حکوومەتوو فاشیستی ئاکەپە-مەهەپە بە سیاسەتوو قەیومەکا تیرۆرش بەرد ڕاوە، گەلوو کوردسانی جارێوەتەر سەروو سنووقەکا دەنگدایۆ ئیراڎەو ۋێشا نیشانە دا. گەل بە مەراسیمی گۊرەو نەورۆزی مزانی ئی ڕووەیشا دابۍ و دەسەڵاتوو قەیومەکاشا سەروبن کەرد.

دەم پارتی ئامەدەنە تاواش ١٤ مەنتیقۍ و گەورە شارەوانی شاروو ئامەدی بەرۆوە. بەپاو ئەنجامە سەرەتاییەکا هۊرچنیەی، شارەوانییەکۍ ئەرخەنی، پیران، گەل، چنار، بسمل، فارقین، لیجە، پاسوور و چن شۊنۍ تەریش بەردێنۍ. دەم پارتی جە تەماموو مەنتیقەکا دلێڕاسەو کیاپناری، شاری تازەی، سوور و ڕێزان سەرکۊتەیش بەدەس ئارد.

دەم پارتی بە جیاوازیێوە فرە گەورە شارەوانی و ٦ شارەوانیۍ مەنتیقەو مێردینیش بەردۍ.

مێردین یۊ چا شارا بۍ کە سیاسەتوو قەیومەکا کە بە فاشیستتەرین شێوە چنەشەنە جابەجێ کریۍ، چا دەنگدەرا گورزێوە گۊرێشا جە حکوومەتی فاشیستی ئاکەپە-مەهەپەی شانا. جگە جە گەورە شارەوانی ١٢ مەنتیقۍ پێسە ڕێیا ئارموش، ئارتەمێت، توشبا، ئەبەخ، وەستان، ئەلباک، پایزاڤا، شاخ، سەراو، قەڵگەلی، بێگیری و ئەردیشینە کاندیدەکاو دەم پارتی سەرکۊتۍ.

کاندیدەکاو دەم پارتی جە شارەوانییەکا ئاگری، گیادین و بازیدینە سەرکۊتەیشا بەدەسئارد.

حەرپاسە دەم پارتی جە بەردەیۆ شارەوانی ئیدیری نزیکا.

کاندیدەکاو دەم پارتی جە شارەوانی موشی و مەنتیقەو ملازگر، کۆپ و گمگمینە سەرکۊتەیشا بەدەس ئارد.

دەم پارتی جە شاروو سیرتی شارەوانی ناوەندی و مەنتیقەو مسرجەینە سەرکۊتەیش بەدەسئارد.

شارەوانییەکاو جۆلەمێرگی و ئێلحی و دێرسیمی بە نامۍ دەم پارتیۆ تۆمارکریۍ.

بەدلیسەنە ئەنجامەکۍ پێسە یۊی ملا، مەنتیقەو تاتوانینە دەم پارتی سەرکۆت.

دەم پارتی جە ٦ مەنتیقا ڤێرانشار، جەیلانپنار، هەوانگ، خەلفەتی، بێرەچووک و پرسوس ڕحا شارەوانییەکێش بەدەس ئاردۍ.

جە مەنتیقەو تاتۆسی و قەرەیازی سەر بە ئەرزرۆمی دەم پارتی سەرکۊتەیش بەدەسئارد.

حەرپاسە دەم پارتی جە ۋەرنیشتوو ئاکدەنیزی مێرسینی سەرکۊتەیش بەدەسئارد.

پێویسا گرڎ کەسۍ گرنگی پی ئیراڎەیە بڎۆ

تۆنجەر باقرخان، هامسەرۆکوو دەم پارتی جە کۆنگرێوە ڕۆنامەوانینە دماو سەرکۊتەی دەم پارتی جە هۊرچنیەکانە قسێش کەردۍ و واتش: ئەنجامەکۍ هۊرچنیەی نیشانەشا دا کە ئێمە سەرکۊتیمۍ، حکوومەت شکسش ئارد. ئی گەلە دەسبەرداروو ئیراڎەو ۋێشا نەبیۍ. ئانۍ کێشەو کوردی چارەسەر مەکەرا شکس مارا. ئانۍ گەرەکشانە کوردی دلێنەبەرا وڵاتی جە دەس مڎا. گەلوو کوردی جارێوەتەر نیشانەشدا کە ئینا چنی چارەسەری دیموکراسی. ئی ڕۆحە جە دیموکراتیکی هەرێمینە دیارا، حەرپاسە جارێوەتەر جە هۊرچنیەکانە پەشڕاسکریاوە. گەلەکەما نیشانەشدا کە شکس نمارۆ."

باقرخان ئەرەیاۋناش کە جە هۊرچنیەو سیاسەتوو ئاشتەوایی شارەکانە سەرۍ کۊتۍ و واتش: قەیومشا نیارە، بەڵام سەرنەکۊتۍ."دەنگدەرۍ ساختێشا ئاردۍ، بەڵام دیسان شکسشا ئارد".

شارەکێما چێروو ستەمی و حوکمڕانی ئاکەپەینە ڕزگارشا بی

باقر خان واتش: براوەو ئی هۊرچنیەیە گەلوو کوردی و گەلەکەما و دەم پارتییا. ئا ڕوانگەی تا ئیساتۍ ئامان ئاراوە سەرەڕاو گرڎ جۆرە سەختی و فشارێوە سەرکۊتەیۍ گۊرەش بەدەسئاردەن. ئیراڎەو دیموکراتیکی هەرێمی سەرکۊت، عەقڵییەتوو ناوەندگەرایی و مۆنیستی جارێوەتەر بە دەنگدای گەلەکەیما شکسش ئارد.

هامپەیمانی جەنگش دۆڕنا، گەلەکەما جارێوەتەر واتش ئاشتی

تۆلای حاتەم ئۆغلاریە، سەرۆکەو گرڎینەو دەم پارتی، جە هۊرچنیەو دەم پارتینە جە ئامەد بەشداریش کەرد و واتش: "ئێمە جە هۊرچنیەو ٣١و ئادارینە ڕاما بە یۊبیەی ژیتمی نەڎا و مەڎەیمۍ. هەردووە هامپەیمانی ژیتەمی و هامپەیمانی جەنگی چی هۊرچنیەینە شکسشا ئارد. ئی حکوومەتە کە ئاما ئامەدی دڵوو کوردسانی و باسوو سیاسەتوو جەنگیش کەرد و گەلەکەما شکسشا پنە ئارد. دیسان واتشا ئاشتیما گەرەکا.پا بۆنۆ ئی سەرکەوتەیە، بە دڵ و  بەگیان چنەتا پیرۆز مکەروو."