هامسەرۆکی گردینو دەم پارتی تونجەر باقرخان سەبارەت بە ئەنجامەکاو ورچنیەی شڕنەخ، بەدلیس و قەرس پەیامێویش وەڵا کەردۆ و دلێشنە ئاماژەش بە فرتوفێڵ و گزییەکا کەرد و داواش کەرڎە ڕێز جە ئیرادەو گەلی بگیریۆ.
تونجەر باقرخان ڕاو هەژمارەکاشۆ تۆڕە کۆمەڵایەتییەکانە پەیامێوش ئاڕاسەو خەڵکو شڕنەخ، بەدلیس و قەرسی کەرد.
پەیامەکەو باقرخانی ئینەنە:
"خەڵکی بەنرخ و ئازیزو شڕنەخ، بەدلیسی و قەرسی؛
هامڕا بەنرخا؛
ئەو شارەوانیێ کە ئێمە ڕاو ڕەنج و کۆشیایۆ بەدەسما ئاردێنۍ، گەرەکشانە ڕاو دەنگدەرە قاچاخا و نایاساییاوە زەوتشا بکەرا. خەڵکو شڕنەخی کە ڕووەی چەرمێ کۆشیای ئێمەنۍ، چێش ببۆ با ببۆ ئێمە گرد وەخت شانازییتا پۆوە مکەرمێن. ئانە کە شڕنەخنە وەراوەرو ٦٥٤١ دەنگدەرە نایاسایینە ورچنیەینە سەرکەوت شارو شڕنەخین. خەڵکو شڕنەخی ساعیبێ ئیرادەو وێشا بێنۍ. با کەس بە دروە ڕسمییەکا نەخەڵەتێییۆ. بە دەنگیوا پەرسێنمێ 'شمە خەڵکو کۆیندێ؟' نەتاوێنێ جوابیچ بداوە، ڕا نمەدەیمۍ، کە شارەکەما دەسش ملەرە بگێریۆ. پەرسەو 'تۆ خەڵکو کۆینی' زللێوەنە کە وەنەو ئەقڵیەتی ئەرەگیرکەری و کۆلۆنیالیستی. یۆ بەیۆ جە گردو ڕاپۆرتەکا کۆڵیۆوە، خەڵکو شڕنەخی سەرکەوتەن. سڵام و وەشەسیای ئاراستەو خەڵکو شڕنەخی مکەروونە کە هیزیسەرو پایاوە، حەر بژیوۆ شڕنەخ.
دلێڕاسەو دادپەروەری، عیرفان و کولتووریوە بەدلیسنە سەرکەوتەی گەورەما دەس وست. فێڵێ و ساختەکاریێ دەنگدەرێ نایاسایی و پووچەڵکەرڎەیۆ دەنگەکاما، کودەتایێوەن دژو ئیرادەو گەلی. ئێمە ئا کودەتایە ڕەت مکەرمێوە. تانە یاساییەکێما بەرڎەوامێ با و ئێمە حەرگیز بەدلیسی پەی تاڵانکاریی ئیرادەی نمازامێ جیا.
هەرپاسە قەرس. ئانێ ئجێشا ڕاو ٣ هەزارا و ٨٤٢ دەنگدەرە ئامایاوە سەرکەوتێنۍ، دڵو گەلاو قەرسینە شەرمەزارێ کریێنێ و شکسشا ئارڎەن. ئەگەر دەنگو ئا دەنگدەراو خەڵکو قەرسی نەبێنی بوزمێ لاوە، ئا وەختە بەرگنۆ ئێمە بە ١٣٨٦ دەنگێ بەرڎەنماوە. ئەنجامەکە چێش مبۆ با ببۆ، قەرس پەی ئێمەن. کەس نمەتاوۆن شکس سەروو ئێمەرە بسەپنۆن. کۆشیای یاسایی و سیاسیی ئێمە بە گرد جۆرێو بەرڎەوام مبۆ.
ڕەنج و هەوڵێ فرێما دۍ، چا شارانە ڕەنج و مانیاییما هەن، یادەوەریما هەن، نەریتو کۆشیایما هەن، بۆنەو ئی سەرکەوتەیوە سڵام وەنەو گردو هامڕایاما مکەرمێن.
بانگەوازم پەی ڕای گردینی دیموکراتیکی و ئۆپۆزسیۆنی ئانەنە، کە وەراوەرو دەنگدەرە ساختا و قاچاخاوە ساعیبێ ئیرادەو گەلی با.
بە ڕاسی و ڕۆشنی مواچمێن، بەتایبەتی شڕنەخنە، بەدلیس و قەرسنە سەرجەمو ئا ڕاوەبەرییا، کە دەیان شارێنە بە دەنگدەرێ قاچاخێ بەدەسشا ئاردێنۍ. ڕەوێ نییەنۍ. ئێمە داوا وەنەو گرد لاێوە مکەرمێ ڕێز وەنەو ئیرادەو گەلی بگێرا.
