کۆنگرەو گلێرگە دیموکراتیکەکاو کوردستانییا ئەورووپا (کەجەدەکە-ئە)، دژو هجوومە ئەرەگیرکەرییەکاو دەوڵەتو تورکی پەی سەرو مەتینای داواش وەنەو گەلو کوردی و دۆساش کەردە بەیارە جادە و مەیدانەکا.
کەجەدەکە-ئە ئەرەیاوناێوەش وەڵا کەردۆ و واتش، "سوپاو تورکی ئەرەگیرکەری بە هەلیکۆپتەر و فڕۆکەی جەنگی، تۆپێ و کاتیوشێ مەتینانە دەسش بە هجوومی ئەرەگیرکەری کەردەن."
ئەرەیاونایەکەینە ئامان، "دەوڵەتو تورکی وەراوەرو هەڵوێستو ملوێنا ئینسانا ورچنیەی ٣١ ئادارینە، تا بتاوۆ حکومەتە دۆڕیاکەیش سەرو پایاوە بمردنۆ، چەنی پەدەکەی مەتینانە دەسش بە هجوومی ئەرەگیرکەری کەردەن و جارێوی تەر ڕووەی دوژمنکارانێ وێش وەراوەرو کوردا نیشانە دێنە".
دلێشنە وچیانیچ، کە دەوڵەتی کۆلۆنیالیستی تورکی، بە پلانەو ماڕای هجوومێ مکەرۆ سەرو دەسکەوت و بەهاکاو گەلو کوردی، بە ئەرەگیرکەری و گلێرکوژی گەرەکشا ئەنجامش بۆ و ئانەیچش وستەن ڕووە، "مدرامانو گەلو کوردی و کۆشیای جەنگەوانا ئازادیی ئا پلانێ یۆبەیۆ تێکێ مدریانێ. پلانەو دەوڵەتو تورکی پەی ماڕای و پاکتاوکەردەی مەڕیێنە.
پێسە تاریخو کوردستانینە دایمە وینیان، ئارۆیچ موینیۆ، کە دەوڵەتو تورکی کۆلۆنیالیستی وەرو ئانەی مزانۆ نمەتاوۆنێ بە هێزی سەروازی و ئەرەگیرکەری ئەنجامش بۆ، گەرەکشا ڕاو هێزە هامکار و داردەسەکاشۆ بیاوۆ ئەنجام. وەختێو سەرنجە مدەیمێ سەرو تارێخو وێما، موینمێن کە چندین مدرامانێ ڕاو نۆکەرا و بەکرێگیریایاوە پاکتاوێ کریێنێ.
دەوڵەتی تورکی قڕکەر کە وەراوەرو کۆشیاینە کەوتەن تەنگانە و تەنگش پنە ورچنیان، بە پەشتیوانیی پەدەکەی گەرەکشەن گلێرکوشی بکەرۆ و کۆشیای پاکتاو بکەرۆ. چا هجوومە دژوارانە دژو گەلو کوردی ئەرەگیرکەرا بە ڕاو خیانەتکاریوە عومرو وێشا درێژ کەردۆ. ئا مەژگەیە پانیشتوو کوردستانینە سەرو داواو سەدامی زەرەری فرە قورسش بە گەلو کوردی یاونا.
سەدەو ٢٠ینە وەروو ئانەیە کورد ڕێکوزیا و یۆگێرتە نەبێ، پارچە پارچەکریا و بە پەشتیوانیی نۆکەرا و بەکرێگیریایا ئەرەپڕایەکێ تێکێ دریێ، بەڵام تارێخ فێرێش کەردیمێ، کە دەوڵەتو تورکی ئەرەگیرکەری بڕوا و متمانێشی بە کوردە نۆکەرەکایچ نییەنە. دماو پاکتاوکەردەی سەرەوردایەکا، نۆکەرەکێچ کوشیێنێ. ڕێکوستەی و کۆشیای گەلو کوردستانی ساعیبو ئا هێز و یاواینەیەنە، کە سەدەو ٢١ی بکەرۆ بە سەدەو ئازادیی گەلەکەیما".
ئەرەیاونایەکەنە ئامان، کە دەوڵەتو تورکی ئەرەگیرکەری ئارۆیچ هەرێمەکاو پارێزنای مێدیاینە دژو گەریلاکا کە پەی شکۆمەندیی گەلو کوردستانی مکۆشیانێ، بە پەشتیوانیی پەدەکەی دەسش بە هجوومێوی ئەرەگیرکەری کەردەن، "هجوومەکە پەی سەرو تەمامو گەلی و بەهاکاو کوردستانین. حەر کوردستانیێوی هۆگرو خاکی، بەهای و گەلەکەیش، مشۆم دژو ئا سیاسەتە چەپەڵا مردایۆ بکەرۆ بە هەرمانەی نەتەوەییە و گوڕ بە کۆشیای بدۆنە.
ڕۆ ڕۆو ئانەینە، کە بە گیانو یۆبییەی نەتەوەییوە دەسکەوتەکاو گەلو کوردستانی بپارێزییا، پەی پارێزگاری جە ئایندەی دژو سیاسەتو هجوومی، گلێرکوشی و ئەرەگیرکەری دەوڵەتو تورکی پەرە بە مدرامانی بدریۆ.
بە نامێ کەجەدەکە-ئەیۆ ئێمە داوا جە گەلی و سەرجەمو ڕۆشنویراو کوردستانی مکەرمێ، کە دژو هجوومەکاو دەوڵەتو تورکی کۆلۆنیالیستی کە بە پەشتیوانیی پەدەکەی، بەرژەوەندی و ئایندەو گەلو کوردستانی لای سەری گرد چێوێوە بوینا، پەی ماڕای ئا سیاسەتە چەپەڵا گرد یاگێوەنە دەنگ بەرز بکەراوە".
