هامسەرۆکو دەسەو ڕاوەبەری کەجەکەی جەمیل بایک جە بەشو یەرەمو چەمپنەکۊتەکەیشەنە چنی ئاژانسوو هەواڵوو فوراتی (ANF)ی  هۆرسەنگنایش پەی قۆناغۆو دووەمو هەڵمەتەو 'ئازادی پەی عەبدوڵا ئۆجالانی، چارەسەری پەی پەرسو کوردی' کەرد.

بەشی یەرەم و کۆتایی چەمپنەکۆتەکەو هامسەرۆکو دەسەو ڕاوەبەری کەجەکەی جەمیل بایکی چنی ANF پی جۆرەنە:

"سەرو بنەماو 'ئازادی پەی عەبدوڵا ئۆجالانی، چارەسەری پەی پەرسو کوردی' ، هەڵمەتێوە جە ١٠/١٠/٢٠٢٣ دەسش پنەکەرد، ئی هەڵمەتۍ جبەرو کوردیۆ واتە جە لایەنو ئینتەرناسیۆنالیستەکاوە دەسشپنەکریا. گەلوو کوردیچ بەشدارییش چی هەڵمەتێنە کەرد. کورد سەرمەشقیش نەکەرد، بەڵکم فرەو گەلا دنیۍ ئانۍ پەی دیموکراسی، ئازادی، دادپەروەری، یەکسانی ئەرەکۊشا، ئاڎۍ بێنۍ کە سەرمەشقی هەڵمەتەکێشا کەرد و ژمارێوە فرەشا چی هەڵمەتێنە بەشدارۍ بێنۍ. ئا هەڵمەتۍ رۆژەڤێوەش سازکەرد. رابەر ئاپۆ، پاڕادایمو رابەر ئاپۆیش ئشناسا و سەرانسەرو دنیێرە وەڵاش کەردۆ. پەی قۆناغەو یووەم و هەڵەمەتەکۍ ئینسان متاوۆ واچۆ بە سەرکۆتەیی تەمامیا. سەرو قۆناغەو دووەمیچ، کۆڵنەنە گلېرۆبیەیۍ سازکریا، قۆناغەکۍ چاوە دەسش پنەکەرد و چاوە ئەرەیاۋییا. ئانە ساڵێوەش ۋییەرنا، ئێمە پایۍ منیەیمۍ ساڵەی دووەمۆ. ساڵەی دووەمە سەرو ساڵەی یووەمی وەڵێگنۆ. قەوەتتەریچ وەڵێگنۆ. ئانۍ چی هەڵمەتێنە بەشدارۍ بێنۍ من یۆ بە یۆ سڵامشا ۋنە مکەرو ، مبارەکبایش ۋنە مکەرو، رێزو ۋێمشا پەی بەربڕو.

