یەرۍ هاموەڵاتۍ خەڵکوو شاروو بۊکانوو وەرکەوتوو کوردستانی، کە میانەو وێنیشاندایەکاو سەرەورڎای " ژەنی، ژیوای، ئازاڎی"ی گیریێبێنۍ، تۊمەتوو "خراپەکاری سەروو زەمین"یشا ئاڕاستە کریان، کە ئەگەرش هەن بۊ بە مایۍ سەپنای سزاو قەنارەدای ملشارە.
بەپاو هەواڵێوە تۊڕەو مافەکاو ئینسانوو کوردستانی، یەرۍ هاموەڵاتۍ خەڵکوو بۊکانی بە نامەکاو ڕەئوف شێخ مەعروفی، کامەران سوڵتانی و محەمەد فەرەجی، کە زمسانوو ساڵۍ وەڵینۍ میانەو سەرەورڎای"ژەنی، ژیوای، ئازاڎی"ینە هێزە ئەمنییەکاو ئێرانی گێرتێبێنۍ، تۊمەتوو "خراپەکاری سەروو زەمینی (افساد فی‌الارض)"یشا رووبەڕوو کریانۊ.
بەپاو یاساکاو دەوڵەتوو ئێرانی جە ئەگەروو ساقکەرڎەیۊ ئا تۊمەتەینە سەروو ئا دەسبەسەرکریایانە، ئەگەرش هەن، سزاو قەنارەدایشا ملەرە سەپیۊ.
ئا یەرە هاموەڵاتۍ مانگەکاو بەفرانباری و ڕەشەمۍ ساڵەی وەڵینێوە گیریێبێنۍ، دماو گێرتەیشا فاڕیێبێنیوە پەی ئیتلاعاتوو ورمۍ و بە پاو زانیارییەکا ژووری تاکەکەسینە گیریێبێنۍ و بەمەبەسوو داننیایپۊرەی بەزۊری و لوۍ چێروو باروو قبووڵکەرڎەی تۊمەتوو بەشداریی جە کوشیای ئەندامێوە هێزە ئەمنییەکانە بۊکاننە بەتندی ئەشکەنجە دریێنۍ، وەلۍ سەرباروو گردوو فشار و ئەشکەنجەکا ئا یەرە هاموەڵاتۍ تۊمەتەکەشا ڕەت کەرڎەنۊ.
ئا یەرە هاموەڵاتۍ دماو تەمامیای وەنەپەرسایۊکا ورمێنە، ٢٠ جۊزەرڎانوو ٢٠٢٣ فاڕیێنێوە پەی زینڎانوو بۊکانی و تا ئیساتۍ بە گیریای و بە کاتی چا زینڎانەنە گیریێنۍ.
دماو ئانەی کناچە کورڎەو خەڵکوو شاروو سەقزی ژینا ئەمینی-یە بە بەهانۍ ئانەیۊ حیجابی بەزۊرش نەکەرڎەبۍ، لاو هێزەکاو بەنامۍ پۊلیسوو ئەخلاقیوە تاراننە کەوتە وەروو دایوەنەی و ئەشکەنجەی و ئەنجامنە جە ٢٥ خەرمانانوو ٢٠٢٢ (١٦ ئەیلوولی) مەرڎە، شەپۊلێوە وەرفراوانوو وێنیشانەدای و ناڕەزایەتیی وەرکەوتوو کوردستانی و ئێرانیش گێرتۊ، کە بە سەرەورڎای "ژەنی، ژیوای، ئازاڎی" ئشناسیان.
چا سەرەورڎاینە کە چندین مانگۍ بەرڎەوام بی زیاتەر جە ٥٠٠ وێنیشاندەرا بە تەقەو هێزەکاو ئێرانی کوشیۍ، ئینە جیا جە کوشیای چندین وێنیشاندەرا چێروو ئەشکەنجەینە و قەنارەدای هەشت وێنیشاندەرای تەریچ.
چا وێنیشانەدایانە بە دەیان هەزار کەسۍ گیریۍ، کە بەشێوەشا تا ئیساتێچ ئازاڎۍ نەکریێنۍ و سزای قورسەشا ملەرە سەپیێنە.
