هێزە ئەمنییەکۍ ئێرانی ڕاگیریشا جە گەشتوو بنەیانەو ژینا ئەمینیۍ کەرڎ بلانۍ فەرەنسا، کە بەنیازۍ بېنۍ بەشداری جە مەراسیموو هۊرگېرتەی خەڵاتوو ساخارۆفینە کەرا، کە پۍ ئېساڵی بە ژینۍ و جمیەروو ژەنی، ژیۋای، ئازاڎیی بەخشیان.
بەپاو هەواڵێوە تۆڕەو مافەکاو مرۆڤوو کوردسانی حەریۆ جە ئەڎاو تاتەو ژینۍ، موژگان ئیفتخاریە و ئەمجەد ئەمینی و ئەشکانی براش و ساڵح نیکبەخت پارێزنەروو بنەیانەکەی بەنیازۍ بېنۍ سەعات ٠٢:٢٥ دەیەقۍ جە فڕۆکەخانەو خومەینی تارانیوە بەرەو فەرەنسا گەشت کەرا، بەڵام هێزە ئەمنییەکۍ ئێرانی ڕاگیریشا جە گەشتکەرڎەی بنەیانەکەی کەرڎەن.
بنەیانەو ژینا ئەمینیۍ بە ڕسمی خوڵقەو پەرلەمانوو ئەوروپای کریۍ بېنۍ، پۍ ئانەی بەشداری جە مەراسیموو بەخشای خەڵاتوو ساخارۆفینە کەرا. دماو ئا ڕاگیریە جە بنەیانەو ژینۍ، تەنیا ڕا بە گەشتکەرڎەی بەپارێزنەروو بنەیانەکەی دریان.
هێزە ئەمنییەکۍ ئەرەیاۋنانشا، قەڎەغەو گەشتکەرڎەی پۍ بەری جە دژوو بنەیانەو ئەمینیۍ بەرشیەن، دەسیچشا سەروو پاسپۆرتوو ئەنداماو بنەیانەکەیرە گرتەن.
قەرارا ساڵح نیکبەخت پېسە نوێنەروو بنەیانەو ئەمینیۍ جە مەراسیمەکەنە بەشداربۊ و خەڵاتوو ئېساڵ و ساخارۆفی هۊرگېرۆ.
پەرلەمانوو ئەوروپای خەڵاتوو ئېساڵ و ساخارۆفیش پۍ داکۆکی جە مافەکاو مرۆڤی پێشکەش بە ژینا ئەمینیۍ و جمیەروو ژەنی، ژیۋای، ئازاڎیی کەرڎەن و قەرارا ڕۊو یەرە شەممەی ١٢/١٢/٢٠٢٣ مەراسیمێوە پۍ بەخشای خەڵاتەکەی سازکریۆ.
ژینا ئەمینیە کناچە کوردەو مەردمەو شاروو سەقزی جە ۋەرکەوتوو کوردسانی ڕۊو ١٣و ئەیلولوو ٢٠٢٢ جە وەختېنە بە سەردای چنی بنەیانەکەیش جە تاران بۍ، بە بەهانۍ پابەندنەبیەی تەمامەتیش بە رێساکاو حیجابی زۆرەملێوە گیریا و جە ئاکاموو تنوتیژی و ئەشکەنجەداینە کۊتە ئاژەو کۆمای و دماو یەرۍ ڕووا مەنەیۆیش جە خەسەخانەنە عەمرەو خوڎایش کەرڎە.
گیان جە دەسدای ئا کناچە کوردۍ بی بە سەرەتاو ناڕەزایەتی و ۋېنیشاندایۍ ۋەرفراوانی جەماوەری جە ۋەرکەوتوو کوردسانی و ئێرانی کە بە سەرهۊردای یاخوڎ جمیەروو ژەنی، ژیۋای، ئازاڎیی ئشناسیان و چنڎین مانگۍ بەردەوام بۍ، بە مەڵامەتوو تنوتیژی هێزەکاو دەوڵەتیوە زیاتەر جە ٥٠٠ کەسا کوشیۍ و هەزاران کەسېچ زامڎارۍ و گیریۍ.