گەلوو کوردی چی هەڵمەتێنە یاگێش گێرتە و عال وەڵێش وستە، چنی ئەنتەرناسیۆنالیستەکا بە جەهانەرە وەڵاش کەردۆ. ئینەیچ پەی گەلوو کوردی سەرکۆتەیا. ڕاسا بە سەختی و قوربانیدایۍ فرۆ وەشبیەن، بەڵام گەلوو کوردی قازانجش کەرد. سەرو ئی بنەمایۍ پەنەوازا گەلوو کوردی دەسکۆتەکاش گۆرە بکەرۆ. مەرامو ۋێش بارۆنە دی. ڕابەر ئاپۆی بەجەسەیی ئازاد بکەرمۍ، پەرسو کوردی چارەسەر بکەرمۍ. پی بۆنۆ سڵام و مبارەکنایی جە گەلەکەیما مکەرمۍ، رێزو ۋێمشا پێشکەش مکەرو. جە ئیساتێنە چی هەڵمەتێنە چڼین دەسکۆتۍ و سەرکۆتەی ئامێنۍ دی، جە ئارۆیچۆ دەورو ئەنتەرناسیۆنالەکا بنەڕەتی و گرنگا. هەڵمەتەکۍ سەرو ئی بنەمایۍ وەڵۍ گنۆ و دیسان سەرمەشقیش مکەرا. وە گەلوو کوردیچ جە گرڎ ڕوانگێوە بەشدارا، خزمەتو ئی هەڵمەتۍ مکەرا و ئی هەڵمەتۍ سەرگنۆ. چانەی مشۆ جە ساڵەو ئاینڎەینە ئەنجام گێرۆنە. ۋەرو ئانەی تا مۍ جە جەهانەنە زیاتەر وەڵا مبۆوە، پارێزنامەکۍ ڕابەر ئاپۆی زیاتەر مونیاوە و ۋەنایۆیشا زیاتەر پەی مکریۆ. ۋەرو ئانەی ڕابەر ئاپۆ واتش؛ "پارێزنامەکێم هەر یاگێنە با، منیچ ئینانی چا." پا مەعنۍ سەرکۊتەی هەڵمەتەکۍ وابەسەو ئینەینە. چڼە پارێزنامەکۍ بونیاوە، ئاڼنە زیاتەر حەقیقەتو ڕابەر ئاپۆی بەرگنۆ، وە فرە زیاتەر ئا سیاسەتە ڕۆشن مەبۆوە کە سەرو ڕابەر ئاپۆی، پەکەکەی و گەلوو کوردی ڕاوەبەر مکریۆ.

چن بە عالی جە پارادایمو ڕابەر ئاپۆی بیاومێنە، ئاڼنە زیاتەر خاوەنداریش ۋنە مکریۆ

چی هەڵمەتێنە کە ساڵێوەش ۋییەرنا، گەل بەشدار بۍ، ژەنی بەشدارۍ بێنۍ، جوانۍ بەشدارۍ بێنۍ، هونەرمەنڼا، شارەوانییەکۍ، بەتایبەت سەندیکی ئینگلتەرا، سکۆتلەندای، بڕۍ سیاسەتمەدارۍ، ئەکادیمیۍ، پارێزنەرۍ، براوەکۍ خەڵاتو نۆبڵی و چڼین کەسۍ پی جۆرە بەشدارۍ بێنۍ و خزمەتشا کەرد. جە کاتێنە ئاشنابیەی و وەڵابیەیۆ پارادایمەکاو ڕابەر ئاپۆی جە جەهانەنە زیاتەر وەڵا مەبۆوە، بە گرڎی دەورو ئینیشا گرڎ چی پرۆسەیەنە گرنگا. سڵام ۋنەو گرڎی مکەرو، مبارەکباییشا ۋنە مکەرو حورمەتو ۋێمشا پەی بەربڕو. کارکەردەی و باوەڕیما ئانەنە کە کارەکا زیاتەر بکەرمۍ. ۋەرو ئانەی تا مۍ ڕابەر ئاپۆ، جە پارادایمو ڕابەر ئاپۆی زیاتەر بیاومێنە. چڼە زیاتەر چنەش بیاومێنە ئانڼە زیاتەر خاوەنداریکەردەی وەڵێگنۆ.

جە ئیساتێنە پېسە چنی ئی قۆناغۍ وەڵۍ وزیێنە، سیستەمو مۆدێرنێتەی سەرمایەداریچ جە دژش مردانۆ. چونکی مەرامشا ئانەنە کە ڕابەر ئاپۆی و پەکەکەی بێکاریگەربکەرا و درێژە بە قڕکەردەی بڎا. ۋەرو ئانەیچا جە گرڎ شۆنێنە دژو ئی هەڵمەتۍ مردانۆ. پېسە چنی پیلانگێڵنی مېیاننەتەوەییشا وەڵێوست و موزیڕێنۍ سەرش، پا گۆشەگیرییە ڕەهایە گەرەکشا بیەن ڕابەر ئاپۆی بێکاریگەر بکەرا، پەکەکەی دلېنە بەرا، درێژە بە قڕکەردەی بڎا، دژوو پیلانگێڵنیچ تا مۍ جە مېڎانی مېیاننەتەوەینە هەڵوێسی زیاتەر وەش بۆ. خاوەنداریکەردەی جە ڕابەر ئاپۆی و پارادایمو ڕابەر ئاپۆی زیاتەر مەبۆ. پەی ئینەیچ سەرو ئاستو دنیۍ جەنگۍ ڕاوەبەر مکریۆ. پیلانگێڵنی مېیاننەتەوەیی جە ئاستۍ مېیاننەتەوەیینە ئەنجامدریا، دژو ئینەیچ پەنەوازا هەڵوێسەکۍ جە ئاستی مېیاننەتەوەیینە با. پۊکەی تا مۍ سەرو ئی بنەمایۍ وەڵێگنۆ.

