێرگەی تەرخان کەردەن، ماچا: "جە قەنارەدای پەخشانۍ لەکێوە سیاوا سەرو مرۆڤایەتییوە".
