جە یانزەمین ساڵیاڎو کۊکوشی ٩و کانونوو دووەم و پاریسینە کە چنەشەنە جە ئەرەمەرزنەرا و پەکەکەی سەکینە جانسزە ، نوێنەرەو کەنەکەی جە پاریس فیدان دۆغانە و ئەندامەو جمیەرەو گەنجا کوردی لەیلا شایلەمەزۍ جە بناروو قەندیلی و دگورێی شەنگالینە یاڎشا کریاوە.

قەندیل

بناروو قەندیلینە بە سەرمەشقایەتی ڕېکوزیاو ژەنا ئازاڎیی کوردسانی (رەژاک)، بەمەراسیمێوە یاڎوو گەشمەرڎا کۊکوشی ٩و کانونوو دووەم و ٢٠١٣و پاریسی حەریۆ جە سەکینە جانسزۍ، فیدان دۆغانۍ و لەیلا شایلەمەزۍ کریاوە کە جە تەرەفوو میتیوە تیرۆر کریېبێنۍ.

جە مەراسیمەکەنە ژمارېوە فرە ژەنی بەشداریشا کەردەبۍ، هۆڵوو کۆبوونەوەکەی بە وێنۍ گەشمەرڎا و  ڕابەروو گەلوو کوردی عەبدوڵا ئۆجالانی ڕازیابێوە.

جە مەراسیمەکەنە باس جە کەسایەتی و کۊشیای ئا یەرە ژەنە شۆڕشگێڵنەیە کریا و داواکاری پۍ بە سزایاونای ئەنجامدەرا ئا کۊکوشیە دووپاتکریاوە.

شەنگال

جمیەروو ئازاڎیی ژەناو ئێزدی (تاژێ) جە گلېرگەو دگورێی شەنگالی بە بەستەی سمینارێوە یاڎوو یەرۍ ژەنە شۆڕشگێڵنا کوردی سەکینە جانسزە، فیدان دۆغانە ولەیلا شایلەمەزێش بەرزڕاگرت کە ١١ ساڵۍ چېوەڵتەر جە تەرەفوو میتوو تورکیایۆ جە پاریسەنە تیرۆر کریۍ.

سمینارەکە جە ئەنجومەنوو دگورێی شەنگالی بە بەشداری سەڎان کەسا و حەرپاسە نوێنەراو رێکوزیا و ئەرەمەرزیاکا شەنگالی لوواڕاوە.

جە سمینارەکەنە باس جە رەنج و کۊشیای ئا یەرە ژەنە شۆڕشگێڵنەیە کریاوە و رهام هجۆ واتەواچە و ئەندامەو دەسەو ڕاوەبەری تاژێ جە واچېوەنە ئاماژەش پانەی کەرڎ، کە ئەگەر ئارۆ جە شەنگالەنە تاوانشا ۋېشا ڕێکوزا و بانۍ بە ساحیب و ئەرەمەرزیای تایبەت بە ۋېشا، ئانە ئەنجاموو بەرهەموو رەنج و کۊشیای ژەنا سەرمەشقۍ پېسە سەکینە جانزێن.

جەختیچش کەردۆ: "گلېرگەی ئێزدی ئارۊنە سەروو خەتەو گەشمەرڎۍ سەکینۍ ۋېش رێکوستەن و بیەن بە ساحیب ئیراڎە. ئێمە پېسە ژەنا ئێزدی پەی ئازاڎیی ژەنا تا دما نەفەس سەروو خەتەو سەکینەکاوە درێژە بە ڕاو ۋېما مڎەیمۍ".