ئیساتۍ ئانۍ چی هەڵمەتێنە بەشدارێنۍ، ئانۍ گەرەکشانە ڕابەر ئاپۆ بە شێوێوە جەسەیی ئازاد بکریۆ، پەی چارەسەری کێشەو کوردی، ماچا ئاژەو ڕابەر ئاپۆی هامشێوەو ئاژەو ماندێلایا. ئانەی پەی ئازادی ماندێلای ئەنجامدریا، پەنەوازا پەی ڕابەر ئاپۆیچ پەرەش پنە بڎریۆ. ڕاسا، جە بڕۍ لێوە ئاژەو ماندێلای و ڕابەر ئاپۆی جە یۆی مشا. بەڵام جە گرڎ لێوە پېسە یۆی نیەنۍ. کاتێ جمېیەرێوە جە مېڎانی مېیاننەتەوەیینە پەی ماندێلای پەرەش ئەسا، ئاژەو جەهانی ئا کاتە جیاواز بۍ. ئارۆ ئاژەکە فرە جیاوازتەرا، جەنگی جەهانی یەرەم ئینا ئارانە. هامکات پیلانگێڵنیێوە مېیاننەتەوەیی دژوو ڕابەر ئاپۆی ملۆڕاوە ئینە لایەنۍ فرە جیاوازو مەسەلەکێن. چانەینە ئاژەو نیلسۆن ماندێلای بە ئاسانی گەشەش کەردەبۆ، بەڵام هەڵمەتەو ئازادی جەسەیی ڕابەر ئاپۆی بە خێرایی ماندێلای پەرە مەسانۆ کاتش گەرەکا. مشۆم ئینەی بوینمۍ. پەی ئی مەبەسیچە پەنەوازا ئا هەڵمەتۍ پەرە پنە بڎەیمۍ بەشێوێوە قەوەتتەر گەشەش پنە بڎەیمۍ.

