یۆ جە وڵاتپارێزنا شارو کۆبانێ کە دووۍ کەڕەتۍ لووان بەنداوو تشرینی عومەر عەلوشا. عومەر عەلوش پەی ئاژانسو هەواڵو فوراتی (ANF)ی قسێش کەردۍ و باسش جە سات و یادەوەرییەکا مڎرامانەکا تشرینی کەرد و ئاماژەش بە مڎرامانوو گەلی جە ۋەرا ۋەرو هرووژمە ئەرەگیریەکانە کەرد.

عومەر عەلوش جە سەرەتاو قسەکاشەنە واتش: "سەرەتا کە لوایمۍ بەنداوو تشرینی، ڕووبەڕوو هرووژمی نامەردانەو دۊڵەتو تورکی بییەیمێوە. سەرەڕاو چڼین هرووژمی سەختی دیسان بە مڎرامان و پاگیری گۊرۆ بەرەو بەنداوو تشرینی کۊتیمۍ ڕا و یاوایمۍ بەنداوەکە. گەلەکەما و جەنگەوانا یەک ڕۆحەنۍ، چا بێنمۍ جەنگەوانەکېما گورزەشا جە دژمنی دێنۍ. ئیتر قەرارو ۋێما دان، یان مەردەی، یان مەنەیۆ و چا بیەی. جە دەوروبەرمانە فڕۆکەی جەنگی و فڕۆکەی بێفرۆکەوان، هاوەنۍ سەرەمڕە چا گنێنێرە. نەزانێنمۍ گېڵمېوە یان نا. چا ژیۋایۍ جیاواز هەن، پەڕا جە مڎرامان، جە لێوە بۊمبوارانو ئەرەگیری، جە لېوەتەرۆ زەماۋنەو سەرکۊتەی".

'تشرین بی بە داستانو دەروێشو عەبدی'

جە قسەکاشەنە عەلوش ئاماژەش بە هەستو حەقکەردەیۆ گەلی جە هرووژمەکانە کەرڎ و واتش: "جە دژو چەتەکا داعشی جەنگما کەرد و تیرۆرما جە بەین بەرد. چۍ بێ کارەبا و ئاوینمۍ. بەرەو تشرین لوایمۍ تا کارەبا و ئاوی ۋێما پارێزنمۍ. بەنداوو تشرینی بی بە داستانو دەروێشی عەبدی، گرڎ جەنگەوانێوە جوان چا بیەن بە دەروێش، گرڎ جەنگەوانێوە ژەنی بیێنە بە عەبدی. مڎرامان بنەڕەتییا، بە دڵنیاییوە سەرۍ گنمۍ".

'پەنەوازا گەلوو کوردی ئەرەپڕۆ'

جە دما دمایی قسەکاشەنە جەختش جە بەردەوام بیەی جە مڎرامانیشا کەرڎۆ و  واتش: "شۆڕش جە کۆبانێوە دەسش پنەکەرڎ، تشرینەنە بەرەو سەرکۊتەی ملۆ، جەنگەوانەکېما بەرەو بەرەکا جەنگی ملا و گورزەی قورسە جە ئەرەگیرا مڎا و سەرۍ کۊتۍ. داوا جە تەمامو ئا کەسا مکەرو کە باسو مرۆڤایەتی و دیموکراسی مکەرا، مشۊم ئیتر جە ۋەرا ۋەرو ئی ئەرەگیریەینە خاوەن هەڵوێسۍ با. ئێمە سەرۍ گنمۍ، پەنەوازا گەلوو کوردی ئەرەپڕۆ".