ئادار گابارە ئەندامەو تەڤنا زیڕینی، ٤و نیسانی ڕۆو پەیدابییەی ڕابەرو گەلو کوردیش وەنەو گردو ئینسانیەتی مەبارەک کەرد و واتش: "تا بتاومێ خاوەنداریی چی ڕوەیە و ڕابەرایەتیما بکەرمێ، پێویسا خاوەنداریی وەنەو بەها و دەسکەوتەکاما بکەرمێ."
ئادار گابارە ئەندامەو تەڤنا زیڕینی، سەبارەت بە یادو ٧٥ــەمین ساڵەو پەیدابییەی ڕابەرو گەلو کوردی، عەبدوڵا ئۆجالانی پەی ئاژانسو هەواڵو فوراتی قسێش کەردێ. ئادار گابارە قسەکاشنە ٤و نیسانیش وەنەو گردو ئینسانیەتی مەبارەک کەرد و جەختش وەنەو گرنگی و بەرزئرمانای ئی ڕووەیە کەردۆ.
ئادار گابارە، ڕۆو پەیدابییەی ڕابەرو گەلو کوردی عەبدوڵا ئۆجالانیش وەنەو ئەدا ئوڤەیشێ ئەدو گەشمەردا و ئینسانیەتی مەبارەک کەرد و واتش: " پەیدابییەی ڕابەر ئاپۆی پێسەو تیشکەو وەری بێ پەی گردوو ئینسانیەتی. ڕابەر ئاپۆجە مەبارەکتەرین بەشو کوردستانینە، سەرو خاکو پێغەمبەراوە پەیدا بییەن. ئی روە مەبارەکە ڕوێوی فرە مەبارەک و گرنگا پەی گردو ئینسانیەتی و بەتایبەت پەی ژەنا. ڕابەر ئاپۆ پا فکر و فەلسەفەو وێشۆ، کە پەی ئینسانیەتی خولقنانش، ژیواێوی تازە و پەڕ ماناش خۆڵقنان. ڕابەر ئاپۆ بە ویرۆکەکاش گردو ئا کردەوا کە دژو ئینسانیەتی مکریانێ ئاشکراش کەردێ. ڕابەرایەتی ڕاش سەرو ڕاسی کەردۆ. سەرەتاو هەرمانێ و کۆشیایەکاشاوە ئا کوردێ چێرو چنگەو کۆکوشیینە مەردێبێنێ، زیندە کەردۆ. کوردستاننە کە ژیوای مردابێ، بە سەرەوردای ڕابەر ئاپۆی جارێوی تەر ژیوای دەسش پەنە کەردۆ."
درێژەو ورسەنگناکەیشنە، ئادار گابارە، ماچۆ: "٤و نیسانی ڕۆو ئەوەخوایبییەیۆن پەی ئینسانیەتی". هەرپاسە ڕۆو ژیوایۆیێ تازەین پەی ئێمەی ژەنا. سەرو ئی ئەساسیوە ئی ڕوە پەی ئێمە فرە مانادارا. ئی ڕووە جە تارێخو گەلەکەیمانە بناغێوی کۆنش هەن. ڕابەر ئاپۆ بە مەنەیۆش ئیمرالیینە، ڕاسیی ئەرەگیراش پەی گردو ئینسانیەتی ئاشکرا کەرد. ڕابەر ئاپۆ دژو دڕندەیی دەسەڵاتی مدرامانش کەرد و وێش کەرد بە قەڵغان پەی ئینسانیەتی. ئانێ بۆنەو کۆیلایەتییوە یاوێ قەراخوو دلێنەشییەی، ئارۆ بە فەلسەفەو ڕابەر ئاپۆی، جە جادەکانە داواو ئازادی و مافو وێشا مکەرانێ. بەدڵنیاییوە ئینە تەرسیش دلێ دڵو دەسەڵاتداراننە نیێنەرە. ئینەیچ یۆ چا هۆکارانە بەرەو ئیمرالی نەکەراوەوەراوەرنە ئینسانیەت داوا مکەرۆ و مواچۆ سەرچەمەو چارەسەرو کێشەکا، ڕابەر ئاپۆن و هیچ کەسێو جیا جە ڕابەری نمەتاوۆ چارەسەری گردینو و هەمیشەیی، مسۆگەر بکەرۆ.
تا بتاومێ خاستەر خاوەنداریی چی ڕوەیە و ڕابەرایەتیما بکەرمێ، پێویسا خاوەنداری وەنەو بەها و دەسکەوتەکا بکەرمێ. ئینەیچ جە حەر چوار پارچەو کوردستانینە و جیهانینە کاریگەرییش هەن. گەلی وەرکەوتو کوردستانی و ئێرانی زەروورا بە بۆنەو ئی ڕۆیۆ ئیسفادە بکەرا و پەی درێژەدای بە شۆڕشو، ژەنی، ژیوای، ئازادیی ڕابەر ئاپۆی، بە جۆشوخرۆشێوی گەورەوە بەردەوامی بە کۆشیای و خاوەنداری وەنەو بەهاکاو گەشمەردا بکەرا. ئا وەخت بە یۆبییەی ڕاگێری وەنەو کوشتەی و کۆکوشی مگێرییۆ. ڕۆو پەیابییەی ڕابەر ئاپۆی، ڕۆو پەیدابییەی ئێمەی تەڤناین."