مشۆم هەڵمەتەو ئازادی ڕابەر ئاپۆی بکەرمۍ چەق و ناوەندو گرڎو کارەکاما

واتە ئا هەڵمەتۍ کە پەرەش پنە مڎریۆ مبارەکەنە، بەڵام کەموکوڵیچش هەن پەی ئازادیی جەسەیی ڕابەر ئاپۆی وەسۍ نییا. چۍ چ ئەنجامێوە بەدەس مۍ؟ واتە پەنەوازا هەڵمەتەکۍ گۆرەتەرە و قەوەتتەرە بکەرمۍ. پەی ئینەیچ پەنەوازا گرڎ کەسێ چی هەڵمەتێنە دەورێوە عال برمانۆ. گرڎو ڕۆژەڤو ژیۋایش سەرو ئی بنەمایۍ بۆ. کارێ کە مکریۆ مشۆم سەرو ئی بنەمایۍ و پێوەس بە ئازادیی ڕابەر ئاپۆی بۆ، ئێمە چێش بکەرمۍ کە بەشێوێوە جەسەیی ڕابەر ئاپۆی ئازاد بکەرمۍ ئانە ئەساسا. چونکی بە ۋییەرنای کاتی پەی ڕابەر ئاپۆی و پەی گەلوو کوردی و پەی مرۆڤایەتی خاس نیا پەنەوازا بە زووتەرین کات هەڵمەتێوە فرە قەوەتە دەس پنە بکەرمۍ. ئینەیچ ئەرکو گرڎ کەسێن. کاتێک گرڎ کەسۍ ئی ئەرکەیە بە بنەما بگێرۆ، ئا کاتە بەدڵنیاییوە هەڵمەتێوە فرە قەوەتە گەشە مکەرۆ. ئێمە پەنەوازما بە گەشەپنەدای هەڵمەتێوە ملیۆن کەسی هەن. ئیتر پەنەوازا بەملیۆنان کەسۍ دەس بە کار و چالاکی بکەرا، مشۆم بەملیۆنان کەسۍ بەشدارۍ گلێرۆبیەی و چالاکییەکا با. بەتایبەت ئانۍ کە کاریگەریشا سەرو مرۆڤایەتی هەن پەنەوازا بەشداری گلېرۆبیەی و ڕاپیماکا بکەرا و وتارە بڎا. باسو ویژدانو مرۆڤایەتی بکەرا. پی جۆرە ڕابەر ئاپۆ بە جەسەیی ئازاد مکریۆ و کێشەو کوردی چارەسەر مکریۆ. ڕاسی ڕابەر ئاپۆی و ڕاسی پەرسو کوردی پێوەس بە یۆینۍ پۊکەی گەل ماچۆ بەبێ ڕابەر ئاپۆی ژیۋای پەی ئێمە حەراما، ئینە گوزارشت جە حەقەتینو ڕابەر ئاپۆی مکەرۆ. جە تاریخەنە حەواریونۍ بیێنۍ، ئاڎۍ جە دڵۆ بە تەمامی ۋێشا بەند کەردەن پەی وەڵاکەردەیۆ فەلسەفەو عیسای دلۍ مرۆڤایەتینە و پی جۆرە وەڵۍ بیێنێوە. ئیساتۍ هەرکەسێ بەتایبەت ئەنداماو جمیەرو پەکەکەی و پاژکی پەنەوازا پېسە حەواریونی پەی ۋەرگریی جە ڕابەر ئاپۆی گرڎ شۆنێرە وەڵۍ باوە و ۋێشا بیاونا بە گرڎ شۆنۍ. هەرپاسە سەرو پارێزنامەکا جە گرڎ شۆنێنە گفتوگۆ دەس پنە بکەرا. ئەگەر پی جۆرە ئەرەکۊشای بکریۆ، ئی هەڵمەتە جەهانیۍ پەی ڕابەر ئاپۆی بە پارادایمو ڕابەر ئاپۆی قەوەتتەر گەشە مکەرۆ و قەوەتتەر خاوەنداری جە ڕابەر ئاپۆی گەشە مکەرۆ. گرڎ کەسۍ پەنەوازا سەرو ئی بنەمایۍ کار و ئەرەکۊشاکاشا گەشە پنە بڎا. ئیساتۍ جە هەڵمەتەکێنە پەی ئازادی جەسەیی ڕابەر ئاپۆی و چارەسەری کێشەو گەلوو کوردی پەنەوازا سەرو ئی بنەمایۍ هەڵمەتەکۍ قەوەتە بکریۆ، هیواو سەرکۊتەی پەی گرڎ کەسێ موازو. جارێوەتەر پیلانگێڵنی مېیاننەتەوەیی ئیڎانە مکەرو، ئا تووڕەییەی کە جە زېڵۍ ئێمە، هەڤاڵا، گەلی و دۆسامانە هەن، پەنەوازا قەوەتتەر بکریۆ و بۆ بە مایۍ هۆشمەڼی و ئەنەیاوای و بۆ بە ڕێکوستەی و چالاکی. سەرو ئی بنەمایۍ، جارێوەتەر سڵام و ڕێزم ئاراسەو گرڎ لێوە مکەر و ماچو بژیۋۆ ڕابەر ئاپۆ."